Read Batak Dairi 2 Kronika 5 Bible Online

2 Kronika 5 - Batak Dairi bible

2 Kronika 5

¹Enggo kessa pul ibahan si Salomo Bages JAHOWA i, ipennep mo i gudang-gudang Bages i karina pirak, emmas dekket barang-barang sidèban sienggo ipèlèken si Daud bapana i bai JAHOWA.

²Enggo kessa bagidi idokken Raja Salomo mo karina pengulu-pengulu marga dekket kaum bangsa Israel mertumpu i Jerusalem lako mengelompat Pèti Perpadanen JAHOWA i Sion Kuta si Daud nai mi Bages JAHOWA.

³Nai merrohen mo kalak i karinana tupung ari raya Sapo-sapo Bulung.

⁴Enggo kessa tumpu karina èkuten i, idokong kalak Lewi mo Pèti Perpadanen i,

⁵janah iembah mo mi Bages JAHOWA. Undung-undung JAHOWA dekket karina perlengkapenna pè iompat imam-imam dekket kalak Lewi ma mo mi Bages JAHOWA.

⁶Dèmpu mo raja Salomo dekket karina sinterrem Israel mi lebbè Pèti Perpadanen i nai ipèlèken mo biri-biri dekket lembu bai JAHOWA, oda terkira buèna.

⁷Enggo kessa i, ipemasuk imam-imam i mo Pèti Perpadanen i mi bagasen Bages JAHOWA janah menggamparken i terruh gana-gana kerub i bagasen Bilik Simbadia kalohon.

⁸Ngkèrbang ngo kabeng gana-gana i mengkemkemmi Pèti i bak kayu perosongna.

⁹Nggeddang kalohon ngo kayu perosongen i, gabè teridah ngo puncana i lebbè Bilik Simbadia Kalohon i nai, tapi oda ngo teridah i ruar nai. (Soh sidari èn i si dèng ngo kayu i.)

¹⁰Oda lot kadè ibagasen Pèti Perpadanen i laènken dua batu lè i. Enggo kin ngo ipemasuk si Musa batu i mi sidi tikan i Delleng Sinai, tikan ibaing JAHOWA padan dekket bangsa Israel tikan i perdalanen i Mesir nai kalak i mi nagerri Kanaan

¹¹Karinana imam silot i sidi, i karina horong nai, enggo menguras dirina lako mi pèsta i. Karina perendè dekket peroning-oning marga Lewi nai, imo si Asaf, si Heman, si Jedutun dekket karina horong kalak i memakè pakèen linen. Cènder mo kalak Lewi kan kebincaren langgaten i ninganna menjèmak gung bak kucapi. Rebbak dekket kalak i lot ngo 120 kalak nai imam menempul sarunè. Endè simerendè i, ipèrebbak dekket persora sarunè, ganderrang dekket oning-oningen sidèban. Bagèen mo kata èndè pemojien siniendèken kalak i memoji JAHOWA: “Poji mo JAHOWA, kumerna mendè pemaingna. Hot ngo ngkelleng atèna.” Karuar kessa mo imam-imam i i Bages JAHOWA i nai sintempu mèter idomi cuhaya pekeroh JAHOWA mo Bages i, sanga oda terterusken kalak i acara pèsta i.