Read Batak Dairi Esra 10 Bible Online

Esra 10 - Batak Dairi bible

Esra 10

¹Sidekkahna mersodip si Esra ninganna tangis janah menepetti dosa i lebbè Bages JAHOWA, nterrem kalohon go kalak Israel roh mertumpu, anak laki, bang pè daberru dekket anak-anak. Icingkoi kalak i mo ia ninganna derko-derko.

²Nai mengerana mo si Sekhanya anak si Jehiel i horong Elam nai, taba si Esra, “Merdosa ngo kami taba JAHOWA kumerna mengkabini berru bangsa sidèban. Tukasi nola pè bagidi lot dèng ngo harapen bai Israel.

³Ita mo merbulaban taba Dèbata, asa ipelaus karina daberru idi rasken dekket dukak-dukak kalak i. Kuuèi kami pè karina peddahmu, bak rana sidèbanna simenguèi perèntah Dèbata. Kuuèi kami pè Patin Dèbata.

⁴Kennah kono ngo peliasken. Kuurupi kami pè kono mertuhu-tuhu. Pelias mo mertuhu-tuhu soh merkedungen.”

⁵Nai kebbas mo tuhu si Esra. Ipendokkoni mo imam-imam èkuten, kalak Lewi dekket kalak Israel sidèbanna merbulaban magahken tuhu ulaenken kalak idi pengidoen si Sekhanya idi.

⁶Enggo kessa merbulaban kalak i, laus mo si Esra i lebbè Bages JAHOWA i nai janah mbengket mi bekkas si Johanan anak si Elyasib janah merberngin i sidi. Oda uè ia mangan barang mènum kumerna bonekna memikirken ulah-ulah kalak sibuangen idi.

⁷Nai imongmongken mo sada boa-boa mi suberri Jerusalem dekket Juda mendahi karina kalak sienggo balik i kebuangen nai, asa mertumpu i Jerusalem.

⁸Barang isè oda roh ibagasen 3 ari, isita mo karina hartana janah oda nèngè ètongen ia masuk bilangen. Itekken karina pengulu-pengulu ngo mo boa-boa idi.

⁹Enggo kessa tellu ari, i ari duapuluh bulan sibah, karinana anak laki simerian i tanoh Juda dekket Benjamin merrohen mi Jerusalem janah tumpu i kasèan Bages JAHOWA. Tikan bagidi darèdè mo udan nderras kalohon. Karina jelma kadotdot kumerna bergohna janah kumerna perluna perpulungen idi.

¹⁰Enggo kessa bagi cènder mo si Esra janah mengerana taba kalak i. Nina mo, “Enggo merdosa kènè janah menambahi kesalahen Israel kumerna memuat berru sidèban kènè.

¹¹Kumerna i, akkui kènè mo dosa ndènè taba JAHOWA, Dèbata sinisembah empungta, janah ulaken mo kadè sipeloloken ukurNa. Pedaoh kènè mo diri ndènè bai kalak sidèban simerian i nagerri ènda nai janah pelaus kènè mo karina sinibages ndènè kalak bangsa sidèban idi.”

¹²Ialoi kalak i mo nggang kalohon, “Kuuèi kami pè peddahmu idi.”

¹³Nai nina kalak i nola dèng ma, “Tapi nterrem kalohon ngo sipulung ni sènda janah udan pè bagi mo darèdèna. Oda tertahanken kami cènder i ruar bagèen. Janah dèng ma oda terdungi tersèngèt èn ibagasen sada barang dua ari, kumarna nterrem kalohon ngo bai nami nai siterlibat ibas dosa sibagèen i.

¹⁴Lotien mo pengulu-pengulu nami tading i Jerusalem lako mengurus tersèngèt mi si. Nai gennep jelma i kuta nami nai, mula lot perukatna i bangsa sidèban nai, kennah roh tupung ari sinitentuken, rasken dekket pengulu-pengulu bak perhukum i kutana nai gennep. Merkitè bagi tentu oda nèngè mo melaga Dèbata midah kita kumernaken simasa ènda.”

