Read Batak Dairi 2 Kronika 6 Bible Online

2 Kronika 6 - Batak Dairi bible

2 Kronika 6

¹Mersodip mo raja Salomo, “Ialè JAHOWA, lemmoen ngo atèmu merian ibas hembun mehèjem i.

²Bagèndari kubahan baMu bages merandal, mahan bekkasMu soh amman sumendah.”

³Enggo kessa pul mersodip idempakken raja i mo taba jelma nterrem sicènder nisidi, nai ipido mo pasu-pasu Dèbata lako bai kalak i.

⁴Nina mo, “Arnia enggo ijandiken ko bai bapangku si Daud bagèen, ‘Kessa nai Kuuluken bangsangKu karuar i Mesir nai soh mi ari sidari èn, oda lot sada kuta pè i nagerri Israel Kupilih mahan bekkas ipajek sada bages mahan bekkas mersembah taba Aku, janah sada kalak poda Kupilih lako menguluken bangsangKu Israel. Tapi ukum bagèndari Kupilih ngo Jerusalem mahan bekkas mersembah taba Aku. Asa kono alè Daud, enggo Kupilih lako memerèntah bangsangKu.’ Nipoji mo JAHOWA Dèbata kalak Israel sienggo memahèi jandiNa i.”

⁷Idokken si Salomo dèng ma, “Enggo kin ngo mersura-sura bapangku si Daud lako memajek bages bekkas mersembah taba JAHOWA Dèbata kalak Israel.

⁸Tapi idokken JAHOWA ngo tabasa, ‘Selloh ngo sura-suramu i.

⁹Tapi oda ngo kono memajek bagesKu i, anakmu ngo.’

¹⁰Bagèndari enggo mo ipahèi JAHOWA jandiNa i. Enggo mbangkit aku raja Israel gabè sumingkat bapangku, janah enggo ma ngo kupajek bages bekkas mersembah taba JAHOWA, Dèbata kalak Israel.

¹¹Enggo kupèmaken i Bages JAHOWA i bekkas Pèti Perpadanen sin batu perpadanen JAHOWA dekket ummat Israel.”

¹²Enggo ma ngo ibahan si Salomo podium tembaga i tengah-tengah kasèan Bages JAHOWA i. Hunjur bak bekkangna 2,2 mèter, datesna 1,3 mèter. Mi podium i mo si Salomo i hadeppen jelma nterrem simertumpu i janah cènder mo ia mendempakken langgaten. Karina ngo jelma i ndorok mengidahsa. Nai jumèngkur mo ia, ipekèrbang mo duana tanganna mi langit ninganna mersodip.

¹⁴“Ialè JAHOWA Dèbata Israel. Oda lot bagè kono i langit bang i tanoh èn pè. Ipahèi kono ngo jandiMu janah ipacidah kono ngo masèh atèMu taba bangsaMu sidak setia janah menguèi baMu ipas karina pusuh peratènna.

¹⁵Enggo ipahèi kono jandiMu taba bapangku si Daud. Kadè sinijandikenmu i enggo ipesaut kono ari èn.

¹⁶Enggo ma ngo merjandi kono taba bapangku, mula tuhu-tuhu iuèi pinemparna pati-patinMu, bagè ia i, nai soh mi amman sumendah mo sada kalak ipas pinemparna nai memerèntah gabè raja i Israel. Bagèndari pè, alè JAHOWA Dèbata kalak Israel, pahèi ma mo karina sienggo ijandiken kono taba bapangku si Daud naposoMu i.

¹⁸Tapi alè Dèbata, tuhu ma ngo ndia uè kono merian i tanoh èn i tengah-tengah jelma manusia? Salang karina langit i kurang mbellang dèng ngo baMu, makinsa nola mo bages bekkas mersembah sikupajek èn.

¹⁹Alè JAHOWA Dèbatangku, naposolMu ngo aku. Kasi pè bagi dengkohken mo nemmu sodipku janah uèi mo pengidoenku èn.

²⁰Dak lenggemmi mo mahar ari berngin bages èn sienggo ipilih kono mahan bekkas mersembah baMu. Dak dengkohken mo i bekkasmu i sorga i nai janah ampuni mo aku bak kalak Israel bangsaMu, mula kuhadep kami bages èn janah mersodip taba kono.

²²Mula lot sada kalak itukas mersalah taba sidèban janah iembah mi langgatenMu mi bagasen BagesMu èn lako mersumpah, magahken oda ia mersalah,

²³alè JAHOWA, dengkohken mo i sorga nai janah kono mo memutusken perkara naposo-naposoMu èn. Hukum mo kalak simersalah janah paluah mo kalak siso mersalah.

