Read Batak Dairi 2 Kronika 30 Bible Online

2 Kronika 30 - Batak Dairi bible

2 Kronika 30

¹Ukum pèsta Paskah oda dèng terulaken kalak i tupung i tikkina i bulan sada kumara cituksu bilangen imam sienggo menguras dirina janah madèng mèduk kalak i pulung i Jerusalem. Kumarna i Raja Hizkia bak pugabè-pugabèna dekket pengisi Jerusalem mersada arih, asa ipèstaken Pèsta Paskah i bulan dua, janah mersampang atè ngo kalak i karina kumernaken perarihen i. Nai itengesken raja i mo surat mendahi karina jelma i suberri Israel dekket Juda. Bagi ma mendahi kalak Efraim bak Manasye. Karina bangsa Israel i nagerri marga Dan sikan utara soh mi Bersyeba i selatan, idilo ngo asa roh mi Bages JAHOWA i Jerusalem lako memèstaken Paskah dekket pesangapken JAHOWA Dèbata kalak Israel bagè sienggo ihatorken ibas bukku pati-patien si Musa. Madèng nung ipèstaken Pèsta Paskah bagidi.

⁶Iperèntahken raja i mo asa ipasulak pasulakken mi suberri Juda dekket Israel lako menaruhken surat i, katana bagèen, “Alè kènè karina kalak Israel! Enggo maluah kènè ibas kuasa kalak Assur nai. Bagèndari pè kennah mo nemmu mengolihi nola kènè menguèi JAHOWA, Dèbata sinisembah si Abraham, si Isak, dekket si Jakob, asa iurupi nola kènè.

⁷Ulang mo bagè empung ndènè i dekket bagè Israel sidèbankenna i, siso setia taba JAHOWA Dèbatana. Enggo idah kènè bakunè mberrat hukumen sinibaingna menghukum kalak i.

⁸Ulang mo jèngèng bagè kalak i, tapi uèi mo JAHOWA. Roh mo kènè mi Jerusalem, mi Bages JAHOWA sienggo ipilih JAHOWA Dèbata ndènè baNa soh mi amman sumendah. Roh mo kènè mersembah tabasa asa mentadi lagaNa taba kènè.

⁹Mula balik kènè menguèi JAHOWA, gabè masèh mo atè kalak simenaban kadè-kadè ndènè i janah asa ipaduè kalak i mulak. Ai Dèbata permasèh atè ngo JAHOWA Dèbata ndènè i; ijalo nola ngo kènè mula balik kènè mendahisa.”

¹⁰Tikan soh pasulakken i mi kuta sininagerri marga Efraim dekket Manasye sakat mi utara mi nagerri marga Zebulon, itaba-tabai janah ilèai ngo kalak i.

¹¹Tapi lot ma mo dèba marga Asyer, Manasye dekket Zebulon uè roh mi Jerusalem.

¹²I Judea pè mengula ngo Dèbata lako pesadaken ukur sinterrem asa tuhu-tuhu menguèi lemmo atè Dèbata merkitè menguèi perèntah raja dekket pasulakkenna i.

¹³I bulan dua, mertumpu mo nterrem kalohon ginemgem i Jerusalem lako memèstaken Ari Pèsta Roti Oda Meragi.

¹⁴Karina langgaten silot i Jerusalem sinibaingna kin lako memèlèken pèlèen dekket menutung dahupa taba sembahen, irumpakken janah iambongken mi Lembeng Kidron.

¹⁵I ari sipuluh empat bulankenna i, isembellih kalak i mo biri-biri asa ipèlèken gabè pèlèen Paskah. Imam-imam dekket kalak Lewi simadèng menguras gabè mèla kalohon mo. Menguras mo kalak i asa ndorok memèlèken pèlèen situtungen i Bages JAHOWA.

¹⁶Karina kalak i mersidahi bekkasna i Bages JAHOWA i mengèkutken sienggo itentuken ibas bukku Pati-patien si Musa. Iberèken kalak Lewi mo daroh pèlèen i taba imam-imam, nai iorèken kalak i mo mi langgaten.

¹⁷Nterrem ngo sipulung i madèng menguras dirina, nai oda mo ndorok kalak i menèat biri-biri pèlèen Paskah i. Kumara i gabè kalak Lewi mo menèat lako bai kalak i dekket memèlèken bai JAHOWA.

¹⁸Laènkenna i, mèduk ngo merrohen kalak Efraim, Manasye. Isakhar dekket Zebulon, oda lebbèen menguras dirina. Jadi ipèstaken kalak i pè Paskah i oda ngo mengèkutken hatoren. Kemulihkenna i, isodipken Raja Hizkia mo kalak i, nina mo,

¹⁹“Ialè JAHOWA Dèbata sinisembah empung nami, ampuni mo kalak i ibagasen mendè basaMu sienggo mersembah taba kono ibas pusuh peratènna nai, tukasi pè madèng iuras kalak idi karina.”

²⁰Idengkoh JAHOWA ngo sodip si Hizkia. Iampuni mo kalak i.

²¹Pitu ari dekkahna mersampang atè kalak simerpulung i Jerusalem i merpèsta Roti Oda Meragi. Gennep ari ngo kalak Lewi dekket imam-imam mertuhu-tuhu memoji JAHOWA.

²²Pandè kalohon ngo kalak Lewi i menguluken mersembah taba JAHOWA i, sanga ipoji si Hizkia kalak i. Enggo kessa pitu ari dekkahna kalak i kipangani pangaen ibas pèsta i ninganna memèlèken pèlèen mendokken lias atè bai JAHOWA, Dèbata empung kalak i,

²³gabè karina mo kalak i mendokken asa iterrusken pèsta i pitu ari nai ibagasen sampang atè.

²⁴Iberèken Raja Hizkia mo 1.000 lembu tonggal dekket 7.000 biri-biri. Pugabè si Hizkia memerèken 1.000 lembu tonggal dekket 10.000 biri-biri. Karina pinakan i iberèken bai jelma nterrem asa isembellih janah ipangan. Meduk kalohon ngo imam menguras dirina.

²⁵Karina kalak Juda, imam-imam, kalak Lewi dekket kalak siroh i utara nai, bang kalak sidèban sienggo merian i Israel dekket i Juda, sennang iakap.

²⁶Rami kalohon ngo kuta Jerusalem, kumerna kessa nai tikki si Salomo anak raja Daud, madèng nung masa bagidi.

²⁷Imam-imam dekket kalak Lewi mengido asa ipasu-pasu JAHOWA jelma nterrem i, nai idengkohken Dèbata ngo sodip kalak idi i sorga nai, janah iuèi pengidoenna i.