Read Batak Dairi Esra 5 Bible Online

Esra 5 - Batak Dairi bible

Esra 5

¹Tikalana i lot mo dua kalak nabi, imo si Hagai dekket si Zakharia anak si Ido, ipungkah mo mengerana ibagasen gerar Dèbata Israel mendahi kalak Jahudi simerian i Juda dekket i Jerusalem.

²Mendengkoh tennah nabi sidua i, mèter iuduti si Zerubabel anak si Sealtiel dekket si Jesua anak si Jozadak mo menebenai pekadèken Bages JAHOWA i Jerusalem niurupi nabi sidua idi.

³Tapi ukum si Tatnai, gubèrnur propinsi Efrat Barat, rasken dekket si Syetar Boznai dekket dengan-dengan kalak i mènter roh mo mi Jerusalem janah mengkusoken bai kalak Jahudi, “Isè mendokken kènè pekadèken dekket petupaken karina haliu Bages Pemojien èn?”

⁴Ikusoken kalak i ma ngo dekket gerar karina kalak simengurupi pecèndekken Bages JAHOWA idi.

⁵Tapi idatèken janah ijamoti JAHOWA ngo karina èkuten kalak Jahudi i, gabè karina pugabè kalak Persia idi memutusken oda lot memaing barang kadè kum mak dèng itengesken kalak i surat bai si Darius dekket menjalo bakunè pengaloina.

⁶Bagèen mo pendokken kalak i itengesken bai Raja,

⁷“Mendahi sinihormaten Raja Darius. Katerra pè dak ibagasen damè mo Rajai memerèntah!

⁸Asa ibettoh Rajai, ukum kami enggo mo laus mi propinsi Juda janah mengidah ukum Bages JAHOWA, Dèbata Sintèmbul i, sidang ipekkadè ngo balik ibas batu-batu mbellen dekket pagar-pagar batu sinilampisen bak kayu. Seppè kalohon ngo ibahanken kalak i ulaen idi janah selloh ngo merdalan.

⁹Nai kukusoken kami ngo taba èkuten bangsa i, barang isè simemerèken ijin bai kalak i lako pekadèken balik Bages Pemojien idi dekket mencukupi haliuna.

¹⁰Kukusoken kami ma ngo dekket gerar-gerar kalak i asa ndorok bagahenken bai Rajai barang isè simenguluken ulaen idi.

¹¹Bagèen ngo pengaloi kalak i, ‘Naposo Dèbata simengerajai suberri langit dekket tanoh ngo kami. Sidang pekadèken Bages JAHOWA sinipajek janah ilengkapi sada kalak raja Israel termurmur merpuluh tahun sienggo laus i ngo kami.

¹²Tapi kumerna enggo idungkul empung nami laga Dèbata Simerkuasa i sorga, gabè isohken mo kalak i mi terruh kuasa si Nebukadnezar, raja Babel i pemparen kalak Kasdim nai. Irumpakken ngo Bages i janah menaban bangsa nami mi Babel.

¹³Enggo kessa i si Kores nola mo gabè raja Babel janah i tahun perlebbè pemerèntahenna, ibakinken ngo perèntah asa ipekadè nola Bages JAHOWA idi.

¹⁴Janah nola dèng ma ibalikken ngo nasa perkekkas emmas dekket pirak sipergunaenken i Bages JAHOWA dekket karina sinilamun si Nebukadnezar i Jerusalem nai, janah sinibaingna mi bagasen bages sembahen i Babel. Iserahken Raja Kores ngo perkekkas-perkekkas idi bai kalak simergerar Sesbazar, sienggo nipebangkit gabè gubèrnur Juda.

¹⁵Idokken raja i ngo ia lako memuat perkekkas-perkekkas i janah mengolihken mi Bages JAHOWA i Jerusalem, ninganna kipekadè balik Bages idi.

¹⁶Nai roh mo si Sesbazar mi Jerusalem janah memaing batu cendi Bages JAHOWA idi. Mungkah i sidi nai soh mi bagèndari terrus ngo merdalan ulaen idi, tapi tong oda dèng dung.’

¹⁷Mula toko dak atè Rajai, kupido kami asa isiah surat-surat silot i Kerajaen Babel. Merkitè bagidi enggo ndorok bettohen tah tuhuna ma lot perèntah Raja Kores lako pekadèken balik Bages JAHOWA i Jerusalem ènda. Nai kupengido kami mo berita tersèngèt keputusen Rajai barang bakunè tersèngèt mi perkara i.”