Read Batak Dairi 2 Kronika 9 Bible Online

2 Kronika 9 - Batak Dairi bible

2 Kronika 9

¹Soh ngo berita ketermurmuren si Salomo taba raja daberru nagerri Syeba. Nai roh mo ia mi Jerusalem lako merundang-undangen dekket si Salomo merkitè kuso-kuso sulit kalohon. Roh ngo ia merdengan nterrem kalohon radingna dekket unta merembah mèduk kalohon rempah-rempah, batu permata dekket emmas mbuè kalohon. Tikan jumpa kalak i dekket si Salomo, ipengkusoken raja daberru i mo mermatcam bagè kuso-kuso siturah i pikirenna nai.

²Karina kuso-kuso i teraloen si Salomo ngo, sada poda sulit bana.

³Idah raja daberru i sendiri ngo kepantasen bak kebijaken si Salomo. Iidah ia ngo istana sini pajek si Salomo.

⁴Cara pugabè istanana mengulaken bahanna, dekket perdos pakèen bak bages kalak i. Idah ma ngo pangaen sinipehantar dekket pakèen perkebbas simengkebasi tupung pèsta; idah ma ngo pèlèen sinipèlèken si Salomo i Bages JAHOWA. Karinana i memaing raja daberru nagerri Syeba i kagum janah lengang.

⁵Nai idokken mo mbang Raja Salomo, “Tuhu ngo keppè karinana sikudengkoh i tanohku tersèngèt Rajai dekket kepantasen Rajai.

⁶Ukum tikala i oda ngo tok aku, tapi enggo kessa roh aku mengidah karinana merkitè matangku sendiri, i dèng pè asa tok aku. Situhuna, karina sikudengkoh i, sitengah daripada sikuidah bagèndari poda lot dèng i. Ai ndaoh dèng lampo kebijaken dekket kekayaen ndènè daripada sinibagahken dèba bangku.

⁷Nong labana i iakap pugabè simengkebasi Rajai janah simahan bahaen bai Rajai gabè ndorok mendengkoh sendiri bai Rajai nai karina peddah kebijaken.

⁸Nipoji mo JAHOWA, Dèbata ndènè i. Ai ipebangkit kènè gabè Raja memerèntah merkitè gerarNa, enggo ipacidah sampang atèna mengidah kènè. Kumarna ikekelengi ngo bangsa Israel janah ikelemoken asa dak tettap lot kalak i, gabè ipebangkit ngo kènè gabè raja kalak i, asa ipecèndek kènè hukum dekket kebenaren.”

⁹Enggo kessa i iberèken raja daberru nagerri Syeba i mo luahna bai si Salomo, imo siniembahna lebbih 4.000 kilo emmas dekket mbuè kalohon batu permata bak rempah-rempah. Oda nung nèngè si Salomo menjalo rempah-rempah bagi sellohna, bagè siniberèken raja daberru nagerri Syeba i tabasa. (

¹⁰Parangen Raja Hiram dekket parangen Raja Salomo simerembah emmas i Ofir nai bai si Salomo, merembah batu permata dekket kayu jati ma ngo.

¹¹Ukum kayu i ibaing si Salomo ngo mahan ardan i Bages JAHOWA dekket i istana dekket mahan kucapi bak genderrang perendè. Oda nung lot bagi i nagerri Juda.)

¹²Laènken luah sikira balesna bagè biasana iberèken si Salomo, iberèken dèng ma ngo barang kadè dèng ipergeddo raja daberru i nagerri Syeba i nai. Nai balik mo raja daberru i mi nagerrina rebbak dekket rading pendenganina.

¹³Gennep tahun ijalo Raja Salomo ngo naing-naing 23.000 kilo emmas,

¹⁴oda dekket dèng belasting saudagar dekket pertiga-tiga. Raja-raja Arab bak gubèrnur-gubèrnur Israel pè merèken emmas bak pirak ngo tabasa.

¹⁵Ibahan si Salomo ma ngo 200 tambeng-tambeng mbellen i emmas tingtingen nai. Emmas siniteppa mi gennep tambeng-tambeng i lot ngo kira-kira 7 kilo.

¹⁶Ibahan dèng ma ngo 300 nai tambeng-tambeng emmas terkèdèken. Emmas siniteppa mi gennep tambeng-tambeng i kira-kira tellu kilo ngo, karinana emmas tingtingen. Ibaing ngo tambeng-tambeng i mi bekkas simergerar Balè Rambah Libanon.

¹⁷Ibahan raja i ma ngo sada karosi kerajaen narih mbelgah ipas gading nai janah itiktik ngo i dekket emmas tulèn.

¹⁸Mertangan ngo karosi i, janah lot ngo nipersinga i kacimbang lambung. Merardan ngo karosi i, ennem tanggana janah lot sada bekkas nèhè ilampis dekket emmas. Ukum bekkas nèhè i mersada ngo dekket karosina i.

¹⁹Ipas punca kambirang bak punca kamuhun gennep tangga karosi i, nipersinga ngo karina gabè sipuluh dua ngkabuah. Oda dèng nung lot karosi bagi tempana barang i kerajaen apaina pè.

²⁰Karinana perènumen si Salomo, emmas ngo, janah karina perkekkas i rambah Libanon i pè, ipas emmas tulèn nai ngo iteppa. Ukum i tikki si Salomo, oda ngo maharga iètong kum pirak.

²¹Mèduk ngo keppel si Salomo merlayar i laut raya rebbakken dekket keppèl Raja Hiram. Sikali tellu tahun balik ngo keppel i merembah emmas, pirak, gading, kera dekket uo.

²²Pantasen janah bèaken ngo Raja Salomo daripada siapaina pè i dunia èn.

²³Karina raja sèkel mendahi Raja Salomo lako mendengkoh peddah kebijaken siniberèken Dèbata bana i.

²⁴Merrohen ngo kalak i ninganna merembah luah bai si Salomo. Iberèken kalak i ngo pirak, emmas, oles, senjata, rempah-rempah, kuda boban. Bagidi mo i tahun nai mi tahun.

²⁵Lot ma ngo 4.000 kandang kuda bak kurèta Raja Salomo. Kuda perangna lot 12.000. Dèba i Jerusalem ngo ibaing janah dèba nai ibaing i barang piga-piga kuta bekkas kurèta perangna.

²⁶Ikuasai ngo karina raja nagerri mulai i Laè Efrat nai soh mi nagerri Palistin dekket perbalengen Mesir.

²⁷Tikan pemerèntahen si Salomo, barang biasa sambing ngo ukum pirak i Jerusalem, ai dosken batu sambing ngo i, janah kayu arès Libanon pè mbuè ngo, bagè dosken kayu ara biasa.

²⁸Roh ngo kuda itennahken si Salomo i Mesir nai dekket i nagri sidèbankenna i nai.

²⁹Sukuten sidèbanna tersèngèt si Salomo i bennana nai soh mi puncana enggo isurat ibas bukku Tori-torien Nabi Natan dekket ibas bukku Nabi Ahia kalak Silo dekket ibas bukku Alamat Nabi Ido, simenuratken pemerèntahen si Jerobeam raja Israel.

³⁰Empatpuluh tahun ngo dekkahna si Salomo memerèntah suberri Israel i Jerusalem.

³¹Nai matè mo ia janah ikubur i Kuta si Daud. Nai anakna si Rehabeam mo mbangkit raja singkatna.