Read Batak Dairi 2 Kronika 32 Bible Online

2 Kronika 32 - Batak Dairi bible

2 Kronika 32

¹Enggo kessa iulaken Raja Hizkia simenuduhken kebujurenna bai JAHOWA, ijuhap si Sanherib raja Assur mo Juda. Ikubu mo kuta gotting janah iperèntahken taba soridaduna asa itaban kuta i.

²Terbertik kessa mo bai si Hizkia lot niat si Sanherib menjuhap Jerusalem,

³rebbakken mo ia bak pengurupina dekket lubalang-lubalangna merarih asa ipètut tapien siniruar kuta asa ulang lot laè dapet kalak Assur i mula soh kalak i mi gembar Jerusalem. Nterrem kalohon ngo jelma idokken memètut mata laè simenjarir mi ruar kuta.

⁵Nai ipetegguh raja i mo pertahanen kuta merkitè ipelias pagar batu sidèbanna kan ruar. Nai dèng ma ipetegguh ma mo bèntèng sinibahan i babo tanoh tèmbunen kan kebincaren kuta lama Jerusalem. Idokken ma mo iteppa mbuè kalohon kujur dekket tambeng-tambeng.

⁶Ipebangkit mo lubalang-lubalang mahan èkuten karinana anak laki silot ibagasen kuta janah idokken ngo kalak i asa pulung i kasèan i lebbè pèntu pengkeruhen kuta i. Nai nina mo taba kalak i,

⁷“Ulang kènè mbiar janah tok mo; ulang buradan midah raja Assur barang pè midah tenterrana. Ndaoh ngo mergegohen kita daripada kalak i.

⁸Jelma ngo gegohna, tapi ukum kita lot ngo JAHOWA Dèbatanta mengurupi kita dekket mergeraha lako banta.” Mendengkoh rana i gabè berrani mo jelma nterrem i.

⁹Nai sinderrang i Lakhis dèng si Sanherib dekket soridaduna, ipasulak mo suruhenna mendahi si Hizkia dekket ginemgem Juda i Jerusalem lako pesakatken tennah èn.

¹⁰“Aku si Sanherib raja Assur, mengkusoi kadè memaingken asa bagidi berrani ndènè tong merian i Jerusalem sienggo terkubu i.

¹¹Tah mada ngo idokken si Hizkia, terbaing JAHOWA Dèbata ndènè i paluahken kènè ipas kuasa nami nai? Ulang kettoki kènè i, ai pellin menipu kènè ngo ia. Ibelli mo kènè matè melèhè dekket matè muasen.

¹²Ia ngo mencèdai bekkas mersembah bak langgaten bai JAHOWA, nai pellin i sada langgaten nai sambing mo kessa idokken taba kalak Juda dekket Jerusalem mersembah dekket menutung dahupa.

¹³Oda ibettoh kènè dèng bakunè kubaing dekket ibaing empungku taba bangsa-bangsa sidèban? Oda nung dèng sembahen bangsa sidèban i paluahken bangsana i kuasa raja Assur nai.

¹⁴Isè lot bai kalak i nai pennah maing bagidi? Oda terbaing sembahen ndènè i paluahken kènè.

¹⁵Ulang belli kènè raja ndènè i menipu dekket mengoto-ngotoi kènè! Ulang tok kènè bana! Ai oda pennah lot barang sembahen bangsa siapaina pè sanggup paluahken bangsana ipas kuasa raja Assur nai. Sembahen ndènè i pè pasti oda terbaingsa paluahken kènè!”

¹⁶Matcam dèng ngo bagèna rana iruapken pasulakken Assur i lako mengeleai JAHOWA Dèbata dekket si Hizkia, naposo JAHOWA i.

¹⁷Itengesken raja Assur dèng ma ngo sada surat mengasangi JAHOWA, Dèbata sinisembah Israel, bagèen ngo kata surat i, “Karina sembahen bangsa sidèban i oda lot terpaluahsa bangsana i kuasangku nai.”

