Read Batak Dairi 2 Kronika 3 Bible Online

2 Kronika 3 - Batak Dairi bible

2 Kronika 3

¹Enggo kin ngo itentuken Raja Daud kennah i Jerusalem i Delleng Moria bekkas pengeriken si Arauna kalak Jebusi ngo ipajek Bages JAHOWA i. Itebenai Raja Salomo mo memahan Bages JAHOWA,

²i bulan dua tahun peempatken pemerèntahenna i.

³Ukum henjur Bages i 27 mèter ngo janah bekkangna 9 mèter.

⁴Henjur bilik kan lebbè dos ngo mi bekkang Bages i, imo 9 mèter. Datesna 54 mèter. Kan bagasen ilampis ngo dekket emmas pelangki.

⁵Bilik utama idingding ngo dekket papan kayu arès simerandalna kalohon, janah ilampisi ma ngo i dekket emmas ntua. Ipas lampis emmas i iokir ngo bagè gombaren kayu nèur dekket gomabaren rantè.

⁶Itiktik raja i dèng ma ngo Bages i dekket permata mendè kalohon bak dekket emmas sinitennahken roh i Parwaim nai.

⁷Emmas bagidi ma ngo ibaing lako mengelampis dingding Batu Bages JAHOWA i, bang balok-balokna, perhabang pèntu dekket pèntuna. Dingding batu i iokir dekket gombaren kerub.

⁸Bilik kan bagasen sinigerarenna bilik Simbadia kalohon, 9 mèter ngo hunjurna janah 9 mèter ma ngo bekkangna, dos mi bekkang Bages i. Duapuluh ton emmas ibaing mengelampis dingding Bilik Simbadia Kalohon i,

⁹janah 570 gram emmas mahan labang. Bilik sikan tèngkat babo pè ilampisi ngo dekket emmas.

¹⁰Idokken raja i ma ngo tukkangna i memahan dua gana-gana kerub ipas suasah nai. Ilampis ma ngo dekket emmas bang gana-gana i janah ipecènder pedessing i Bilik Simbadia Kalohon, mendempak mi pèntu. Gennep kerub i dua ngo kabengna meradu ter 2,2 mèter geddangna. Ngkèrbang ngo kabeng i gabè pedais mo pucuk kabengna i i tengah bilik i janah punca kabeng sisada nai soh ngo 9 mèter geddangna, dos mi bekkang bilik i.

¹⁴Ibahan ma ngo kirè-kirè i Bilik Simbadia kalohon ipas kaèn linen nai dekket kaèn sidèban meratah, mbèrèng bak mbara. Kirè-kirè i pè itiktik ma ngo mergombaren kerub.

¹⁵Ibaing raja i dèng ma ngo dua binangun, datesna gennep 15,5 mèter, nai ipecènder mo i lebbè Bages JAHOWA. Duana binangun i lot ngo takalna 2,2 mèter datesna.

¹⁶Bagian kan babo binangun i itiktik dèng ma ngo dekket tembaga bagè pesangkut rantè rumangna dekket 100 perbuah ndalima.

¹⁷Ipecènder mo binangun i i kacimbang lambung pèntu mbengket mi Bages JAHOWA i; sikan selatan igerari Jakhin bak sikan utara igerari Boas.