Read Batak Dairi 2 Kronika 27 Bible Online

2 Kronika 27 - Batak Dairi bible

2 Kronika 27

¹Merumur 25 tahun ngo si Jotam tikan mbangkit raja ia janah 16 tahun ngo dekkahna ia memerèntah i Jerusalem. Inangna i mo si Jerusa berru si Zadok.

²Bagè si Uzia bapana i ngo si Jotam pesennangken atè JAHOWA. Pellin menutung dahupa i Bages JAHOWA ngo kessa oda iulaken bagè pemaing bapana. Tukasi pè bagi, tong ngo mengulaken dosa ukum sinterrem i.

³Si Jotam ngo memahan Pèntu Pengkeruhen kan Utara Bages JAHOWA, dekket petegguhken pagar Jerusalem kan bekkas simergerar Ofel.

⁴Ipajek ma ngo mèduk kuta kan delleng Juda dekket bèntèng bak pantar penatapen i rambah-rambah i pè.

⁵Ijuhap janah italuken ngo raja Amon rebbak dekket soridaduna, nai ipaksa mo kalak Amon i menggarar belasting. Hojor sidekkah tellu tahun kennah menggarar ngo kalak i 3.400 kilo pirak, dua matcam gandum ter 1.000 ton.

⁶Nai makin merkuasa mo si Jotam kumarna tettap iuèi JAHOWA Dèbatana.

⁷Sidèban i dèng simasa tikan pemerèntahen si Jotam, pergerahanken dekket pengkakapna karina, enggo tersurat ibas bukku Tori-torien Raja-raja Israel bak Juda.

⁸Merumur 25 tahun ngo si Jotam tikan mbangkit raja ia janah 16 tahun ngo dekkahna ia memerèntah i Jerusalem.

⁹Matè mo ia janah ikuburken i Kuta si Daud, nai anakna si Ahas mo mbangkit raja singkatna.