Read Batak Dairi 2 Kronika 24 Bible Online

2 Kronika 24 - Batak Dairi bible

2 Kronika 24

¹Merumur 7 tahun mo si Joas tikan mbangkit ia raja Juda, janah i Jerusalem ngo ia memerèntah sidekkah 40 tahun. Inangna mergerar si Zibya i kuta Bersyeba nai.

²Sidekkah nggelluh dèng si Joyada, ibahanken si Joas ngo sipesennangken atè JAHOWA.

³Iririt si Joyada mo dua kalak daberru mahan sinibages si Joas, janah tubuhen anak bak berru ngo kalak i sidua.

⁴Enggo kessa tah sadikè dekkah si Joas memerèntah, itetapken mo naing menasai Bages JAHOWA.

⁵Ipasulak mo imam-imam dekket kalak Lewi lako mendahi pengisi kuta silot i Juda asa ipepulung gugu bai karina jelma nterrem nai mahan peremmasen pekadèken Bages JAHOWA i gennep tahun. Idokken ngo taba kalak i asa ikettu mahan ulanna i, tapi dak ipedekkah-dekkah kalak Lewi ngo.

⁶Kumarna i idilo mo Imam Joyada simenguluken kalak i, nina mo mbangsa, “Otang si Musa naposo JAHOWA i enggo mendokken jelma nterrem mergugu lako mahan Undung-undung JAHOWA? Bagèndari pè kasa oda isessak kènè kalak Lewi i asa pepulungken gugu bai jelma nterrem i Juda dekket i Jerusalem?”

⁷(Enggo icèdai penumpak si Atalya daberru jahat i Bages JAHOWA, janah enggo mèduk perkekkas sipakèen bai JAHOWA gabè ipakkè kalak i menembah Baal).

⁸Nai iperèntahken raja i mo asa ibahan kalak Lewi sada pèti kèpèng janah igamparken mo i pèntu mbengket mi Bages JAHOWA.

⁹Nai itingtingken mo mi suberri Jerusalem dekket Juda asa karina jelma kennah merembah gugu bai JAHOWA, bagè sienggo ihatorken si Musa.

¹⁰Sampang ngo atè ginemgem bak pengulu-pengulu kalak i mendengkoh tingting i. Mersilebbè-lebbèen mo kalak i pemasukken kèpèng guguna mi bagasen pèti i.

¹¹Gennep ari dak iembah kalak Lewi ngo pèti i taba pugabè raja asa iperèso. Mula enggo dom pèti i ikaruarken penurat kerajaen dekket Imam Huntuen mo kèpèng i pèti i nai janah ibalikken ma mo pèti i mi bekkasna kin. Bagi mo ibaing kalak i gennep ari, jadi mbuè kalohon ngo kèpèng i terpepulung.

¹²Nai ipesakat raja dekket si Joyada mo kèpèng i bai kalak simenguluken tukkang menasai Bages JAHOWA i. Nai iupahi kalak i mo tukkang batu, tukkang kayu dekket tukkang bessi lako menukkangi bahaen i.

¹³Nai itebennai tukkang-tukkang i mo pekadèken Bages i. Karina ngo karèjo mertuhu-tuhu, nai gabè ntegguh mo Bages i janah merandal bagè i mulana.

¹⁴Enggo kessa pul ulaen i, ipesakat kalak i mo taba raja dekket si Joyada, emmas bak pirak siso kerrina. Nai ipakkè nola mo emmas bak pirak i mahan perkekkas i Bages JAHOWA, imo perkekkas sipakèen tikan acara mersembah, mahan bekkas pèlèen situtungen, tapak bekkas dahupa dekket mangkuk-mangkuk. Sidekkah nggelluh dèng imam Joyada dak tong ngo ipèlèken pèlèen situtungen i Bages JAHOWA.

¹⁵Toko ngo nggeddangna umur si Joyada, ai merumur 130 tahun ngo ia asa matè.

¹⁶Ikubur ngo ia i perkuburen raja-raja i Kuta si Daud, lako menghargai jasa-jasana menguèi Dèbata, bagi ma taba Bages JAHOWA dekket taba bangsa Israel.

¹⁷Enggo kessa matè si Joyada, iajar-ajari pengulu-pengulu Juda mo si Joas, gabè maknè ièngèt peddah si Joyada.

¹⁸Gabè oda nè mo mersembah jelma nterrem i Bages JAHOWA, Dèbata empung kalak i, tapi gabè menembah bègu dekket gana-gana Sembahen Asyera. Kemulihken dosa kalak i, melaga mo JAHOWA taba kalak Juda bak Jerusalem.

¹⁹Ipasulak JAHOWA mo nabi-nabi lako pesèngètken kalak i asa balik menguèi JAHOWA, tapi oda idengkohken jelma nterrem i.

²⁰Nai idomi Tendi Dèbata mo si Zakharia anak Imam Joyada, cènder mo ia i lebbè jelma nterrem i, idiungken mo, “Idokken JAHOWA Dèbata, ‘Kasa oda iuèi kènè perèntahKu janah mencilakaken diri ndènè. Kumarna oda isarihken kènè Aku, Aku pè oda kusarihken kènè!’ ”

²¹Tapi mertaki-taki mo jelma nterrem mengalo si Zakharia, janah Raja Joas pè dekket ngo ipas pertaki-takien i. Oda ièngèt nèngè setiana dekket jasa si Joyada bapa si Zakharia. Iperèntahken raja i mo asa ibentiri kalak i si Zakharia merkitè batu soh matè i kasèan Bages JAHOWA. Tikan naing mpostep kessahna idiungken si Zakharia mo, “Idah JAHOWA mo nemmu pemaingmu èn janah ibalesken bamu!”

²³Tahunna i ma, tupung gancih mosin, ijuhap tenterra Siria mo Juda dekket Jerusalem. Ibunuh kalak i mo karina pengulu-pengulu janah itaban mbuè kalohon harta iembah mi Damaskus.

²⁴Oda ngo nemmu sadikè pella buè tenterra Siria i tapi ibelli JAHOWA ngo kalak i menaluken tenterra Juda, tukasi pè ndaoh buèen, kemulihken oda isarihken kalak Juda nèngè JAHOWA Dèbata empung kalak i. Merkitè bagi mo ihukum JAHOWA si Joas.

²⁵Enggo kessa laus tenterra musuh i, mertaki-taki mo dua kalak pugabèna. Ibunuh kalak i mo ia i pedemenna, sikira bales anak Imam Joyada siterbunuh i. Ikubur mo Raja Joas i Kuta si Daud tapi oda i perkuburen raja-raja. (

²⁶Kalak simertaki memunuhsa i imo si Zabad anak si Simeat berru Amon dekket si Jozabad tubuh si Sinurit berru Moab.)

²⁷Tori-torien tersèngèt dukak-dukak si Joas bagi ma tersèngèt ramalen-ramalen siso toko tersèngètsa, dekket bakunè ia pekadèken Bages JAHOWA, tersurat ngo i karina ibas bukku Penjelasen Bukku Raja-raja. Si Amazia anak raja i mo mbangkit raja singkatna.