²⁴Tah bakunè italuken musuhna bangsaMu Israel kumarna merdosa kalak i, nai peselsel mo ia janah mengolihi nola ipesangap kono alè JAHOWA, janah roh ia mi BagesMu èn mersodip mengido ampun baMu,

²⁵dengkohken mo kalak i, i sorga nai. Dak ampuni mo dosa bangsaMu èn janah arahken mo kalak i balik mi nagerri sienggo iberèken kono bai kalak i dekket bai empung kalak i.

²⁶Tah merdosa bangsaMu i taba kono janah ihukum ko kalak i merkitè oda roh udan, nai mertobat nola kalak i i dosana nai janah ipesangap kono sikira JAHOWAna, nai menghadep ia mi BagesMu èn janah mersodip taba ko,

²⁷alè JAHOWA sini sorga, dengkohken mo kalak i. Janah ampuni mo dosa naposoMu bangsa Israel. Ajari mo kalak i mengulaken sibennar. Enggo kessa bagi alè JAHOWA roh mo baing udan mi nagerrimu èn, nagerri sienggo iberèken kono bai bangsaMu gabè milikna soh mi amman sumendah.

²⁸Mula sempa lèhè mi nagerri èn, barang mula messeng suan-suanen kumarna angin nggara, ridap barang balang, barang pè tah ikubu musuhna bangsaMu, barang tah masa sakit,

²⁹dak dengkohken mo sodip kalak i. Mula lot bai bangsaMu Israel nai mersodip ibagasen bonek taba kono ninganna pekèrbangken tanganna dempak BagesMu èn,

³⁰dak dengkohken mo i bekkasmu i sorga nai janah ampuni mo kalak i. Pellin kono ngo kessa memettoh pikiren jelma. Kumara i baing mo taba gennep jelma tosè mi pemahanna,

³¹asa dak merkebiaren janah merpenguèi bangsaMu i baMu sidekkah merian kalak i i nagerri sienggo iberrèken ko taba empung nami.

³²Mula kalak sidèban i nagerri sindaoh mendengkoh tersèngèt kehejien dekket kegegohenMu, janah kono dak uè mengurupi, nai roh ia mi BagesMu èn lako mersodip taba kono.

³³Dak dengkohken mo sodipna i bekkasMu i sorga i nai, janah uèi mo sodipna i. Merkitè bagidi gabè karina bangsa i suberri dunia èn menandai kono janah menguèi bamu bagè bangsamu Israel. Gabè ibettoh kalak i mo, bages sikupajek èn ngo bekkas mersembah taba kono.

³⁴Mula ipèrèntahken kono bangsaMu berkat mergeraha, nai tah i dikè pè kalak i, mula menghadep kalak i mi kuta sinipilihMu èn janah mersodip mendempak bages sienggo kupajek baMu èn,

³⁵dak dengkohken mo sodip kalak idi i sorga nai, janah berèken mo kemenangen bai kalak i.

³⁶Mula tah merdosa bangsaMu taba ko — situhuna isè poda lot mak merdosa — nai kumarna lagaMu ibelli ko kalak i italuken musuh nai itaban janah iembah mi nagerri ndaoh barang ndessing,

³⁷katerra pè dengkohken mo sodip kalak i. Mula mentadi kalak i mengulaken dosa i nagerri ndèba i, nai mersodip ia taba ko ninganna magahken enggo merdosa kalak i janah mengulaken jahat, dak dengkohken mo sodip kalak i alè JAHOWA.

³⁸Mula tuhu-tuhu ngo itadingken dosana i nagerri i, janah mersodip taba ko ninganna mendempakken mi nagerri èn, sienggo iberrèken ko bai empung nami, mendempak mi kuta sinipilihMu bak bages bekkas mersembah sienggo kupajek baMu èn,

³⁹dengkohken mo i bekkasMu i sorga i nai sodip kalak i janah masèh mo atèmu midah kalak i. Sasa mo karina dosa bangsaMu i.

⁴⁰Bagèndari pè alè Dèbatangku jamoti mo kami janah dengkohken mo sodip sikusodipken kami taba kono i bekkas èn nai.

⁴¹Kèkè mo kono bagèndari alè JAHOWA Dèbata! Rebbak dekket Pèti Perpadanen sipacidahken kuasaMu i bengketti mo bagesMu èn janah merian mo ko i sèn soh amman sumendah. Pasu-pasu mo karina ulaen imam-imamMu, janah dak mersampang atè mo karina bangsaMu kumarna mendè ngo ibaing ko meradepken kalak i.

⁴²Ialè JAHOWA Dèbata, ulang mo pelaus raja sienggo ipilih kono èn. Dak èngèt mo ngkelleng atèMu midah naposomu si Daud i.”