Read Batak Dairi Esra 6 Bible Online

Esra 6 - Batak Dairi bible

Esra 6

¹Enggo kessa bagi merkitè perèntah Raja Darius, ibakinken mo pemerèsoen ibas surat-surat silot ipennep i Kerajaen Babel.

²Tapi ukum surat idi oda ngo i Babel dapet, gabè i kuta Ahmeta i tanoh Media nola ngo. Isuratken ngo surat-surat idi ibas sada la- pihen janah bagèen ngo katana,

³“I tahun perlebbè pemerèntahen Raja Kores iperèntahken ngo asa ipekadè nola balik Bages JAHOWA silot i Jerusalem mahan bekkas jelma merembah pèlèen dekket menutung pèlèen. Dates Bages idi kennah lot 27 mèter janah bekkangna 27 mèter ma tong.

⁴Dingdingna kennah mo ibakin bagèen: I babo gennep tellu lampis batu kennah ibakin silampis kayu. Kerajaen pè menanggung peremasen siperlu mi sidi.

⁵Bagi ma karina perkekkas emmas dekket pirak sinipakkè i Bages JAHOWA janah sienggo ibuat Raja Nebukadnezar i Jerusalem nai janah iembah mi Babel, kennah ibalikken mi bekkasna perlebbè i kin.”

⁶Nai itengesken si Darius mo pengaloina bagèen, “Mendahi si Tatnai, gubèrnur propinsi Efrat Kesunduten, dekket si Syetar-Boznai, bagi dekket karina nasa pugabè i Efrat Kesunduten. Ulang mo lolahi kènè kalak Jahudi idi,

⁷janah ulang menghalang-halangi pekadèken Bages bekkas pemojien kalak i. Belli kènè mo gubèrnur Juda dekket nasa sime- nguluken Jahudi pekadèken balik Bages idi.

⁸Merkitè èn kuperèntahken bai ndènè lako mengurupi kalak i mengulaken bahaen i merkitè cara bagèen: Karina peremasen pekadèken bages i kennah ibuat ibas belasting kerajaen i propinsi Efrat Kesunduten nai janah kennah igararken bai kalak idi. Ulang sanga nola ipèma-pèma ndekkah.

⁹Laènkenna i dèng ma barang kadè sambing iperluken mengèkutken pendokken imam i Jerusalem, umpamana bagè lembu tonggal bajar, biri-biri tonggal dekket anak biri-biri pèlèen sembahenken bai Dèbata simerkuasa i sorga, bagi ma pagè, sira, anggur dekket minak zaitun, kennah iberèken bai kalak i gennep ari ulang lot lupa.

¹⁰Bakinken kènè mo karina idi asa ndorok kalak idi lako memèlèken pèlèen sipeloloken atè Dèbata simerkuasa i sorga, janah asa ipengidoken kalak i pasu-pasu lako bangku dekket bai dukak-dukakku.

¹¹Kuperèntahken mo asa barang isè mengelausi perèntah èn buaten mo sada tiang i sapona nai, itajemmi mo puncana, nai ijulukken mo mi dagingna sanga leppus. Kennah rontasenken sapona janah ibakin gabè bekkas pengambongen empak-empak.

¹²Katerra pè, Dèbata sienggo meneddo Jerusalem mahan bekkasna Isembah, mengeripasken karina raja barang pè bangsa simboho mengelausi perèntah ènda janah sinaing mengerumpakken Bages JAHOWA sini Jerusalem idi. Aku, raja Darius ngo simemerèntahken ènda. Ulaken kènè mo dekket selloh.”

¹³Seppè kalohon ngo iulaken si Tatnai, gubèrnur Efrat Kesunduten perèntah Raja Darius idi, dekket si Syetar-Boznai bak dengan-dengan kalak i.

¹⁴Siniurupen nabi Hagai dekket Zakharia, iterrusken èkuten kalak Jahudi mo pekadèken Bages JAHOWA i. Ndor ngo idungi kalak i ulaen idi rembang bagè perèntah Dèbata Israel dekket perèntah si Kores, si Darius dekket si Artahsasta, raja kalak Persia idi.

¹⁵Pul mo ibahan Bages JAHOWA idi i ari tellu bulan Adar, tahun pe- enemken pemerèntahen Raja Darius.

¹⁶Enggo kessa i ibagasen sampang atè mo kalak Israel, imam-imam, karina kalak Lewi dekket karina kalak simaluah i buangen i nai memengketti Bages JAHOWA idi.

¹⁷Tupung kerja i ipèlèken kalak idi mo bai JAHOWA 100 lembu tonggal, 200 biri-biri tonggal dekket 400 anak biri-biri. Mahan pèlèen kesasaen dosa, ipèlèken mo sipuluh dua kambing tonggal, tersada bai gennep marga Israel nai.

¹⁸Nai nola ma gabè perkebbasen i Bages JAHOWA iaturken kalak i mo persusun horong imam dekket kalak Lewi mengèkutken hatoren sitersurat ibas bukku si Musa.

¹⁹I ari sipuluh empat bulan sada tahun sirohna nola, ipèstaken kalak sienggo balik i buangen nai ma mo pèsta Paskah.

²⁰Karina imam dekket kalak Lewi enggo mo menguras dirina gabè enggo iètong mpanting kalak i. Enggo kessa i isèat kalak Lewi idi mo pinakan-pinakan mahan pèlèen Paskah lako bai imam-imam, bai kalak i sendiri dekket bai karina kalak sibuangen sidèbanna i.

²¹Karina ngo kalak Israel sienggo balik i buangen idi nai dekket pengisi nagerri sienggo menadingken cara nggelluh sidom dosa i kipangani karina pèlèen idi janah roh mersembah mendahi JAHOWA, Dèbata Israel.

²²Pitu ari mo dekkahna kalak i dak merlolo atè memèstaken Pèsta Roti Siso Meragi. Sennang kalohon ngo atè kalak i, kumarna enggo ibakin JAHOWA raja kalak Assur mermasèh atè taba kalak i ibas ulaen lako pecèndekken nola Bages JAHOWA, Dèbata Israel.