Read Batak Dairi 2 Kronika 2 Bible Online

2 Kronika 2 - Batak Dairi bible

2 Kronika 2

¹Enggo itetapken Raja Salomo lako memajek Bages JAHOWA, dekket sada istanana.

²Lako mahan i, idokken mo 70.000 kalak lako petaruh perkayu, 80.000 kalak memahat batu i delleng janah 3.600 kalak mandur, lako memperdimata ulaen i.

³Itengesken si Salomo ngo berita i taba si Hiram raja Tirus, “Naing mo, nemmuken lot hubungen ndènè mertiga-tiga dekket aku tosè bagè dekket bapangku si Daud. Enggo ngo idèa kènè bana kayu arès Libanon mahan perkayu istanana.

⁴Bagèndari naing kubahan ngo sada bages perpulungen, manihan bekkas lako pesangapken JAHOWA Dèbatangku. I bas Bages i ngo aku dekket ginemgemku naing mersembah tabasa dekket menutung dahupa sibaungkus, dekket memèlèken roti hantaren baNa. I bages i ma ngo naing kupèlèken kami pèlèen situtungen gennep ceggen dekket gennep mboen, gennep ari Sabat, ari raya Peltak Bulan bak ari-ari mbellen sidèbanna i lako pesangapken JAHOWA Dèbata nami. Kumerna enggo kin ngo iperèntahken i, asa kubahanken kami kalak Israel i soh mi amman sumendah.

⁵Dok atèngku Bages JAHOWA sinaing kubahan imo bages simehejina, ai mehejien ngo Dèbata nami i daripada dèbata paina nola pè.

⁶Tapi situhuna isè poda terbaingsa pecènderken bages bai Dèbata, ai suberri dunia èn pè kètèksu dèng ngo mahan bekkasNa. Jadi, Bages JAHOWA sinaing kupajek i, pellin bekkas menutung dahupa bai Dèbata ngo kessa i.

⁷Kumarna i, pasulak kènè mo mendahi kami sada kalak pandè mengokir janah ndorok meneppa emmas, pirak, tembaga, bessi, janah pandè ma mencellup kaèn meratah, mbèrèng dekket mbara. Rebbak mengula mo kalak i dekket sipandè i Juda bak Jerusalem sienggo ipilih bapangku si Daud.

⁸Kubettoh ngo kalak pertabah kayu sini nagerri ndènè i pandè ngo menjamah kayu, kumarna i tengesken kènè mo bangku mermatcam bagè kayu arès dekket kayu sempènur i Libanon nai. Kudokken ma pè orangku lako mengurupi orang ndènè i,

⁹asa ipepada kalak i mbuè kalohon kayu. Ai mbelgah ngo Bages JAHOWA sinaing kubahan i janah merandal kalohon.

¹⁰Mahan bekkel orang ndènè i, kutengesken pè dua matcam gandum bai ndènè gennep matcam 2.000 ton, anggur 400.000 sellup dekket minak zaitun 400.000 sellup.”

¹¹Ibales Raja Hiram mo surat Raja Salomo i bagèen katana, “Kumarna ngkelleng atè JAHOWA midah bangsaNa, enggo ipebangkit kènè gabè raja kalak i.

¹²Nipoji mo JAHOWA Dèbata kalak Israel, situmempa langit dekket tanoh èn. Iberèken ngo taba si Daud sada anak bijak kalohon janah mpantasniasè bak pandè, bagèndari naing pecènderkan sada bages bai JAHOWA dekket sada istana bana.

¹³I sèn kupasulak ngo mendahi kènè sada kalak pandè mergerar si Huram.

¹⁴Marga Dan ngo inangna, bapana kalak Tirus. Pandè ngo menukkangi emmas, pirak, tembaga, bessi, batu dekket kayu pè. Pandè ma ngo ia memahan kaèn meratah, mbèrèng mbara bak kaèn linen. Karina matcam okir pè ndorok ngo ibahan mengèkutken contoh barang bakunè gerrek atè. Ia mo nidokken rebbak mahan bahaen dekket tukkang ndènè i, dekket kalak sienggo mengula rebbak Raja Daud bapa ndènè.

¹⁵Kupèma kami mo itengesken kènè sidua bagè gandum i, anggur bak minak zaitun sienggo ijandiken kènè i.

¹⁶Kutabah kami pè kayu arès i delleng Libanon nai, sadikè perlu bai ndènè, nai irakut mo i gabè rakit, janah iombang arap laut soh mi Jope. I sidi nai kènè mo merembah mi Jerusalem.”

¹⁷Ibilang Raja Salomo mo karina kalak sidèban simerian i Israel, bagè sienggo nung ibaing Raja Daud bapana i. Lot ngo 153.600 kalak buèna.

¹⁸Pitupuluh ribu kalak bai kalak i nai idokken mo petaruh kayu, 80.000 kalak memahat batu i delleng, janah 3.600 kalak mandur memanduri janah mertanggung jabab mi ulaen i.