Read Batak Dairi 2 Kronika 29 Bible Online

2 Kronika 29 - Batak Dairi bible

2 Kronika 29

¹Merumur 25 tahun ngo si Hizkia tikan mbangkit ia gabè raja Juda, janah 29 tahun dekkahna ia memerèntah i Jerusalem. Inangna mergerar si Abia berru si Zakharia.

²Pesampangken atè JAHOWA ngo ibahanken si Hizkia bagè Raja Daud empungna i.

³I bulan sada tahun perlebbè pemerèntahenna ipedalngah si Hizkia mo pèntu Bages JAHOWA janah idokken mo jelma lako pekadèken balik.

⁴Idokken mo imam-imam dekket kalak Lewi mertumpu i kasèan kan kebincaren Bages JAHOWA i,

⁵nai mengerana mo ia taba kalak i i sidi, nina mo, “Alè kènè kalak Lewi, kennah manihan ngo diri ndènè baing kènè bai JAHOWA, janah uras kènè mo Bages JAHOWA, Dèbata empung ndènè i. Karina simemaing samur bages i, kennah ipesisi.

⁶Empungta i oda setia taba Dèbatanta i janah iulaken kalak i ngo simaing nggogo atèNa. Oda isarihken kalak i ia janah oda iparduliken bekkasna merian i.

⁷Ikonci kalak i ngo pèntu Bages JAHOWA, janah iènteppi ngo pelitana. Oda nèngè ilakati kalak i dahupa i Bages JAHOWA janah oda nèngè ipèlèken pèlèen situtungen bai Dèbata sinisembah karina kalak Israel.

⁸Nai ihukum JAHOWA mo ibagasen lagaNa kalak Juda dekket Jerusalem. Karina ngo kènè bettoh-bettohen, bakunè tersenggetna bak terkèrjutna kalak karina midah penghukum JAHOWA i.

⁹Mermatèen ngo partuanta i perjuhapen janah itaban ngo partua ibages bak dukak-dukakta.

¹⁰Bagèndari naing merpadan ngo aku dekket JAHOWA, Dèbata kalak Israel, asa ulang punguren nèngè Ia midah kita.

¹¹Kènè alè pa, ulang mo tonja kènè nèngè, ai kènè ngo ipilih JAHOWA lako mersembah dekket menguèi baNa ninganna menutung dahupa bak menguluken jelma nterrem lako mersembah.”

¹²Kalak Lewi simertumpu tikanna i imo: I horong si Kehat nai: Si Mahat anak si Amasai, dekket si Joel anak si Azarya I horong si Merari nai: Si Kis anak si Abdi dekket si Azarya anak si Jehaleleel I horong si Gerson nai: Si Joah anak si Zima dekket si Eden anak si Joah I horong si Elisafan nai: Si Simri dekket si Jeiel I horong si Asaf nai: Si Zakharia dekket si Matanya I horong si Heman nai: Si Jehiel dekket si Simei I horong si Jedutun nai: Si Semaya dekket si Uziel

¹⁵Nai ipedèmpu kalak i mo kalak Lewi sidèbanna i dèng, menguras mo kalak i karina. Enggo kessa i, tosè bagè perèntah raja, mbengket mo Imam-imam mi Bages JAHOWA janah imulai kalak i menguras bages i mengèkutken pati-patien JAHOWA. Karina simengelamuni iembah kalak i mo mi ruar mi kasèan Bages JAHOWA. I sidi nai iembah kalak Lewi mo mi Lembeng Kidron i ruar kuta i.

¹⁷Ulaen i imulai ari sada bulan sada. I ari ualuh, pul mo enggo kalak i menguras karina kasèan Bages JAHOWA soh mi bilik kan lebbè. Nai ualuh ari nai ma kalak i menguras bages i, karina soh pul i ari sipuluh ennem bulankenna i.

¹⁸Nai ibagahken kalak Lewi i mo mbang Raja Hizkia, “Enggo dung kuuras kami Bages JAHOWA i dekket langgaten pemèlèen situtungen, mèja bekkas roti hantaren dekket karina perkekkasna.

¹⁹Enggo ma ngo kubuat kami mengolihi perkekkas sinipeduru Raja Ahas tikala oda nè isarihken ia JAHOWA tikan pemerèntahenna. Karina perkekkas i enggo kukelini kami nola bai JAHOWA, janah enggo mo i lebbè langgaten i bagèndari.”

