Read Batak Dairi 2 Kronika 21 Bible Online

2 Kronika 21 - Batak Dairi bible

2 Kronika 21

¹Matè mo si Josafat janah ikubur mo i perkuburen raja-raja i Kuta si Daud. Anakna si Jehoram mo mbangkit raja singkatna.

²Si Jehoram anak si Josafat raja Juda, lot ngo ennem anggina imo: Si Amarya, si Jehiel, si Zakharia, si Azariahu, si Mikhail dekket si Sefaca.

³Mbuè ngo emmas, pirak dekket harta maharga sidèbanna i tading-tadingen bapana bai kalak i, janah karina kalak i iberèken tersada kuta gotting i Juda. Tapi kumarna si Jehoram ngo anak situaen, ia mo itentuken si Josafat gabè raja.

⁴Enggo kessa ntegguh iakap si Jehoram perkundulna sibagè raja, ipasulak mo memunuh anggina i karina dekket tah piga-piga kalak perpangkat ndates.

⁵Si Jehoram mbangkit raja Juda tikan merumur 32 tahun, janah memerèntah i Jerusalem 8 tahun.

⁶Ièkutken ngo pengelako Raja Ahab dekket raja-raja Israel sidèbanna i, kumarna ikabini ngo sada berru si Ahab. Merdosa ngo ia taba JAHOWA,

⁷tapi oda uè JAHOWA petumpatken raja i pemparen si Daud nai kumarna enggo ipadanken kin, hot ngo memerèntah ukum pemparen si Daud.

⁸Tikan pemerèntahen si Jehoram, memberontak ngo kalak Edom taba Juda, janah ipecèndek kalak i mo kerajaenna sendiri.

⁹Kemulihkenna i berkat mo si Jehoram dekket lubalang-lubalangna bagi dekket kurèta perangna menjuhap kalak Edom. Keppèken gabè ikubu kalak Edom i nola mo kalak i, tapi bernginkenna i iterobos kalak i ngo pengkubu musuh i janah mperrus kalak i.

¹⁰Mulai i sidi nai mo oda nèngè tunduk kalak Edom taba Juda. Tikanna i ma mo memberontak kuta Libna. Masa pè karina i kumarna itadingken si Jehoram ngo JAHOWA, Dèbata sinisembah empung kalak i.

¹¹Gabè ipecènder nola mo tupèh bekkas mersembah taba sembahen i delleng Juda, memaing gabè merdosa kalak Juda bak Jerusalem taba JAHOWA.

¹²Nai dapet si Jehoram mo sada surat sinisurat Nabi Elia tikan nggelluhna dèng. Bagèen ngo kata surat i, “ JAHOWA, Dèbata sinisembah si Daud ngo menghukum Rajai, kumarna oda ièkutken Rajai pekilako bapa bak empung Rajai.

¹³Balikna nola ngo tupèh, ai tosè bagè pengelako raja-raja Israel nola ngo pengelako Rajai, kumernaken kalak Juda dekket kalak Jerusalem oda nèngè setia taba Dèbata. Ibaing Rajai ngo bagè pemaing Raja Ahab dekket simenggancihisa i. Gabè ibunuh Rajai dèng ma ngo karina anggi Rajai keppèken sellohen dèng ngo kalak i asa Rajai.

¹⁴Hukumen mberrat bai JAHOWA nai sempa mo taba ginemgem, dukak-dukak bak sinibages Rajai.

¹⁵Raja pè menggongken sakit ncio beltek mo, tambah ari makin mparah!”

¹⁶Tikanna i lot mo kalak Palistin dekket kalak Arab merian i gembar perkutaen kalak Sudan kan biding laut. Idungkul JAHOWA mo ukur kalak i lako mengalo Raja Jehoram.

¹⁷Ijuhap kalak i mo Juda, memupusi istana raja, janah iembah mo karina dukak bak sinibages si Jehoram, pellin anakna siampun-ampun mergerar si Ahazia nai ngo kessa oda tertaban.

¹⁸Enggo kessa masa karina i, ihukum JAHOWA mo si Jehoram merkitè sakit bituka siso ndorok nèngè njuah.

¹⁹Sidekkah naing-naing dua tahun sakitna i dak makin mpiahna, ujungna makin mpiahna kalohon mo iakap, nai matè mo ia. Oda lot ilakati ginemgemna api pinoron sikira pertanda bonek, bagè sienggo ibaing kalak i taba empung simengusurkensa.

²⁰Isè poda marsak i permatèna i. Ikubur ngo ia i Kuta si Daud, tapi oda i perkuburen raja-raja. Merumur 32 tahun ngo si Jehoram mbangkit raja, janah 8 tahun ia memerèntah i Jerusalem.