Read Batak Dairi 2 Kronika 19 Bible Online

2 Kronika 19 - Batak Dairi bible

2 Kronika 19

¹Enggo kessa balik Raja Josafat merkinijuah mi istanana i Jerusalem,

²roh mo sada kalak nabi mergerar si Jehu anak si Hanani menghadep raja. Idokken nabi i mo mbangsa, “Selloh ngo iurupi Rajai kalak jahat janah kalak simerceggo atè midah JAHOWA? Memaing melaga ngo JAHOWA kemulihken ulah-ulah Rajai.

³Enggo irumpakken Rajai karina gana-gana Asyera sinisembah jelma nterrem, janah enggo merusaha Rajai mengèkutken lemmo atè Dèbata.”

⁴Merian i Jerusalem ngo si Josafat. Tapi dak nggati ngo idahi ginemgemna i i suberri nagerri lako mendokken kalak i asa balik mendahi JAHOWA Dèbata empung kalak i.

⁵Ipebangkit ngo perhukum i gennep kuta gotting Juda,

⁶janah iperèntahken taba kalak i bagèen, “Bijak mo kènè mendabuh hukum, ai oda ngo merkitè gerar jelma kènè mendabuh hukum, tapi merkitè gerar JAHOWA ngo. Iperdimata ngo kènè tikan memutus perkara.

⁷Kebiari kènè mo JAHOWA janah mermanat mo kènè, ai nggogo ngo atè JAHOWA Dèbatanta midah kalak nggèduk, simertimbang bagè taka buluh, barang simenjalo sisip.”

⁸I Jerusalem pè ipebangkit si Josafat ma ngo penghukum bai kalak Lewi nai, bai imam-imam nai, dekket simpantas niasè i jelma nterrem nai. Kennah idabuh kalak i ngo hukum tupung perkara simengelausi Pati-patien JAHOWA dekket perkara sidèbankenna i.

⁹Iperèntahken si Josafat ngo taba penghukum-penghukum i bagèen, “Ulaken kènè mo ulaen ndènè i ibagasen merketoken bai JAHOWA. Uèi kènè mo perèntahNa ibas karinana sibahanken ndènè.

¹⁰Mula lot dengan ndènè i kuta sidèban nai pesakatken taba kènè perkara pembunuhen, pengelanggaren puhpuh, kennah ngo peddahen ndènè kalak i. Merkitè bagidi oda mersalah nèngè kalak i taba JAHOWA, janah tentu oda nè melaga JAHOWA taba kènè dekket taba kalak i pè. Ulaken kènè mo sikuperèntahken èn asa ulang mersalah kènè.

¹¹Imam huntuen Amarya kuberèken kuasa sindatesna lako mertimbang perkara tersèngèt hatoren agama. Bai si Zebaja anak si Ismael gubèrnur Juda kuberèken kuasa sindatesna meradepken karina perkara sidèbankenna i. Kalak Lewi mertanggung jabab menjaga asa kennah merdalan karina hukum sienggo idabuh. Ekutken kènè mo peddahku èn janah teggas kènè mertindak. Dak idengani JAHOWA mo jelma simerpengelako adil.”