Read Batak Dairi 2 Kronika 36 Bible Online

2 Kronika 36 - Batak Dairi bible

2 Kronika 36

¹Ipilih janah ipebangkit kalak Juda mo si Joahas gabè raja i Jerusalem sumingkat bapana si Josia.

²Merumur 23 tahun ngo si Joahas tikan mbangkit raja Juda ia, janah tellu bulan ngo dekkahna ia memerèntah i Jerusalem.

³Itaban si Nekho raja Mesir mo si Joahas janah iembah mi Mesir, nai idokken mo kalak Juda menggarar belasting 3.400 kilo pirak dekket 34 kilo emmas. Nai ipebangkit mo si Elyakim anggi si Joahas gabè raja. Igancihi mo gerar si Elyakim gabè si Joyakim. Nai itaban mo si Joahas mi Mesir.

⁵Merumur 25 tahun ngo si Joyakim tikan mbangkit ia gabè raja Juda, 11 tahun dekkahna ia memerèntah i Jerusalem. Merdosa ngo ia taba JAHOWA Dèbatana.

⁶Tikan italuken si Nebukadnezar raja Babel kerajaen Juda, itangkup mo si Joyakim, irantè janah iembah mi Babel.

⁷Iembah si Nebukadnezar ngo dèba barang-barang maharga i Bages JAHOWA nai janah ibaing mo mi istanana i Babel.

⁸Sukuten sidèbanna i dèng tersèngèt si Joyakim dekket ulah-ulahna siso kasèa bak kejahatenna; enggo isurat ibas bukku Tori-torien Raja-raja Israel dekket Juda. Anakna si Joyakhin mo mbangkit raja singkatna.

⁹Merumur 18 tahun ngo si Joyakhin tikan mbangkit raja ia i Juda janah 3 bulan sipuluh ari dekkahna ia memerèntah i Jerusalem. Ia pè merdosa ngo taba JAHOWA.

¹⁰Tikala pertukaren tahun itaban Raja Nebukadnezar ngo si Joyakhin mi Babel janah iembah ma mo barang-barang maharga i Bages JAHOWA nai. Nai ipebangkit si Nebukadnezar mo si Zedekia tonga si Joyakhin gabè raja Juda dekket Jerusalem.

¹¹Merumur 21 tahun ngo si Zedekia tikan mbangkit raja Juda i. Sebellas tahun dekkahna ia memerèntah i Jerusalem.

¹²Ia pè merdosa ngo taba JAHOWA Dèbatana. Oda uè ia pecerrepken ukurna janah oda uè ia mengèkutken tennah JAHOWA sinipesoh si Jeremia bana.

¹³Enggo kin ngo ipaksa Raja Nebukadnezar si Zedekia mersumpah merkitè gerar Dèbata mendokken kennah setia ia taba si Nebukadnezar. Tapi daoh-daoh arien, memberontak mo si Zedekia taba si Nebukadnezar. Jèngèng ngo si Zedekia taba JAHOWA, Dèbata kalak Israel. Oda uè ia menadingken dosana janah oda uè ia mulak mendahi JAHOWA.

¹⁴Dèba nai, dekket ngo Bages JAHOWA sienggo pellin bai JAHOWA kin ilamuni pengulu-pengulu Juda, imam-imam dekket sinterrem, kumarna kalak i pè dekket menembah gana-gana janah mengulaken bagè pernggelluh bangsa-bangsa simerdosa silot i sikuliling kalak i.

¹⁵Enggo pukpuk ipasulak JAHOWA Dèbata empung kalak i pasulakkenna mermulak molih lako pesèngètken ummatNa i, kumarna ngkelleng atèna midah kalak i dekket midah BagesNa i.

¹⁶Tapi ilèai kalak i ngo pasulakken Dèbata i janah itaba-tabai ngo nabi-nabiNa janah oda isarihken kataNa. Ujungna punguren mo JAHOWA taba kalak i gabè oda lot nè dalan keluahen kalak i ipas hukum nai.

¹⁷Idungkul JAHOWA mo ukur raja Babel asa ijuhap kalak i. Ibunuhi raja i mo kalak Juda siposona dèng, dekket kalak silot i bagasen Bages JAHOWA. Sada kalak poda masèh atèna, tua-tua barang poso dèng, daholi barang daberru, sakiten barang juah-juahen. Ipesakat Dèbata ngo kalak i taba raja Babel.

¹⁸Perkekkas Bages JAHOWA dekket barang-barangna simaharga, bak harta raja dekket pugabèna, irampasi raja Babel ngo karina janah iembah mi Babel.

¹⁹Irumpakken mo pagar batu kuta Jerusalem, nai ilekkup mo kuta i dekket Bages JAHOWA bak karina istana rebbak dekket barang-barang maharga silotna dèng ipas istana i.

²⁰Jelma simaluahna, itaban mi Babel. I sidi mo kalak i ihamba dekket ipacik pinemparna soh mi tikan kerajaen Persia merkuasa.

²¹Bagi mo saut masa bagè sienggo ibagahken JAHOWA kin merkitè si Jeremia, mendokken kennah terulang janah melongo nagerri i 70 tahun dekkahna, mahan gancih tahun Sabat siso isarihken kalak i.

²²I tahun perlebbè pemerèntahen si Kores raja Persia, ipesaut JAHOWA mo sinidokkenNa kin merkitè Nabi Jeremia. Idungkul JAHOWA mo ukur si Kores asa iperèntahken merkitè surat janah ijakaken i suberri kerajaenna. Bagèen ngo katana:

²³“En mo perèntah si Kores raja Persia. Enggo ipebangkit JAHOWA, Dèbata simerkuasa i sorga i aku mengerajai suberri dunia, janah mendokken taba aku asa kupajek bana bages i Jerusalem i nagerri Juda. Kumarna i, kènè karina alè bangsa Dèbata kennah molih mi sidi. Dak idengani JAHOWA Dèbata ndènè i mo kènè.”