Read Batak Dairi 2 Kronika 8 Bible Online

2 Kronika 8 - Batak Dairi bible

2 Kronika 8

¹Duapuluh tahun ngo dekkahna si Salomo memahan Bages JAHOWA dekket istana raja.

²Kuta siniberèken Raja Hiram bana isasai nola ma ngo mengolihi nai idokken mo kalak Israel merian i si.

³Itaban ma ngo nagerri Hamat dekket Zoba,

⁴janah ipegotting ngo kuta Tadmor i gurun pasir, nai ipelias nola ma mo karina perbekkasen bekkel i Hamat.

⁵Kuta Bet-Horon-Julu dekket Bet-Horon-Jèhè ipelias nola mengolihi gabè kuta merbèntèng janah merpèntu pengkeruhen mergerruk-gerruk.

⁶Ipelias nola ma ngo mengolihi kuta Baalat dekket karina kuta bekkas bekkel dekket kuta pemeneppen kurèta perang bak kudana. Karina rencana sinaing bahanenna i Jerusalem, i Libanon dekket i suberri aur sinirajanna enggo saut ibahanken.

⁷Karinana pemparen bangsa Kanaan siso kerri ibunuh kalak Israel tikan ibengketti kalak i nagerri idi, ipaksa si Salomo ngo merrodi. Imo kalak Het, Amori, Feris, dekket Jebus. Soh bagèndari ngo pemparen kalak i gabè hamba.

⁹Ukum kalak Israel oda ngo ibaing merodi; gabè soridadu ngo ibaing ukum kalak i, gabè lubalang, pengulu kurèta perang dekket tenterra merkuda.

¹⁰Dua ratus limapuluh kalak ngo ibaing mertanggung jabab tersèngèt kalak simerodi mengulaken mermatcam bagè bahaen.

¹¹Ipindahken si Salomo mo sinibagesna berru Mesir i i Kuta si Daud nai mi bages sinipajekna bana i. Ai dok atè si Salomo, “Oda ndorok merian i istana si Daud raja Israel, sinibagesku i, kumarna bekkas mbadia ngo karinana bekkas sinung bekkas Pèti Perpadanen.”

¹²Ipèlèken si Salomo ngo pèlèen situtungen bai JAHOWA, i babo langgaten sinibahanna i lebbè Bages JAHOWA i.

¹³Ipèlèken ngo pèlèen i mengèkutken pati-patien si Musa i gennep ari raya; ari Sabat, ari raya Peltak Bulan dekket ari raya sitellu nai gennep tahun, imo ari raya Roti Oda Meragi, ari raya Peranien dekket ari raya Sapo-sapo Bulung.

¹⁴Tosè mi sinihatorken bapana si Daud, ihatorken si Salomo ma ngo siulaenken imam-imam gennep ari bagi ma kalak Lewi kennah mengendèken pemoji-mojien bai JAHOWA dekket mengurupi imam mengulaken perpulungen mersembah. Bagi ma ngo pertaram Bages JAHOWA, ibagi ngo barang piga-piga nuhnuhen i gennep pèntu mbengket bagè sienggo ihatorken si Daud naposo Dèbata.

¹⁵Karinana sinidokken si Daud taba imam-imam dekket kalak Lewi tersèngèt gudang bak sidèbankenna i, ièkuti ngo seppè.

¹⁶Nai pul mo karina bahaen sinirencanaken si Salomo. Karina bahaen mulai menggamparken dangaen soh mi pul Bages JAHOWA i, enggo mo selloh iulaken.

¹⁷Enggo kessa i laus mo si Salomo mi Ezion-Geber dekket mi Elot, imo kuta pelabuhen i biding Teluk Akaba i nagerri Edom.

¹⁸Itengesken Raja Hiram ngo bana keppel-keppel sinipedalan parangen si Hiram sendiri rebbak dekket perkeppel sienggo merpengalamen. Merlayar ngo kalak i mi nagerri Ofir rebbak dekket parangen si Salomo, ialengi kalak i ngo i sidi nai 15.000 kilo emmas, nai iembah taba si Salomo.