²⁰Oda pella merpèma ndekkah, mèter ipepulung Raja Hizkia mo simpantasniasè, nai rebbakken laus mo kalak i mi Bages JAHOWA.

²¹Iembah kalak i mo 7 lembu tonggal, 7 biri-biri tonggal, 7 anak biri-biri dekket 7 kambing bajar mahan pèlèen kesasaen dosa simpangaen raja dekket karina Juda bagi ma dekket menguras Bages JAHOWA. Idokken raja i mo taba imam-imam pemparen si Aron lako memèlèken pinakan i i babo langgaten mahan pèlèen situtungen.

²²Isembellih kalak i mo lembu i nai ipis-pisken imam-imam i mo darohna mi langgaten. Biri-biri sipitu i pè bagi ma ngo ibaing kalak i, dekket anak biri-biri sipitu i.

²³Perpodi ibuat kalak i mo kambing i, iiring mo mendahi raja dekket karina sinterrem i sienggo tupung mersembah i sidi, nai karina mo kalak i mengampèken tanganna mi babo kambing i.

²⁴Enggo kessa bagi isembellih imam-imam mo kambing i janah iorèken mo darohna mi langgaten i mahan pèlèen kesasaen dosa karina ginemgem. Ibaing kalak i pè bagi, kumarna enggo iperèntahken raja i asa ibaing pèlèen situtungen dekket pèlèen kesasaen dosa, karina kalak Israel.

²⁵Tosè bagè sinipeddahken JAHOWA mbang si Daud merkitè Nabi Gad simengula bai raja i dekket merkitè Nabi Natan, idokken raja i mo kalak Lewi i Bages JAHOWA lako merkucapi dekket merganderrang,

²⁶bagè pemaing Raja Daud. Imam-imam pè i sidi ma ngo ibaing mersarunè.

²⁷Ibaing si Hizkia mo pertanda asa imulai acara memèlè. Tikan mulai ipèlèken pèlèen i, karina mo sinterrem i mengèndèken pemojien bai JAHOWA, janah karina peroning-oning menempul sarunè dekket oning-oningen sidèbanna i dèng.

²⁸Nai sujud mo Raja Hizkia dekket karina jelma silot i si menembah JAHOWA ninganna perendè terrus merendè dekket peroning-oningen i pè terrus meroning-oning soh kerri pèlèen i itutung.

³⁰Idokken raja dekket simpantasniasè mo kalak Lewi mengendèken pemoji-mojien bai JAHOWA imo endè sinikarang si Daud dekket Nabi Asaf. Karina mo kalak i merendè ibagasen lolo atè ninganna tetèun janah menembah Dèbata.

³¹Enggo kessa i, idokken si Hizkia mo, “Kumarna enggo ipepellin kènè manihan bai JAHOWA, kennah merembah pèlèen ngo kènè mi Bages JAHOWA mahan pèlèen lias atè.” Nai karina jelma simertumpu i sidi merembah pèlèen i, janah lot ma ngo merembah pinakan ibas sinienjar ukurna nai mahan pèlèenken kira pèlèen situtungen.

³²Iembah kalak i mo 70 lembu tonggal, 100 biri-biri dekket 200 anak biri-biri, nai ipèlèken mo i mahan pèlèen situtungen bai JAHOWA.

³³Iembah kalak i dèng ma ngo 600 lembu tonggal dekket 3.000 biri-biri lako ipèlèken dekket ipangan rebbakken karina simertumpu i sidi.

³⁴Imam sienggo menguras dirina cituksu ngo lako memebak karina pinakan i. Kumarna i iurupi kalak Lewi mo kalak i, kumarna bujuren ngo kalak Lewi menguèi hatoren pengurasen. Dak tong ngo kalak i mengurupi mèma cukup imam sienggo menguras dirina.

³⁵Laènken pèlèen situtungen i, ipèlèken imam-imam i dèng ma ngo pessoh-pessoh pèlèen lias atè sinipangan jelma nterrem i. Ipèlèken kalak i ma ngo dekket anggur, iorèken rebbak pèlèen situtungen i. Bagi mo iulaken kalak i nola perpulungen mersembah i Bages JAHOWA.

³⁶Lolo ngo atè Raja Hizkia dekket ginemgemna kumarna ibagasen sigejap sambing enggo iurupi Dèbata kalak i mengulaken karinana i.