Read Batak Dairi 2 Kronika 23 Bible Online

2 Kronika 23 - Batak Dairi bible

2 Kronika 23

¹I tahun pepituken, ngkibul ngo ukur Imam Joyada lako mertindak. Mertaki mo kalak i dekket lima kalak lubalang, imo si Azarya anak si Obed, si Maaseya anak si Adaya, dekket si Elisafat anak si Zikhri.

²Laus mo kalak i mendahi karina kuta silot i Juda, ipepulung kalak i mo kalak Lewi dekket karina pengulu horong, nai iarahken mo kalak i mi Jerusalem.

³Pulung mo kalak idi i Bages JAHOWA memahan padan dekket si Joas anak raja i. Idokken si Joyada mo taba kalak i, “En mo anak Raja Ahazia arnia. Kennah kundul i tahta ngo ia bagèndari kumarna enggo ipadanken JAHOWA kennah hot memerèntah pemparen Raja Daud.

⁴Bagèen mo sibaing arihta: Mula enggo pul imam-imam dekket kalak Lewi mengendengken tupung ari Sabat, ulang mèter balik kalak i. Sipertellu bai kalak i nai kennah dekket merjaga i pèntu mbengket mi Bages JAHOWA,

⁵sipertellu nai i istana raja, janah lebbihna i i Pèntu Pengkeruhen Mula-mula. Karina jelma nterrem kennah pulung i kasèan Bages JAHOWA.

⁶Isè poda ndorok mbengket mi bagasen Bages JAHOWA, laènken imam-imam dekket kalak Lewi situpung mengendengken. Ndorok ngo kalak i mbengket kumarna enggo ipilih kalak i bai JAHOWA. Sidèbankenna i kennah menguèi hatoren JAHOWA janah kennah i ruar mo kalak i ndong.

⁷Kalak Lewi kennah cènder mengkulilingi raja merpeddang sintak janah menjaga barang mikè pè ia laus. Barang isè naing mbengket mi Bages JAHOWA, kennah ibunuh.”

⁸Karina perèntah si Joyada iulaken kalak Lewi dekket kalak Juda ngo. Kalak sienggo pul ulanna tikan Sabat oda ipaduè balik. Jadi ndorok mo ipèmaken lubalang-lubalang kalak sienggo pul ulanna dekket kalak sirembaru roh lako mengula.

⁹Ibagiken si Joyada mo taba lubalang-lubalang i kujur dekket tambeng-tambeng milik Raja Daud sinipennep i Bages JAHOWA.

¹⁰Idokken si Joyada ma ngo dèba jelma merpeddang sintak i lebbè Bages JAHOWA i lako mengelègenni raja.

¹¹Enggo kessa i iarahken si Joyada mo si Joas karuar, nai ibaing mo bulang-bulangna i babo takalna janah iberèken bana bukku Pati-patien JAHOWA. Bagi mo carana ipebangkit kalak i si Joas gabè raja. Enggo kessa i, iarirken dukak-dukak si Joyada mo minak taba si Joas tanda enggo mbangkit raja si Joas, nai ioangken jelma nterrem i mo “Njuah-njuah.”

¹²Idengkoh si Atalya mo oang-oang jelma nterrem simengoangken raja i. Isudu mo laus mi Bages JAHOWA mendahi jelma nterrem simertumpu i.

¹³Idah mo raja sirembaru i cènder i pèntu mbengket mi Bages JAHOWA bekkasna ipebangkit i ikulilingi lubalang-lubalang dekket simenempul sarunè. Karina jelma nterrem i meroang-oang mersampang atè, ninganna sarunè pè mersora janah pergotci i Bages JAHOWA peramiken pèsta i merkitè oning-oningen kalak i. Seggat mo iakap si Atalya, iseggai mo olesna ninganna isurakken, “Selbuh; Selbuh!”

¹⁴Oda ipaduè si Joyada ibunuh si Atalya i i gembar Bages JAHOWA, idokken mo taba lubalang-lubalang, “Embah kènè mo ia mi ruar mengelausi barisen perjaga, janah bunuh kènè mo barang isè kalak sinaing paluahkensa.”

¹⁵Itangkup kalak i mo ia janah iembah mi istana. Ibunuh mo ia i Pèntu Pengkeruhen Kuda.

¹⁶Idokken imam Joyada mo Raja Joas dekket jelma nterrem asa rebbakken kalak i merpadan magahken tong bangsa JAHOWA kalak i.

¹⁷Enggo kessa i karina mo kalak i mengkubu janah mengerumpakken rumah Baal. Ireppuk mo langgaten bak gana-ganana, janah ibunuh kalak i mo si Matan Imam Baal i lebbè langgaten i.

¹⁸Nai idokken si Joyada mo imam-imam dekket kalak Lewi lako mengulaken bahaen i Bages JAHOWA mengèkutken perbagi ulaen sienggo itentuken Raja Daud. Kennah ipèlèken kalak i ngo pèlèen situtungen bai JAHOWA, bagè sienggo ihatorken si Musa, merkitè pèsta dekket endè-endè bagè sienggo ihatorken si Daud.

¹⁹I pèntu mbengket mi Bages JAHOWA ipejagaken si Joyada ngo pertaram lako menjaga asa ulang lot masuk kalak siso patut dekket mersembah taba JAHOWA.

²⁰Karina lubalang, simpantasniasè, perpangkat ndates i pemerèntahen dekket karina jelma nterrem simengèkutken si Joyada, mengarak Raja Joas i Bages JAHOWA nai mi istana. Masuk arap pèntu mbellen ngo kalak i, nai kundul mo raja i i kundulen raja.

²¹Karina jelma nterrem mersampang atè, kuta pè mènak janah si Atalya enggo mo terbunuh.