Read Batak Dairi 2 Kronika 33 Bible Online

2 Kronika 33 - Batak Dairi bible

2 Kronika 33

¹Merumur 12 tahun ngo si Manasye tikan mbangkit ia gabè raja Juda janah 55 tahun dekkahna ia memerèntah i Jerusalem.

²Merdosa ngo ia taba JAHOWA kumarna ièkutken kecemmalen jahat bangsa-bangsa sinipuaren JAHOWA i Kanaan nai tikan ibengketti kalak Israel nagerri i.

³Bekkas mersembah taba sembahen sienggo irumpakken bapana si Hizkia, ipajek nola mengolihi. Ibahan ma ngo langgaten-langgaten bekkas mersembah taba Baal janah igana ma ngo gana-gana Asyera, bak isembah ngo bintang-bintang.

⁴Enggo idokken JAHOWA kin, soh mi amman sumendah ngo Jerusalem bekkas mersembah tabasa, tapi i Bages JAHOWA sinisidi, enggo ipecènder si Manasye langgaten-langgaten bai sembahen.

⁵Ipecènder langgaten i sidua kasèan Bages JAHOWA i mahan bekkas mersembah taba bintang-bintang.

⁶Dukakna pè ipèlèken gabè pèlèen situtungen i Lembeng Hinom. Iulaken ma ngo ulaen kinangguruen, merkatika, sibalik mata dekket mengido ajar bai tendi-tendi nai. Merdosa kalohon ngo ia taba JAHOWA, mendungkul laga JAHOWA.

⁷Gana-gana sembahen ibaing mi Bages JAHOWA, keppèken tersèngèt bekkas i enggo kin idokken Dèbata taba si Daud bak anakna si Salomo, “BagesKu sini Jerusalem èn, sienggo Kupilih ipas sipuluh dua nagerri marga Israel nai, imo bekkas sienggo Kutentuken mahan bekkas mersembah taba Aku soh mi amman sumendah.

⁸Mula iuèi kalak Israel karina ranangKu dekket ièkutken pati-patien sienggo iberèken si Musa naposongKu i bai kalak i, oda Kupadiat kalak i ipuari i nagerri sienggo Kuberèken bai empung kalak idi nai.”

⁹Si Manasye ngo memaing kalak Juda merdosa, imo dosa jahaten dèng daripada dosa siniulaken bangsa-bangsa sienggo ipuari JAHOWA i Kanaan nai tikan ibengketti bangsa JAHOWA nagerri i.

¹⁰Ipesèngèt JAHOWA ngo si Manasye dekket ginemgemna i, tapi oda uè kalak i mendengkohken.

¹¹Kumara i ibaing JAHOWA mo roh pakalima tenterra Assur lako menjuhap Juda. Itangkup mo si Manasye merkitè kait-kait, nai irantè mo janah iembah mi Babel.

¹²Ibagasen kinidersa ipecerrep mo ukurna taba JAHOWA Dèbata, mersodip mo ia mengido pengurupiNa.

¹³Iuèi Dèbata ngo sodip si Manasye, iolihken mo ia mi Jerusalem lako memerèntah. Kumara i gabè percaya mo si Manasye, JAHOWA ngo Dèbata.

¹⁴Nai ipedates si Manasye mo pagar batu ruar kan kebincaren Kuta si Daud. Itebenai ia mo isada lembeng i gembar takal Laè Gihon nai, nai soh mi Utara mi Pèntu Pengkeruhen Ikan dekket mi deba kuta sinigeraren kuta Ofel. I gennep kuta si merbèntèng si Lot i Juda, ibakin ngo isi sada kalak pakalima.

¹⁵Ipesisi ia mo gana-gana sembahen bangsa sidèban dekket gana-gana sienggo ibaing kin i Bages JAHOWA. Irontasken mo langgaten-langgaten sembahen si lot i uruk Bages JAHOWA, dekket i bekkas sidèbanna i Jerusalem. Karinana i iembah mo mi ruar kuta, nai iambongken mo.

¹⁶Nai ipelias mo langgaten bekkas mersembah taba JAHOWA, nai ipèlèken mo i si pèlèen perdamèen dekket pèlèen lias atè. Idokken mo taba karina kalak Juda asa mersembah taba JAHOWA Dèbata kalak Israel.

¹⁷Memèlè dèng ngo jelma nterrem i i bekkas sidèban, tapi memèlè bai JAHOWA ngo.

¹⁸Sukuten sidèbanna i tersèngèt si Manasye dekket tersèngèt dosana taba Dèbata dekket tennah Dèbata sinipesakat nabi-nabi bana merkitè gerar JAHOWA Dèbata kalak Israel; enggo isurat ibas karina bukku Tori-torien Raja-raja Israel.

¹⁹Ibas Bukku Tori-torien Nabi-nabi enggo isurat sodip si Manasye dekket pengaloi Dèbata i sodipna i, dekket sukuten tersèngèt dosa-dosana sinderrang madèng mertobat ia, bagi ma bekkas mersembah taba sembahen dekket gana-gana Asyera siniganana dekket gana-gana sinisembahna.

²⁰Matè mo si Manasye janah ikuburken i istana. Anakna si Amon mo mbangkit raja singkatna.

²¹Merumur 22 tahun ngo si Amon tikan mbagkit ia gabè raja Juda janah dua tahun dekkahna ia memerèntah i Jerusalem.

²²Tosè bagè bapana ia pè merdosa ngo taba JAHOWA. Isembah ngo sembahen sinisembah bapana janah memèlè ngo ia taba sembahen i.

²³Tapi, laènna bai bapana nai, imo si Amon oda uè pecerepken ukurna janah oda uè mulak mendahi JAHOWA; gabè merdosaen dèng ngo ia daripada bapana.

²⁴Mertaki ngo pengurupi Raja Amon lako mengalosa, gabè ibunuh mo ia i istana.

²⁵Tapi ibunuh kalak Juda ngo simemunuh Raja Amon i, nai ipebangkit kalak i mo anakna si Josia gabè raja.