Read Batak Dairi 2 Kronika 31 Bible Online

2 Kronika 31 - Batak Dairi bible

2 Kronika 31

¹Enggo kessa pul pèsta i, berkat mo karina ginemgem i mi karina kuta silot i Juda, ireppuki mo karina gana-ganaen irumpakken mo karina mèjan sinibahan bai Asyera janah igeppui mo karina langgaten bak bekkas mersembah taba sembahen. Bagi ma ngo tong ibaing kalak i i bekkas sidèban i Juda dekket nagerri Benjamin, Efraim dekket Manasye. Enggo kessa i, balik mo kalak i mi bekkasna gennep.

²Ipetettah Raja Hizkia nola mo nuhnuhen imam-imam bang kalak Lewi mengèkutken perbagi ulanna. Ulaen i imo: Memèlèken pèlèen situtungen dekket pèlèen perdamèen, mengkebasi acara mersembah i Bages JAHOWA dekket memoji bak mendokken lias atè bai JAHOWA i piga-piga bekkas ibas Bages JAHOWA.

³Iberèken raja i ngo pinakan mahan pèlèen situtungen gennep ceggen bak gennep mboen mahan pèlèen sinipèlèken gennep ari Sabat, tikan Pèsta Peltak Bulan dekket pèsta-pèsta sidèban bagè sienggo itentuken ipas hatoren JAHOWA.

⁴Nai dèng ma idokken raja i mo asa karina pengisi Jerusalem merembah pèlèen sienggo itentuken bai imam-imam dekket kalak Lewi asa ndorok kalak i merèken ukurna mengkebasi ulaen i bages JAHOWA bagè sienggo tersurat ibas hatoren JAHOWA.

⁵Enggo kessa itingtingken perèntah i, itaruhken kalak Israel mo mi Bages JAHOWA pemerèken kalak i ipas hasil perlebbè i jumana nai, imo topong, anggur, minak zaitun, tenggoli dekket sidèbanna i dèng. Itaruhken kalak i dèng ma ngo sipersipuluh bagian i milikna nai.

⁶Karina kalak simerian i kuta Juda menaruhken sipersipuluh lembuna dekket biri-birina, bagi ma mbuè kalohon pemerèken sidèbanna dèng, nai ipèlèken mo i karina bai JAHOWA, Dèbata kalak i.

⁷Pemerèken i mulai ipentaruhken bulan tellu nai, janah terrus merrohen soh bulan pitu.

⁸Mengidah pemerèken bagi buèna, ipesangap Raja Hizkia dekket pengurupina mo JAHOWA janah ipoji mo kalak Israel bangsaNa i.

⁹Sinderrang mengeranai raja i dekket imam-imam bak kalak Lewi tersèngèt pemerèken i,

¹⁰idokken Imam Huntuen Azarya pemparen si Zadok mo, “Kessa nai ipentaruhken sinterrem i pemerrèkenna mi Bages JAHOWA, oda nèngè kurangen pangaen kami, gabè lebbih nola ngo tupèh, ai mbuè ngo enggo persediaen nami. Karinana i kujalo kami kumerna enggo ipasu-pasu JAHOWA bangsaNa i.”

¹¹Iperèntahken raja i mo, asa ipèmaken kalak i langgih i gembar Bages JAHOWA,

¹²nai ipennep kalak i mo karina pemerèken bak pèlèen i ibas langgih i. Sada kalak Lewi mergerar si Konanya idokken gabè penjaga, anggina si Simei mo ibaing pengurupina.

¹³Pendengani kalak i lot dèng ngo sipuluh nai kalak Lewi sidèban imo, si Jehiel, si Azazya, si Asael, si Jerimot, si Jazabad, si Eliel, si Jismakhya, si Mahat dekket si Benanya. Karina i itetapken merkitè peddah Raja Hizkia dekket Imam Huntuen Azarya.

¹⁴Si Kore anak si Jimna, sada kalak Lewi ia kin ngo kepala pertaram i Pèntu Mbengket kan kebincaren mi Bages JAHOWA, ia mo mertanggung jabab menjalo pemerèken sinipèlèken bai JAHOWA dekket memella-mellaken.

¹⁵I kuta sidèbanna i bekkas imam-imam, lot ngo pengurupi si Kore, tong ma ngo kalak Lewi, imo: Si Eden, si Minyamin, si Jesua, si Semaya, si Amarya dekket si Sekhanya. Karina pangaen i ibagi dos ngo bai marga Lewi, tah tua-tua pè barang narih poso dèng mengèkutken ulaen kalak i.

¹⁶Karina anak laki simerumur tellupuluh tahun mi babo, simengula gennep ari i Bages JAHOWA, iberrèken ngo perbaginna mengèkutken ulanna gennep dekket mengèkutken nuhnuhenna.

¹⁷Imam-imam isurati ngo mengèkutken horongna, janah kalak Lewi simerumur 20 tahun mi babo isurat mengèkutken ulanna bak nuhnuhenna.

¹⁸Karina ngo kalak i isurat rebbak dekket sinibages bak dukak-dukakna, dekket tah lot dèng sidèban i bagesna, kumarna kennah kebbas ngo kalak i gennep tèk lako mengulaken ulanna sienggo tertentu bai JAHOWA.

¹⁹Imam-imam simerian ibas kuta sienggo itentuken i pemparen si Aron nai barang pè i jampalen i gembar kuta i, enggo ipebangkit kalakna simemagiken pangaen bai karina anak laki dekket simpangaen imam, bagi ma bai karina kalak sienggo tersurat gerarna ipas marga Lewi.

²⁰Adil ngo ibaing Raja Hizkia i suberri Juda, ntèger bak pesampangken atè JAHOWA Dèbatana.

²¹Ndorok iulaken i karina, kumarna ibahanken i lako mi Bages JAHOWA barang lako menguèi pati-patien JAHOWA, mertuhu-tuhu ngo ipedalan ibas pusuh peratèenna nai dekket ngkelleng atèna bai JAHOWA Dèbatana.