Read Batak Dairi 2 Kronika 22 Bible Online

2 Kronika 22 - Batak Dairi bible

2 Kronika 22

¹Tikan roh sada nuhnuhen kalak Arab lako menjuhap, karina dukak-dukak si Jehoram, laènken si Ahazia siampun-ampun i terbunuh ngo. Kumarna i ipebangkit pengisi Jerusalem mo si Ahazia gabè raja sumingkat bapana.

²Merumur 22 tahun ngo si Ahazia mbangkit raja, janah pellin setahun ngo kessa ia memerèntah i Jerusalem. Si Ahazia pè tosè bagè sisimpangaen Raja Ahab ngo pengelakona, kumarna ipeddahken inangna si Atalya ngo asa iulaken jahat. Si Atalya berru Raja Ahab ngo, kempu si Omri raja Israel.

⁴Merdosa ngo si Ahazia taba JAHOWA bagè simpangaen si Ahab, kumarna kalak i mo gabè pemeddahi bana enggo kessa matè bapana. Pemeddahi i ngo mencilakakensa.

⁵Kemulihken peddah kalak i, gabè rebbak mo ia dekket si Joram raja Israel lako mergeraha mengalo si Hazael raja Siria. Juhap mo kalak idi i Ramot, nagerri Gilead. Ugahen mo si Joram tikan mergeraha i,

⁶nai balik mo ia mi kuta Jizreel lako mertambar, janah itongkir si Ahazia mo ia mi si.

⁷Enggo kin ngo itentuken JAHOWA kennah dapet ajal si Ahazia tikan menongkir si Joram i ia. Tikan menongkir i, ialo sada anak laki mergerar si Jehu anak si Nimsi mo si Ahazia dekket si Joram, imo sienggo ipilih JAHOWA lako membinasaken pemparen Raja Ahab.

⁸Tikan ipesaut si Jehu hukum JAHOWA i taba sisimpangaen i, pesimbak mo ia dekket perpangkat ndates kalak Juda dekket beberrè-beberrè si Ahazia sidekket lako kiladang i. Nai ibunuh si Jehu mo karina kalak i.

⁹Nai ipasulak si Jehu mo menulusi si Ahazia, ai ciboni ngo ia tikanna idi i Samaria. Jupa kessa mo ia, iarahken mo ia mendahi si Jehu, nai mèter ibunuh mo ia. Tapi tukasi pè bagi, ikubur kalak i ma ngo ia, kumarna ipesangap kalak i ngo Raja Josafat empungna simenguèi JAHOWA ibas karina pusuh peratènna. Ipas simpangaen si Ahazia nai isè poda lot sanggup sumingkat pemerèntahen.

¹⁰Ibettoh si Atalya kessa mo enggo matè anakna Raja Ahazia, iperèntahken mo asa ibunuh karinana usur raja Juda.

¹¹Lot mo sada kalak turang si Ahazia mergerar si Joseba, sijahè taba sada kalak imam mergerar si Joyada. Ibuat si Joseba mo sipsip sada kalak anak si Ahazia mergerar si Joas, sada ipas dukak-dukak raja sinaing bunuhen si Atalya nai. Iboniken ngo anak i rebbak dekket pendèdahna ibas sada bilik Bages JAHOWA. Bagi mo cara si Joseba paluahken anak i asa oda ibunuh si Atalya.

¹²Ennem tahun dekkahna si Joas iboniken i Bages JAHOWA, sidang si Atalya memerèntah sibagè raja daberru.