Read Batak Dairi Esra 3 Bible Online

Esra 3 - Batak Dairi bible

Esra 3

¹I bulan pitu, enggo mo menettap kalak Israel i kutana gennep. I ari sada i bulan idi mertumpu mo kalak idi i Jerusalem,

²nai balik mo si Jesua anak si Jozadak bagi dekket dengan-denganna imam dekket si Zerubabel anak si Sealtiel bagi dekket kakaanggina, memajek langgaten Dèbata Israel. Merkitè bagidi terbaing kalak i mo menutung pèlèen i babona, rembang bagè sinisosoken sitersurat ibas bukku Patin si Musa, naposo Dèbata.

³Tukasi pè mbiar kalak i midah pengisi i nagerri i, tapi tong ma ngo ipajek kalak i langgaten idi i bekkasna perlebbè i kin. Nai ipungkah kalak i mo lako memèlèken pèlèen situtungen, tikan siceggen dekket ciboen.

⁴Ipèstaken kalak i ma ngo Ari Pèsta Sapo-sapo, rembang mi hatoren; janah gennep ari memèlèken pèlèen sienggo itentuken mi arinkenna i.

⁵Laènkenna i meratur ngo kalak i pegancih memèlèken pèlèen situtungen bak pèlèen Ari Pèsta Peltak Bulan, dekket i karina pèsta sidèban sinibakin lako menembah JAHOWA. Ipèlèken kalak i dèng ma ngo tong pèlèen siterenjar ibas ukurna nai bai JAHOWA.

⁶Kasi pè oda dèng itubennai pejengjengken balik Bages JAHOWA, tapi i ari sada bulan pitu enggo mo itubennai ginemgem i menutung pèlèen bai JAHOWA.

⁷Ipemberrèken sinterrem i mo riar penumpakina mahan upah tukkang batu dekket tukkang kayu. Itengesken kalak i ma mo pangaen, ènumen bak minak zaitun mi kuta Tirus dekket kuta Sidon mahan tukar kayu sempènur Libanon i kuta idi nai. Iembah mo kayu idi mi Jafo tarap laut. Karinana idi iulaken ginemgem idi ibagasen ijin si Kores, Raja Persia.

⁸Asa i bulan dua, i tahun peduaken enggo kessa balik kalak Israel mi Jerusalem, itubennai kalak i mo balik lako memajek Bages JAHOWA. Si Zerubabel, si Jesua dekket dengan kalak i sada bangsa, imam-imam, kalak Lewi, pèndèk kata karina sibuangen idi kin, dekket ngo karèjo. Kalak Lewi simerumur 20 tahun mi babo idokken gabè mandur ulaen pekadèken Bages JAHOWA idi.

⁹Asa si Jesua kalak Lewi i, dekket dukak-dukakna bak kaka-anggina dekket si Kadmiel bak dukak-dukakna (horong Hodawya) rasken mo kalak i menjamotken ulaen pekadèken Bages JAHOWA idi. Iurupi kalak Lewi i horong si Henadad nai ngo kalak i.

¹⁰Sinderrang menggamparken batu cendi Bages JAHOWA tukkang i, merpakèen jubah mo imam-imam janah menjèmak sarunè ninganna mersibuat bekkasna. Kalak Lewi i horong si Asaf nai cènder ma ngo i bekkas idi menjèmak cilat-cilat. Ipoji kalak i mo JAHOWA rembang bagè hatoren sienggo itetapken kin mungkah tikan Raja Daud nai.

¹¹Iendekken sinterrem i mo endè pemoji-mojien bai JAHOWA, ninganna mengendèken molih-olih punca endè idi, bagèen katana, “Burju ngo JAHOWA; janah hot soh mi amman sumendah ngo ngkelleng atèna taba Israel.” Mersurak-surak mo karina jelma nterrem janah memoji JAHOWA, kumerna enggo igamparken batu cendi Bages JAHOWA.

¹²Mèduk ngo imam-imam kalak Lewi dekket èkuten horong nai sienggo nggeddang umurna enggo nung mengidah Bages JAHOWA siperlebbè i kin. Tikan ipetengen-tengen kalak idi menggamparken batu cendi Bages JAHOWA sibagèndari, muo-uo mo kalak i. Tapi ukum kalak sidèban siroh i mersurak-surak ngo kerna sampang atèna,

¹³gabè oda nè ndorok nibettoh siapaina surak-surak lolo atè dekket tangis. Nggang kalohon nai ngo sora i, sanga terdengkoh soh ndaoh kalohon.