¹⁸Nggang ngo idilo-diloken pasulakken Assur i karina kata i ipas kata Heber lako mencubiari dekket peteruhken semangat kalak Jerusalem silot i babo pagar batu kuta i, asa murah dok atèna itaban kalak i kuta i.

¹⁹Irana-ranaken kalak i ngo tersèngèt Dèbata sinisembah i Jerusalem dos bagè tersèngèt sembahen bangsa sidèban i, imo gana-gana sinibahan tangan jelma.

²⁰Nai mersodip mo Raja Hizkia dekket Nabi Jesaya anak si Amos. Dilo-dilo mo kalak i mido pengurupien bai Dèbata.

²¹Nai ipasulak JAHOWA mo sada kalak malaèkat memunuhi soridadu dekket lubalang-lubalang Assur i. Mèla kalohon mo iakap raja Assur i balik mi nagerrina. Tikan sidari tikala ibagasen bages sembahenna ia, roh mo dèba dukak-dukakna sendiri memunuhsa merkitè peddang.

²²Bagi mo carana JAHOWA paluahken Raja Hizkia dekket pengisi Jerusalem ipas kuasa si Sanherib raja Assur i nai dekket ipas musuh-musuh kalak i sidèbankenna i nai. Iberèken JAHOWA ngo bai kalak i nggelluh sennang oda lot iganggu kerajaen cibal baleng kalak i.

²³Toko ngo buèna jelma roh mi Jerusalem merembah pèlèen taba JAHOWA bagidi ma pemerèken kalak i bai si Hizkia, gabè ipesangap karina bangsa mo ia kessa nai simasa i.

²⁴Oda ndekkah ibas simasa i nai cioen mo Raja Hizkia. Mpiah kalohon ngo sakitna i enggo sanga naing-naing matè ia. Mersodip mo ia, nai iberèken JAHOWA mo pertanda bana magahken malum ngo iakap.

²⁵Tapi kumarna ndates ukurna, oda mendokken lias atè ia kumarna permalumna ibaing JAHOWA i. Kumernaken i melaga mo JAHOWA taba Juda dekket Jerusalem.

²⁶Tapi ujungna gabè ipecerrep si Hizkia dekket kalak Jerusalem nola mo ukurna, nai sidekkah nggelluh dèng si Hizkia, oda dèng saut idabuh hukum i.

²⁷Nai gabè bèak kalohon mo Raja Hizkia janah ipesangap karina jelma. Ibahan mo mbuè bilik bekkas memennep hartana, emmas, pirak, batu-batu permata, rempah-rempah, tambeng-tambeng dekket harta maharga sidèbankenna i.

²⁸Langgihna pè mbuè ngo bekkas hasil tanohna, imo gandum, anggur dekket minak zaitun; bagi ma kandang bekkas lembu dekket biri-birina simbuè kalohon i.

²⁹Laènkenna i ipajek ma ngo mbuè kuta. Mertinèncuk ngo kinibèak iberèken Dèbata bana.

³⁰Raja Hizkia èn mo simenambak mata laè Gihon, janah ipejarir mo laè i arap baruren tanoh sinitembuk mi bagasen kuta Jerusalem. Karina siniulaken si Hizkia menjadi ngo.

³¹Jadi tikan roh pasulakken i Babel nai lako mengkuso tersèngèt kelengangen permalumna i, ibelli JAHOWA mo si Hizkia memahanken barang bakunè dok atèna, lako mengoji perukurenna.

³²Sukuten sidèbanna dèng tersèngèt Raja Hizkia, dekket ngkelleng atèna taba JAHOWA, isurat ngo ibas bukku Alamat bai Dèbata nai taba Nabi Jesaya anak si Amos dekket ibas bukku Tori-torien Raja-raja Juda dekket Israel.

³³Matè mo si Hizkia, nai ikubur mo i rebbèen i tanoh perkuburen raja-raja. Karina ginemgem Juda dekket Jerusalem maing penghormaten mbellen tabasa tikan matè i ia. Anakna si Manasye mo mbangkit raja singkatna.