Read Batak Dairi Esra 4 Bible Online

Esra 4 - Batak Dairi bible

Esra 4

¹Terdengkoh ngo berita bai musuh kalak Juda dekket Benjamin, enggo ipelias kalak sienggo ibuang idi kin Bages JAHOWA, Dèbata Israel.

²Kumernaken i idahi kalak i mo si Zerubabel dekket karina èkuten gennep horong, lako mengidoken, “Duè kènè mo kami dekket pekadèken Bages JAHOWA idi, kumerna kami pè menguèi ngo taba Dèbata ndènè idi tosè bagè kènè karina. Dakdak ngo kupèlèken kami pèlèen tabasa kessa nai iarahken si Esarhadon, raja Assur i kami mi sènda.”

³Tapi ialoi si Zerubabel, si Jesua dekket karina èkuten horong idi mo, “Oda perlu bai nami pengurupien ndènè lako pekadèken Bages bai JAHOWA Dèbata nami. Kami sambing ngo lako pekadèken rembang bagè perèntah si Kores, raja Persia, taba kami.”

⁴Nai itubennai jelma sienggo ndekkah merian i sidi mo lako menondati pikiren kalak Jahudi ninganna mencubiar-cubiari kalak i asa ipettadi lako pejengjengken bages i.

⁵Isisip kalak i mo pugabè-pugabè pemerèntah Persia asa isondati taki kalak Jahudi i. Masa ngo terrus bagidi sidekkah pemerèntahen Raja Kores soh mi pemerèntahen Raja Darius.

⁶Ibenna pemerèntahen Raja Ahasweros, itengesken alo pengisi Jerusalem dekket Juda mo surat keberaten.

⁷Bagi ma ngo tikan pemerèntahen si Artahsasta, Kesar Persia, iolihi ma ngo masa bagi: Ibakin si Bislam, si Mitredat, si Tabeel dekket dengan-dengan kalak i mo surat bai raja. Ibakin ngo surat i ibas kata Aram, janah kennah mo ilapatken nola tikanna ijakaken.

⁸Ijalo si Artahsasta ma ngo surat tersèngèt Jerusalem. Gubèrnur Rehum dekket si Simsai juru tulis propinsi ngo menengesken surat i janah sinitumpaki dengan-dengan kalak i, imo perhukum dekket karina pugabè Persia sidèbanna siroh i Erekh, Babel dekket Susan i nagerri Elam nai,

¹⁰bagi ma dekket bangsa-bangsa sidèban sienggo niembah si Asnapar sitermurmur i janah idokken menettap i kuta Samaria dekket i kuta-kuta sidèban i propinsi Efrat kesunduten.

¹¹Bagèen ngo kata surat i, “Mendahi sinihormaten Raja Artahsasta, bai nami nai naposo Rajai simerbekkas i Efrat Kesunduten. Njuah-njuah mo.

¹²Asa ibettoh Raja idi, ukum kalak Jahudi sienggo menadingken nagerri sidèban ibas kerajaen Rajai, bagèndari enggo menettap i Jerusalem janah sidang peliasken balik kuta jahat janah dak uè memberontak idi. Enggo itubennai kalak i memahan pagar batuna janah oda ndekkah nèngè pul mo bahanen idi.

¹³Mula saut kessa sikali èn ipekadè kalak i kuta i janah pagar batuna i pè pul ibahan, tentu oda nèngè nggèut pengisina i menggarar belasting, nai gabè moru mo pencarien kerajaen ènda.

¹⁴Ukum kami enggo mo merutang budi bai Rajai janah oda sennang atè nami mengidah Rajai irogiken. Kumerna i kupengidoken kami,

¹⁵asa ipasulak Raja idi mo lako memerèso surat-surat sime- ngusurken Rajai. Ibas surat-surat idi ibettoh Rajai mo ukum kuta Jerusalem tuhuna nggèut ngo dak memberontak janah mulai arnia nai ngo dak mengerogiken raja-raja dekket perkuasa propinsi. Kalakna dak susah kalohon ngo aturen. Kumarna i ngo asa enggo ilala kuta i.

¹⁶Jadi, dok atè nami, mula pul kessa kuta idi ipekadè balik janah pul ibahan pagar batuna, bakunè pè oda nèngè terkuasai Rajai propinsi Efrat kesunduten ènda.”

¹⁷Itengesken raja i mo pengaloina bagèen, “Mendahi Gubèrnur Rehum dekket si Simsai juru tulis propinsi, dekket dengan-dengan kalak i simerian i Samaria dekket i kuta sidèbanna i propinsi Efrat kesunduten. Njuah-njuah mo.

¹⁸Ukum surat sinitengesken ndènè i enggo ijakaken janah iterjemahken taba aku.

¹⁹Nai merkitè perèntahku enggo mo iperèso bukku, janah tuhuna ngo, mulai arnia nai dak mengalo kuasa raja-raja ngo Jerusalem, janah mèduk ngo ibas pengisina nai dak memberontak janah memaing gontar.

²⁰Nung ngo lot raja-raja mahantu memerèntah i sidi janah mengerajai karina propinsi Efrat Kesunduten ninganna pedalanken belasting dekket menjalo cokè.

²¹Kumerna i, bakinken mo perèntah asa ipettadi kalak i bahan idi, asa ulang ipekkadè nèngè kuta i mèma kubaing nola perèntah sidèban.

²²Ulaken mo ndor perèntahku i asa ulang makin tambah mbuè kerogienku!”

²³Enggo kessa ijakaken surat si Artahsasta idi taba si Rehum, si Simsai dekket dengan-dengan kalak i, mèter isudu kalak i mo berkat mi Jerusalem janah memaksa kalak Jahudi asa ipettadi ulaen pekadèken kuta idi balik.

²⁴Enggo mo ipettadi bahaen pekadèken Bages JAHOWA janah oda nèngè iterrusken soh mi tahun peduaken pemerèntahen si Darius, raja Persia.