¹⁵Sada kalak poda lot keberatenna mi rencanana idi, laènken si Jonatan anak si Asael dekket si Jahseya anak si Tikwa, iampini dua kalak Lewi, imo si Mesulam bak si Sabetai.

¹⁶Karina kalak buangen sienggo balik i tong hot lako pedalanken rencana idi, kumerna ipilih Imam Esra ma ngo barang piga-piga kalak ibas pengulu-pengulu horong nai, ninganna menuratken gerar-gerar kalak i. I ari sada bulan sipuluh mulai mo kalak i runggu lako memerèso simasa idi.

¹⁷Ibagasen tellu bulan merhasil mo kalak i mendungi pemerèsoen taba karina anak laki sienggo muat berru bangsa sidèban idi.

¹⁸Enda mo gerar-gerar kalak sinibagesna berru bangsa sidèban i: Imam-imam, tersurat dekket horongna: Horong si Jesua dekket kaka-anggina, dukak-dukak si Jozadak: si Maaseya, si Eliezer, si Jarib dekket si Gedalya.

¹⁹Merjandi ngo kalak i lako menirangken sinibagesna, nai ipèlèken kalak i mo biri-biri tonggal mahan pèlèen kesasaen dosa kalak i.

²⁰Horong si Imer: Si Hanani dekket si Zebaja.

²¹Horong si Harim: Si Maaseya, si Elia, si Semaya, si Jehiel dekket si Uzia.

²²Horong si Pasyhur: Si Elyoënai, si Maaseya, si Ismael, si Netaneel, si Jozabad, dekket si Elasa.

²³Kalak Lewi: Si Jozabad, si Simei, si Kelaya (sinigeraren ma si Kelita), si Petahya, si Juda dekket si Eliezer.

²⁴Perendè: Si Elyasib Penjaga pèntu pengkeruhen Bages JAHOWA: Si Salum, si Telem, dekket si Uri.

²⁵Kalak Israel sidèban: Horong si Paros: Si Ramya, si Jezia, si Malkia, si Miyamin, si Eleazar, si Malkia dekket si Benaya.

²⁶Horong si Elam: Si Matanya, si Zakharia, si Jehiel, si Abdi, si Jeremot dekket si Elia.

²⁷Horong si Zatu: Si Elyoënai, si Elyasib, si Matanya, si Jeremot, si Zabad dekket si Aziza.

²⁸Horong si Bebai: Si Johanan, si Hananya, si Zabai dekket si Atlai.

²⁹Horong si Bani: Si Mesulam, si Malukh, si Adaya, si Jasub, si Seal, dekket si Jeramot.

³⁰Horong si Pahat-Moab: Si Adna, si Kelal, si Benaya, si Maaseya, si Matanya, si Bezaleel, si Binui dekket si Manasye.

³¹Horong si Harim: Si Eliezer, si Jesia, si Malkia, si Semaya, si Simeon, si Benyamin, si Malukh dekket si Semarya.

³³Horong si Hasum: Si Matnai, si Matata, si Zabad, si Elifelet, si Jeremai, si Manasye dekket si Simei.

³⁴Horong si Bani: Si Maadai, si Amram, si Uel, si Benaya, si Bedeya, si Keluhu, si Wanya, si Meremot, si Elyasib, si Matanya, si Matnai, si Jaasai.

³⁸Horong si Binui: Si Simei, si Selemya, si Natan, si Adaya, si Makhnadbai, si Sasai, si Sarai, si Azareel, si Selemya, si Semarya, si Salum, si Amarya dekket si Josep.

⁴³Horong si Nebo: Si Jeiel, si Matica, si Zabad, si Zebina, si Jadai, si Joel dekket si Benaya.

⁴⁴Karinana kalak idi enggo muat berru i bangsa sidèban nai. Nai karina nasa sinibagesna idi isirangken janah ipelaus rasken dekket dukak-dukak kalak i.