Read Batak Dairi 2 Kronika 34 Bible Online

2 Kronika 34 - Batak Dairi bible

2 Kronika 34

¹Merumur 8 tahun ngo si Josia tikan mbangkit ia gabè raja Juda, janah 31 tahun dekkahna ia memerèntah i Jerusalem.

²Pesampangken atè JAHOWA ngo ibahanken; ièkutken ngo codien Raja Daud empungna i, iuèi ngo karina hatoren Dèbata ipas nasa gegohna.

³Enggo kessa ualuh tahun ia mbangkit raja, poso kalohon dèng pè umurna, imulai si Josia ngo mersembah taba Dèbata sinisembah empungna raja Daud. Empat tahun nai nola icèdai mo bekkas mersembah taba sembahen, gana-gana Asyera dekket sidèbanna i dèng.

⁴Mèjan dekket gana-gana i ireppuki parangen si Josia, nai ihamburken mo abuna mi babo kuburen kalak simemèlèken pèlèen taba gana-gana i. Langgaten Baal bekkas karina langgaten perdahupaen silot i sidi irumpakken kalak i.

⁵Nai itutung si Josia mo tulan-tulan imam-imam simengkebasi gana-gana i i babo langgaten i. Merkitè bagidi enggo ndorok nola kalak Juda dekket Jerusalem mersembah taba JAHOWA.

⁶Ibaing ma ngo tong bagi i mbuè kuta bak aur sienggo nggeppu i nagerri Manasye, Efraim dekket Simeon, soh mi Naptali i Utara.

⁷Karina langgaten dekket gana-gana Asyera i suberri kerajaen Utara irumpakken si Josia, nai ireppuki mo gana-gana bak langgaten dahupa. Nai mulak mo si Josia mi Jerusalem.

⁸I tahun peualuh-belasken pemerèntahen si Josia, enggo mpanting ipais bekkas mersembah taba sembahen i Bages JAHOWA, bak i suberri nagerri, ipasulak mo tellu kalak lako peliasken Bages JAHOWA Dèbata. Sitellu kalak i, imo si Azalya, si Maaseya gubèrnur Jerusalem dekket si Joah anak si Joahas, sada kalak perpangkat ndates.

⁹Iberèken kalak Lewi simenjaga Pèntu Bages JAHOWA mo kèpèng sienggo ipepulung kalak i bai Imam Huntuen Hilkia. Bai kalak Efraim dekket Manasye bak kalak sidèbanna i Kerajaen Utara nai ngo kèpèng i, bagi ma dekket kalak Juda, Benjamin dekket kalak Jerusalem nai.

¹⁰Nai iberèken Imam Huntuen Hilkia nola ma mo kèpèng i taba sitellu kalak sienggo terdokken memperdimata peliasken Bages JAHOWA i. Nai iberèken kalak i ma mo kèpèng i,

¹¹bai tukkang asa itokorken mi batu dekket kayu lako peliasken bages sienggo ibelli raja-raja Juda i ncèda.

¹²Bujur ngo karina kalak sipeliasken i. Empat kalak Lewi mo menguluken kalak i, imo si Jahat dekket si Obaja i horong si Merari nai, bak si Zakharia dekket si Mesulam i horong si Kehat nai. Kalak Lewi sipandè meroning-oningen ibaing memanduri sipetaruh

¹³perkayu, menguluken tukkang i mermatcam bagè ulaen, menurati dekket menjaga pèntu.

¹⁴Tikan ipedarat kèpèng pemèrèken i bekkas pemeneppenna nai, mèter idah si Hilkia mo bukku Pati-patien JAHOWA, imo pati-patien siniberèken Dèbata taba si Musa.

¹⁵Nina si Hilkia mo mbang si Safan, “Enggo dapet aku bukku Pati-patien JAHOWA i Bages JAHOWA nai,” nai iberèken mo bukku i taba si Safan.

¹⁶Ijalo si Safan mo bukku i, nai laus mo ia mendahi raja i idokken mo, “Karina siniperèntahken raja i enggo kuulaken kami.

¹⁷Enggo kubuat kami kèpèng sinipennep i Bages JAHOWA janah kuberèken kami taba tukkang bak mandur-mandurna.”

