Read Batak Dairi 2 Kronika 26 Bible Online

2 Kronika 26 - Batak Dairi bible

2 Kronika 26

¹Enggo kessa matè si Amazia, karina kalak Juda memilih si Uzia anakna i gabè raja. Merumur 16 tahun mo ia tikala i. Inangna mergerar si Jekholya, berru Jerusalem. I Jerusalem ngo si Uzia memerèntah 52 tahun dekkahna. Ia ngo mengerampasi dekket pekadèken nola mengolihi kuta Elot.

⁴Bagè bapana ma ngo si Uzia mengulaken sipesampangken atè JAHOWA.

⁵Si Zakharia ngo pemeddahi pertendien bana. Sidekkah nggelluh, burju ngo si Uzia mersembah taba JAHOWA, gabè ipasu-pasu JAHOWA ia.

⁶Mergeraha mo si Uzia mengalo kalak Palistin. Irumpakken mo pagar batu kuta Gat, Jabne dekket Asdod, nai ipajek nola mo kuta gotting i gembar Asdod dekket i nagerri Palistin.

⁷Iurupi Dèbata ngo ia menaluken kalak Palistin dekket menaluken kalak Arab simerian i Gur-Baal bak kalak Meunim.

⁸Menggarar belasting ngo kalak Amon taba si Uzia. Makin merkuasa mo ia, sanga termurmur soh mi Mesir.

⁹Lako pegottingken kuta Jerusalem, ipajek si Uzia ngo palas i Pèntu Pengkeruhen Soki, i Pèntu Pengkeruhen Napa, dekket i èluk pagar batu.

¹⁰Ibahan dèng ma ngo palas merbèntèng kan bekkas jampalen, janah ikurak mbuè telaga kemulihken mbuè kalohon pinakanna i delleng bang i napa pè kan kesunduten. Kumarna lot ngo ukurna mi peruma-uma, gabè toko ngo buèna pengulana memuka pekken anggur kan delleng dekket mengula tanoh kan bekkas-bekkas nggabur.

¹¹Lahlah ngo soridadu si Uzia sienggo kebbas lako geraha. Ibaing ngo kalak i merkelompok janah bilangenna isurat penurat raja sidua kalak i, imo si Jeiel dekket si Maaseya siniuluken si Hananya.

¹²Karinana persinjata i 307.500 kalak janah iuluken 2.600 kalak lubalang. Mahantu ngo kalak i mergeraha mengurupi raja lako menaluken musuh.

¹⁴Lengkap ngo mertambeng-tambeng karina soridadu i ibaing si Uzia, bagi ma merkujur, mertangkuluk waja, merbaju bessi, merpanah dekket batu arimbalang.

¹⁵I Jerusalem enggo ibahan pandè sinjata perkekkas sindorok petèngkenken anak-anak panah dekket batu-batu mbellen i palas idi nai dekket i soki pagar batu kuta i nai. Termurmur ngo si Uzia barang i dikè sambing, janah gabè merkuasa kalohon mo ia kumarna iurupi Dèbata ia.

¹⁶Enggo kessa tuk gegoh bak kuasa si Uzia, gabè ndates mo ukurna, janah imo makin perdoyongna. Ilausi mo perèntah JAHOWA Dèbatana, kumarna ibengketti Bages JAHOWA lako mengelakati dahupa i babo langgaten.

¹⁷Tapi Imam Azarya dekket 80 kalak imam sidèbanna i simergegoh janah berrani, mengèkutkensa lako mengalo pemahanna i.

¹⁸Idokken kalak i mo, “Alè Raja nami! Oda ndorok Rajai mengelakati dahupa bai JAHOWA. Pellin ulaen imam-imam pemparen si Aron ngo kessa i, ai kalak i ngo mahanken i. Naing mo nemmu itadingken Rajai bekkas simbadia èn. Mengalo JAHOWA Dèbata ngo enggo Rajai, gabè oda nèngè ipasu-pasu podinken èn.”

¹⁹Tikanna i enggo cènder si Uzia i gembar langgaten perdahupaen i Bages JAHOWA menjèmak perkekkas mengelakati dahupa. Melaga mo ia taba imam-imam i, keppè sintempu mo sempa bana sakit kolit i abèna i mpiah kalohon.

²⁰Tersengget mo si Azarya dekket imam-imam sidèbanna i simenengensa, nai igegohi kalak i mo asa ndor itadingken Bages JAHOWA i. Isudu mo laus, kumarna JAHOWA ngo menghukumsa.

²¹Soh matè Raja Uzia laju ngo oda nè malum sakitna i. Ikèrèng mo ia i sada bages janah oda ipadiat nèngè memengketti Bages JAHOWA. Ipaluahi ma mo ia ibas karina ulanna nai, gabè anakna si Jotam mo memerèntah sikira wakilna.

²²Sukuten sidèban tersèngèt pemerèntahen Raja Uzia enggo isuratken Nabi Jesaya anak si Amos.

²³Matè kessa ia, ikubur mo i tanoh ndessing mi perkuburen raja-raja, tapi oda ngo ibas perkuburen i sendiri, kumarna koliten ntengam kalohon ia. Anakna si Jotam mo mbangkit raja singkatna.