Read Batak Dairi 2 Kronika 25 Bible Online

2 Kronika 25 - Batak Dairi bible

2 Kronika 25

¹Merumur 25 tahun ngo si Amazia tikan mbangkit gabè raja, janah 29 tahun dekkahna ia memerèntah i Jerusalem. Inangna imo si Joadan i Jerusalem nai.

²Iulaken si Amazia ngo sipesampangken atè JAHOWA, tapi oda mertuhu-tuhu.

³Enggo kessa ntegguh perkundulna mèter ihukum mo simemunuh bapana i.

⁴Tapi ukum dukak-dukak pugabè sinibunuhna i oda ngo ibunuh, kumerna iuèi perèntah JAHOWA ibas Bukku Musa simendokken, “Ulang ihukum matè partuana kemulihken kejahaten dukak-dukakna, janah ulang matè dukak-dukakna kemulihken kejahaten partuana. Gennep jelma ndorok ihukum matè kumernaken kejahatenna sendiri.”

⁵Ipepulung Raja Amazia mo karina kalak marga Juda dekket Benjamin, nai idokken mo kalak i cènder mengèkutken horongna gennep, iuluken lubalang simenguluken seribu dekket simenguluken seratus. Nai ipilih mo kalak simerumur 20 tahun mi dates sindorok mergeraha janah pandè memakè kujur dekket tambeng-tambeng. Lot ngo 300.000 kalak buèna.

⁶Tambahna i iupahi dèng ma ngo 100.000 kalak tenterra Israel dekket 3.400 kilo pirak.

⁷Tapi roh mo sada kalak nabi mendahi raja i mendokken, “Ulang pakkè tenterra Israel i, ai oda uè nè JAHOWA mengurupi bangsa Israel sini Kerajaen Utara i.

⁸Tapi mula ipakkè Rajai ngo tong, ibelli Dèbata ngo i italuken musuh tukasi pè mahantu tenterra Rajai janah berrani. Ai pellin Dèbata ngo kessa merkuasa maing mennang barang talu.”

⁹“Tapi bakunè nola mo tersèngèt karina pirak sienggo kuberèken bai kalak i?” nina si Amazia mengkusoi. Ialoi nabi i mo, “Ndorok ngo ibalikken JAHOWA bai Rajai, lebbih dari pada i!”

¹⁰Kumarna i ibebasken si Amazia mo tenterra upahen i janah ipasulak balik mi nagerrina. Balik mo kalak i, tapi ibagasen ukur melaga kalohon.

¹¹Iberraniken si Amazia mo mengarahken tenterrana mi Napa Masin. Juhap mo kalak i i sidi, ibunuh mo 10.000 kalak Edom i.

¹²Itaban mo 10.000 kalak nai. Iarahken mo kalak i mi babo delleng batu i kuta Sela, nai ipengonjemken mo mi terruh asa matè.

¹³Ningan bagidi tenterra Israel sinipasulak si Amazia balik i siso nipadiatna dekket mergeraha, enggo menjuhap kuta Juda silot i perkelangen Samaria dekket Bet-Horon. Ibunuh kalak i ngo 3.000 kalak janah mbuè itaban harta.

¹⁴Enggo kessa italuken kalak Juda tenterra Edom, iembah si Amazia ngo gana-gana sembahen kalak Edom janah ibaing i Juda. Nai ilakati mo dahupa taba gana-gana i nai isembah mo.

¹⁵Melaga mo JAHOWA midah ulah-ulahna i. Ipasulak mo sada kalak nabi mendahi si Amazia, mendokken, “Kasa isembah Rajai sembahen bangsa sidèban siso ndorok paluahken bangsana i kuasa Rajai nai?”

¹⁶“Diam”, nina si Amazia mengaloi. “Mula oda, kubunuh kami mo ko. Oda nung kupebangkit kami kono gabè pemeddahi raja.” Nai sip mo nabi i, tapi sanga ngo idokken, “Enggo kubettoh bagèndari magahken enggo itetapken Dèbata lako membinasaken Rajai kumarna oda isarihken Rajai sipesèngètku.”

¹⁷Mertaki mo si Amazia raja Juda dekket penasèhatna mengalo Israel. Ipasulak mo utusenna mendahi si Joahas kempu si Jehu lako mengasangisa mergeraha.

¹⁸Tapi itennahken Raja Joas mo pengaloina bagèen, “Tikan sikali idokken tada-tada sini delleng Libanon mo ranana mendahi kayu sempènur, ‘Alè kayu Arès, berrèken mo berrumu i gabè sinibages anakku.’ Tapi mentas mo arap i sada binatang rambah, idedohi mo tada-tada i.

¹⁹Merkato mo ko alè Amazia kumarna italuken ko kalak Edom, tapi lotien ngo kono ndong-ndong sambing i bagesmu. Man kadèmu mencari-cari perselisihen pellin lako mencilakai dirimu dekket ginemgemmu?”

²⁰Tapi oda isarihken si Amazia raja Juda rana si Joas raja Israel i. Tapi enggo bagi harkat Dèbata asa talu si Amazia i, kumerna enggo mersembah ia taba gana-gana kalak Edom.

²¹Kumarna i berkat mo si Joas mi Bet-Semes janah juhap mo dekket si Amazia i sidi.

²²Italuken mo tenterra Juda janah mperrus mo kalak i karina balik mi bagesna gennep.

²³Itangkup si Joas mo si Amazia janah iembah mi Jerusalem, nai irumpakken mo dingding batu kuta i kira-kira 200 mèter geddangna, mulai i Pèntu Pengkeruhen Efraim nai soh mi Pèntu Pengkeruhen Soki.

²⁴Karina emmas dekket pirak bak karina perkekkas sijumpasa i Bages JAHOWA dekket silot ipennep si Obed-Edom, bagi ma harta silot i istana rebbak dekket barang piga kalak jelma itaban si Joas mi Samaria.

²⁵Enggo kessa matè si Joas raja Israel, nggelluh dèng ngo si Amazia 15 tahun nai.

²⁶Kessa itadingken si Amazia JAHOWA, lot mo mertaki mengalosa i Jerusalem. Kumarna i, mperrus mo ia mi kuta Lakhis, tapi iletlet musuhna mo ia soh mi si, nai ibunuh mo ia. Ikudaken mo bangkèna mi Jerusalem, nai ikuburken mo mi perkuburen raja-raja i Kuta si Daud. Sukuten sidèbanna i tersèngèt Raja Amazia mulai i benna soh mi ujung pemerèntahenna isurat ngo ibas Tori-torien Raja-raja Juda dekket Israel.