¹⁸Enggo kessa i idokken dèng ma, “Iberèken si Hilkia ngo taba aku bukku èn.” Nai ijakaken si Safan mo bukku i bai raja i.

¹⁹Mendengkoh isi bukku i, iribaki raja i mo pakènna kumarna melui ukurna.

²⁰Nai iperèntahken raja i mo bagèen taba si Hilkia, si Ahikam anak si Safan, si Abdon anak si Mika, si Safan penurat kerajaen dekket si Asaya bagahen raja.

²¹“Lakè mo mengkusoi JAHOWA lako bangku dekket lako bai kalak silotna dèng i Israel dekket Juda tersèngèt isi bukku èn. Ai punguren pè JAHOWA taba kita kumernaken oda iuèi empungta ngo perèntahna sitersurat i bagasenna.”

²²Nai laus mo si Hilkia, si Ahikam, si Abdon, si Safan dekket si Asaya mengido peddah mendahi sada kalak daberru mergerar si Hulda. Sada kalak nabi ngo ia simerian i perkutaen rembaru i Jerusalem. Sinibalèna mergerar si Salum anak si Tikwa kempu si Harhas. Ia ngo mengurus pakèen lako mersembah i Bages JAHOWA. Enggo kessa idengkoh si Hulda keterangen kalak i,

²³ipasulak mo kalak i mulak mendahi raja i lako magahken tennahna bagèen, “Bagèen ngo idokken JAHOWA, Dèbata sinisembah kalak Israel,

²⁴‘Kuhukum mo Jerusalem dekket karina jelma pengisina bagè sumpah sitersurat ibas bukku sienggo ijakaken bai raja i.

²⁵Enggo itadingken kalak i aku janah ipèlèken kalak i ngo pèlèen bai dèbata sidèban. Karina ulah-ulah kalak i mendungkul lagangku. Melaga ngo aku midah Jerusalem, janah oda nèngè terpemalap lagangki.

²⁶Tapi tersèngèt raja Josia, bagèen mo tennahku JAHOWA Dèbata kalak Israel: Idengkoh kono kessa sitersurat ibas bukku i,

²⁷peselsel ngo kono janah ipecerrep kono dirimu i hadeppenku. Enggo kuasup menghukum Jerusalem dekket jelma pengisina i, tapi idengkoh kono kessa asupku i, tangis ngo ko ninganna iribaki ko olesmu kumarna melui. Enggo kudengkoh sodipmu,

²⁸kumarna i, oda dèng kudabuh hukum mi Jerusalem, sidekkah nggelluh dèng kono. Kupaduè ngo kono matè i bagasen damè.’ ” Balik mo pasulakken i mendahi raja magahken tennah i.

²⁹Idilo Raja Josia mo karina pengulu-pengulu Juda bak Jerusalem,

³⁰nai laus mo ia rebbak dekket kalak i mi Bages JAHOWA. Rebbak dekket kalak i, engket ma ngo imam-imam, kalak Lewi dekket karina sinterrem, sibèak bang sincor pè. I hadeppen kalak i karina, i gembar binangun sinibahan bai raja, cènder mo raja i, ijakaken mo karina isi bukku perpadanen sienggo teridah i Bages JAHOWA i dekket sora nggang. Nai merpadan mo raja i dekket JAHOWA, magahken tunduk tabasa dekket mengulaken ibas nasa pusuh peratèenna nai dekket nasa penarihenna nai, karinana perèntah dekket pati-patinNa, dekket mengulaken karina hatoren perpadanen JAHOWA dekket bangsaNa bagè sitersurat ibas bukku i.

³²Karina kalak Benjamin dekket karina sidèbanna dèng silot i Jerusalem idokken merbulaban lako menguèi perpadanen i, imo perpadanen kalak i dekket Dèbata empung kalak idi.

³³Karina gana-gana sipemoyangken atè silot i bekkas sitermasuk nagerri kalak Israel, ireppuk Raja Josia. Nai idokken mo taba ginemgemna asa kennah mersembah taba JAHOWA, Dèbata empung kalak i. Jadi sidekkah nggelluh si Josia, hot ngo setia ginemgem i bai JAHOWA.