Read Batak Dairi 2 Kronika 35 Bible Online

2 Kronika 35 - Batak Dairi bible

2 Kronika 35

¹Nai ipèstaken si Josia mo Pèsta Paskah i Jerusalem lako pesampangken JAHOWA. Biri-biri pèsta i isembellih ari 14 bulan sada.

²Ibagiken si Josia mo bai imam-imam bahaen sikennah bahanken i Bages JAHOWA janah idokken taba kalak i asa iulaken selloh.

³Kalak Lewi sienggo ipilih bai JAHOWA dekket sigabè guru bai kalak Israel iperèntahken si Josia bagèen, “Baing kènè mo Pèti Perpadanen simbadia i mi Bages JAHOWA sinipajek Raja Salomo anak si Daud. Ulang nèngè ompat-ompat kènè. Kebbasi kènè mo Dèbata ndènè dekket bangsa Israel bangsaNa i.

⁴Kebbas mo kènè i Bages JAHOWA mengèkutken horong-horong ndènè, rembang bagè perbagi ulaen sinitetapken Raja Daud dekket Raja Salomo anakna i.

⁵Atur mo nuhnuhen ndènè i asa dak lot bai ndènè nai sindorok mengurupi horong kalak Israel i Bages JAHOWA.

⁶Kennah kènè ngo menembellih biri-biri i pèsta Paskah. Kumara i dak kebbas mo kènè asa ndorok tettap menembah JAHOWA, janah kebbasi kènè ma mo dekket pèlèen sikennah pèlèenken bai JAHOWA, asa merkitè bagidi, kalak Israel sidèbankenna i ndorok mengulaken sinihatorken JAHOWA merkitè si Musa.”

⁷Asa ndorok karina jelma siroh mi pèsta Paskah i memèlèken pèlèen Paskah, iberèken Raja Josia mo i pinakanna nai 30.000 biri-biri, anak biri-biri dekket anak kambing, bak 3.000 lembu tonggal.

⁸Pugabè-pugabè si Josia pè iberrè ma ngo pemerrèkenna bai imam-imam dekket kalak Lewi i suberri aur nai. Perkebbas kesakaten ulaen i i Bages JAHOWA, imo Imam Huntuen Hilkia, si Zakharia bak si Jehiel, iberrèken kalak i sitellu mo 2.600 anak biri-biri bak anak kambing dekket 300 lembu tonggal mahan pèlèen i pèsta i.

⁹Simenguluken kalak Lewi imo: Si Konanya, si Semaya dekket si Netaneel sincelketna, si Hasabya, si Jeiel, dekket si Jozabad, memereken taba kalak Lewi 5.000 anak biri-biri dekket kambing bajar bak 500 lembu tonggal mahan pakkèen ibas pesta idi.

¹⁰Enggo kessa hantar karina lako merpèsta Paskah, idahi imam-imam dekket kalak Lewi mo bekkasna gennep bagè sienggo iperèntahken raja.

¹¹Nai isembellih kalak i mo pinakan i lako mi pèsta Paskah i; ibebbak kalak Lewi mo janah ipispisken imam-imam mo daroh pinakan i mi babo langgaten.

¹²Gennep horong sisimpangaen siroh mi sidi terolih ngo tersada pinakan sinaing ipèlèken mahan pèlèen situtungen. Merkitè bagidi terbaing kalak i mo memèlèken tosè bagè hatoren sienggo tersurat ibas bukku Pati-patien si Musa.

¹³Nai ipanggang kalak Lewi mo pèlèen Paskah i i rara, tosè mi hatoren, janah ibelgang mo pèlèen simerkedekoen ibas saruam, koden, belanga, nai ipempellaken mo jukutna bai sinterrem.

¹⁴Enggo kessa i ikebbasi kalak Lewi nola mo lako bai kalak i sendiri dekket bai imam-imam pemparen si Aron. Ai soh berngin ngo imam-imam i memèlèken pinakan-pinakan mahan pèlèen situtungen dekket menutung pessoh-pessoh pinakan sipèlèenken i.

¹⁵Peroning-oningen i horong si Asaf i marga Lewi nai dak hot ngo i bekkas sienggo itentuken Raja Daud kin bai kalak i. Gerar-gerar kalak i imo: Si Asaf, si Heman dekket si Jedutun, imo sada kalak nabi simengula bai raja i. Simenjaga pèntu pengkeruhen oda pella itadingken bekkas kalak i, kumarna ndorok ngo kalak i memèstaken Paskah i bekkasna merkitè iurupi kalak Lewi sidèbankenna i.

¹⁶Sidarinkenna i, iulaken kalak i ngo karinana siniperèntahken Raja Josia lako merpèsta Paskah i, dekket pèlèen-pèlèen i langgaten.

¹⁷Pitu ari dekkahna, karina kalak Israel situmpu i sidi memèstaken Paskah Nditak Siso Meragi.

¹⁸Oda nung nè ipèstaken pèsta sibagidi kessa nai Nabi Samuel. Sada kalak poda lot raja i lebbènkena pennah memèstaken pèsta Paskah bagè sinipèstaken

¹⁹i tahun peualuh belasken pemerèntahen si Josia i, rebbak dekket imam-imam, kalak Juda dekket kalak Israel bak pengisi Jerusalem.

²⁰Enggo kessa pul iulaken si Josia karinana idi i Bages JAHOWA, iuluken si Nekho raja Mesir mo parangenna lako mergeraha i Karkemis ndessing mi Laè Efrat. Iusahaken si Josia ngo menondatisa,

²¹tapi itennahken si Nekho mo bagèen taba si Josia, “Ukum geraha ènda oda lot daisna bamu alè raja Juda. Oda ngo lako mengalo kono pekerohku èn, tapi lako mengalo musuhku ngo, janah Dèbata ngo pasulakken aku. Kan aku ngo Dèbata kumara i, ulang halangi aku, asa ulang ko nola ipetumpat.”

²²Tapi ijèngèngi si Josia ngo lako mengalo. Oda uè ia mendengkohken sinidokken Dèbata merkitè Raja Nekho. Isalih si Josia mo rupana, nai dekket mo ia mergeraha i sindèas Megido.

²³Kenna panah mo si Josia i perjuhapen i. Nai idokken mo taba naposoNa asa iembah ia karuar i perjuhapen i nai, kerna mbakat ngo ugahna i.

²⁴Idokong mo ia ipas kurètana nai mengelompat mi kurèta sidèban silot i sidi, nai iembah mo ia mi Jerusalem. Matè mo ia janah ikubur mi perkuburen raja-raja. Merhendem ngo karina kalak Juda dekket Jerusalem kemulihken permatèna i.

²⁵Ikarang Nabi Jeremia mo sada endè tangis milangi lako bai Raja Josia. Soh bagèndari iendèken daholi barang daberru dèng ngo endè idi i Israel, lako mernèngèt sm Josia ibagasen hendem. Enggo imasukken endè i mi pulungen endè-endè tangis milangi.

²⁶Sukuten sidèbanna dèng tersèngèt si Josia, tersèngèt ngkelleng atèna bai JAHOWA, bak penguèina pati-patien JAHOWA,

²⁷tersèngèt mi karina nggelluhna tupèh i mulana nai soh mi ujungna; enggo isurat ibas bukku Tori-torien Raja-raja Israel bak Juda.