Read Batak Dairi 2 Kronika 7 Bible Online

2 Kronika 7 - Batak Dairi bible

2 Kronika 7

¹Enggo kessa dung mersodip Raja Salomo, susur mo api i langit nai menutung pèlèen sinipèlèken bai JAHOWA i. Nai idomi cuhaya sangap JAHOWA mo Bages i,

²sanga oda terbengketti imam-imam i nèngè.

³Idah kalak Israel kessa mo api susur i langit nai dekket cuhaya sangap JAHOWA mendomi Bages JAHOWA i, tangkep mo kalak i mi hatap nai isembah janah ipoji mo JAHOWA kumarna merandal dekket hot ngkelleng atèNa soh mi amman sumendah.

⁴Enggo kessa i, ipèlèken Raja Salomo dekket karina simertumpu i sidi mo pèlèen bai JAHOWA.

⁵Mahan pèlèen perdamèen ipèlèken si Salomo mo 22.000 lembu dekket 120.000 biri-biri. Bagi mo pèsta menohken bages i ibaing si Salomo dekket karina jelma nterrem i taba JAHOWA.

⁶Cènder mo imam-imam i bekkas sienggo itentuken bai kalak i, pehadep dekket kalak Lewi simemoji JAHOWA merkitè oning-oning sinibahan Raja Daud, ninganna mengendèken endè, “Hot ngo ngkelleng atèNa soh mi amman sumendah!” bagè sienggo ihatorken si Daud. Isempul imam-imam i mo sarunè janah jelma nterrem i cènder karinana.

⁷Nai isohken si Salomo mo kasèan tengah sini lebbè bages i bai JAHOWA. Nai ipèlèken mo i sidi pèlèen situtungen, pèlèen gandum dekket pessoh-pessoh pinakan pèlèen perdamèen i. I sidi mo karina ipèlèken, kumarna kètèksu langgaten tembaga sienggo ibahan i, lako bekkas karinana pèlèen i.

⁸Merpèsta Sapo-sapo Bulung mo si Salomo dekket bangsa Israel pitu ari dekkahna. Nterrem kalohon ngo jelma merpulung lako merpèsta i. Merrohen ngo kalak i mulai i Dalan Hamat i utara nai soh mi perbalengen Mesir i selatan.

⁹Pitu ari ngo dekkahna kalak i merpulung lako pèsta mendom langgaten JAHOWA, nai pitu ari nai ma Pèsta sapo-sapo bulung. Tupung ari perpodi ibaing ma mo pèsta samsam bulung,

¹⁰janah sibarembenkenna imo ari 23 bulan pitu, idokken si Salomo mo jelma nterrem i molih. Lolo ngo kalak i karina kumernaken karina simendè sinibaing JAHOWA taba bangsa Israel bangsaNa i, dekket taba si Daud bak si Salomo.

¹¹Enggo kessa pul ibahan si Salomo Bages JAHOWA dekket istana raja tosè mi rencanana,

¹²ipacidah JAHOWA nola mo dirina taba si Salomo tikan berngin, nina JAHOWA mo mbangsa, “Enggo Kudengkoh sodipmu janah Kujalo mo bages èn mahan bekkas pellin memèlèken pèlèen bangKu.

¹³Mula oda roh Kubaing udan, barang mula Kutengesken balang mengkeriken suan-suaen i tanoh èn barang roh sakit masa taba bangsangKu,

¹⁴nai ipecerrep bangsangKu simemakkè gerarKu i dirina, janah mersodip ninganna roh mendahi Aku, janah mentadi ibas ulah-ulahna jahat nai, Kudengkohken mo sodipna idi i sorga nai. Kuampuni mo dosa kalak i, janah nduma mo kubaing mengolihi nagerri kalak i.

¹⁵Dak kuperdatèken mo BagesKu èn janah dak kudengkohken ngo karina sodip sinisodipken i bekkas èn nai.

¹⁶Karinana i Kubahanken kumerna enggo Kupilih bekkas èn gabè bekkas mersembah bangKu soh mi amman sumendah. Dak Kuperdatèken janah kulègenni ngo bages èn soh sidekkah-dekkahna.

¹⁷Mula bagè bapamu ma ngo kono, nggelluhmu mengèkutken lemmo atèngKu janah iuèi kono pati-patinKu bak iulaken kono karina perèntahKu bamu,

¹⁸Kupesaut mo jandingKu bai bapamu si Daud mendokken dak lot sada kalak i pinemparna nai gabè raja i Israel.

¹⁹Tapi mula ilausi kono dekket ginemgemmu i ngo pati-patinku dekket perèntahKu, janah mersembah nola taba dèbata sidèban,

²⁰kennah Kupuari ngo kènè i nagerri sienggo Kuberèken bai ndènè èn nai. Bages èn pè kutadingken ma mo tukasi pè enggo kudokken gabè bekkas mersembah taba Aku. Barang i dikè sambing pè gabè ilèai janah sitertabaen nola mo bages èn.

²¹Bagèndari ihormati kalohon ngo bages èn, tapi sidangna i nola, barang isè memellus i sidi, lengang mo mengidahsa. Dokenken kalak i mo, ‘Kasa bagidi ibaing JAHOWA taba nagerri dekket bages èn?’

²²Nai ialoi dèba mo, ‘Kumara itadingken kalak i ngo JAHOWA Dèbata kalak i, sienggo mengarak empung kalak i karuar i Mesir nai. Gabè isembah janah setia nola ngo kalak i taba dèbata sidèban. Idi ngo sebabna asa roh ibaing JAHOWA olpek i taba kalak i.’ ”