Read Batak Dairi 2 Kronika 28 Bible Online

2 Kronika 28 - Batak Dairi bible

2 Kronika 28

¹Merumur 20 tahun ngo si Ahas mbangkit raja janah 16 tahun dekkahna ia memerèntah i Jerusalem. Oda ngo ièkutken codien merandal sinibaing si Daud empungna i, tapi mengulaken nggogo atè JAHOWA ngo.

²Bagè raja-raja Israel ngo pernggelluhna, janah idokken ngo asa ibahan gana-gana Baal ipas logam nai,

³ninganna menutung dahupa i lembeng Hinom. Anakna sendiri ipèlèken mahan pèlèen taba sembahen, mengèkutken kecemmalen merroha kalak sienggo ipelaus JAHOWA i nagerri Kanaan nai, sinderrang ibengketti kalak Israel nagerri i.

⁴Ipèlèken si Ahas ngo pèlèen dekket menutung dahupa i bekkas-bekkas mersembah taba sembahen i delleng dekket i terruh kayu ntemtem.

⁵Kumarna merdosa Raja Ahas, gabè ibelli JAHOWA Dèbata mo ia italuken raja Siria dekket menaban mbuè kalohon kalak Juda mi Damaskus. Ibelli JAHOWA dèng ma ngo ia italuken Raja Pekah anak si Remalya i Israel nai, sanga ibunuh 120.000 soridadu Juda ibagasen sidari. Ibelli JAHOWA, Dèbata empung kalak i pè masa karina i, kemulihken oda isarihken kalak Juda nèngè ngo JAHOWA.

⁷Ibunuh si Zikhri ngo sada kalak lubalang Israel imo anak si Ahas mergerar si Maaseya. Ibunuh si Zikhri ma ngo si Azrikam pengurus istana raja dekket si Elkana kettoken raja i.

⁸Tukasi pè kalak Juda i sisada ngo dekket kalak Israel, tapi itaban soridadu Israel ngo 200.000 daberru dekket anak-anak, janah iembah mi Samaria rebbak dekket mbuè kalohon harta taban-tabanen.

⁹Lot mo sada kalak nabi JAHOWA merian i Samaria mergerar si Oded. Tikan balik soridadu Israel merembah taban-taban, isimbaki si Oded mo kalak i, tikan naing mbengket mi kuta kalak i. Nina mo, “Italuken kènè pè enggo kalak Juda kumernaken melaga ngo JAHOWA, Dèbata empung ndènè i taba kalak i. Tapi idengkoh JAHOWA ngo bakunè kejam ndènè memunuh tenterra Juda i.

¹⁰Bagèndari naing ibaing kènè ngo kalak Jerusalem dekket Juda mahan hamba ndènè. Oda ngo ibettoh kènè, merdosa ngo kènè taba JAHOWA Dèbata ndènè?

¹¹Dengkohken kènè mo! Kaka-anggi ndènè ngo sinitaban ndènè èn. Pasulak kènè mo kalak idi balik. Mula oda, melaga mo JAHOWA janah ihukum mo kènè.”

¹²Empat kalak simpantasniasè janah kalak Israel, imo si Azarya anak si Johanan, si Berekhya anak si Mesilemot, si Jehizkia anak si Salum dekket si Amasa anak si Hadlai pè dekket ngo mengalo pemaing soridadu simulak i.

¹³Idokken kalak i mo, “Ulang embah kènè sitertaban i mi sèn. Enggo merdosa kita taba JAHOWA, janah enggo mbelgah dosanta èn lako hukumen. Bagèndari pè dak naing ibaing kènè nola dèng ma ngo pellin lako menambahi kesalahenta.”

¹⁴Nai isohken soridadu i mo jelma sitertaban bak harta taban-taban i taba sinterrem i bak pengulu-pengulu kalak i.

¹⁵Nai kèkè mo simpantas siempat kalak i perèsoken sitertaban i. Ibagiken kalak i mo oles taban-taban i bai kalak sitertaban simemerlukensa. Cipatu pè ibagiken kalak i ma ngo, bak pangaen dekket ènumen. Siugahen idauni dekket minak zaitun. Sienggo ndotè merdalan, ibaing kalak i mi babo kalodè, nai iarahken mo karina sitertaban i mi Jeriko, kuta kurma, asa terbaing kalak i molih mi bagesna i Juda. Enggo kessa i, balik mo kalak Israel mi Samaria.

¹⁶Kalak Edom pè enggo mulai menjuhap Juda janah enggo mèduk jelma itaban. Kumarnaken i ipidoken si Ahas mo taba si Tiglat-Pileser raja Assur, asa itenges pengurupi.

¹⁸Tikanna bagi, kalak Palistin pè enggo menjuhap kuta silot i pispis delleng sikan kesunduten dekket sikan selatan Juda. Itaban kalak i mo kuta Bet-Semes, Ayalon dekket Gederot bak kuta Sokho, Timna, dekket Gomzo dekket sosor i sikuliling sitellu kuta i, janah iiani mo i.

¹⁹Kumarna itadingken si Ahas raja Juda ngo JAHOWA janah oda iperèntah ginemgemna bakunè patutna, gabè ipesempa JAHOWA mo kesusahen idi i Juda.

²⁰Roh pè raja Assur oda ngo lako menampati si Ahas, tapi lako menusahisa ngo.

²¹Terpaksa mo ibuat si Ahas emmas i Bages JAHOWA nai bak i istana nai bagi ma dekket i bages pengulu-pengulu nai, nai iberèken mo i bai raja Assur. Tapi idi pè oda merlapaten bana.

²²Ipas kesusahen simasa i, makin merdosa ngo si Ahas taba JAHOWA.

²³Ipesempa ngo cilaka mi dirina dekket ginemgemna merkitè memèlèken pèlèen taba sembahen kalak Siria sienggo menalukensa. Dok atèna, “Sembahen kalak Siria enggo mengurupi kalak Siria. Jadi mula kupèlèken pèlèen bana, katèngku isampati ngo aku.”

²⁴Nai ibuat mo karina perkekkas i Bages JAHOWA nai, ireppuki mo i. Nai ikonci mo Bages JAHOWA janah ipajek mo langgaten i suberri Jerusalem.

²⁵I gennep kuta bak sosor i Juda ibahan mo bekkas mersembah taba sembahen, penutungen dahupa bai bègu sembahen bangsa sidèban. Merkitè bagidi mo memaingken melaga JAHOWA, Dèbata empungna i tabasa.

²⁶Sukuten sidèban tersèngèt pemerèntahenna dekket karina ulah-ulahna i mulana nai soh mi ujungna enggo isurat ibas bukku Tori-torien Raja-raja Juda dekket Israel.

²⁷Matè mo si Ahas, janah ikubur i Jerusalem, tapi oda i perkuburen raja-raja. Anakna si Hizkia ngo mbangkit raja singkatna.