Read Batak Dairi Esra 7 Bible Online

Esra 7 - Batak Dairi bible

Esra 7

¹Enggo kessa barang piga-piga tahun nola, tikan si Artahsasta merkuasa gabè raja Persia, lot mo sada kalak anak laki mergerar si Esra, i pemparen Imam Huntuen Aron nai. Tarombona i terruh nai mi babo kira bagèen mo: Si Esra Si Azarya Si Hilkia

²Si Salum Si Zadok Si Ahitub

³Si Amarya Si Azarya Si Merayot

⁴Si Zerahya Si Uzi Si Buki

⁵Si Abisua Si Pinehas Si Eleazar Imam Huntuen Aron

⁶Ukum si Esra imo sada kalak simpantas janah mbages ngo pemettohna tersèngèt Patin siniberèken JAHOWA, Dèbata Israel bai si Musa. Kumarna ipasu-pasu JAHOWA Dèbatana ngo si Esra nai iberèken raja i ngo tabasa nasa sinipidona. I tahun pepituken pemerèntahen Raja Artahsasta, berkat mo si Esra i Babel nai mi Jerusalem rasken dekket nuhnuhen kalak Israel imo piga-piga kalak imam, kalak Lewi, perendè bak penjaga pengkeruhen i Bages JAHOWA, dekket dèba pengula.

⁸I ari sada bulan sada itadingken kalak i mo Babel janah merkitè pengurupi Dèbata, sakat mo kalak i mi Jerusalem i ari sada bulan lima.

¹⁰Iberèken si Esra ngo ukurna mertuhu-tuhu lako mengerimangi Patin JAHOWA, lako mengulaken dekket memedahken karina ketentuen bak hatorenna bai bangsa Israel.

¹¹Enda mo lapihen siniberèken Raja Artahsasta bai si Esra, sada kalak imam bak simemettoh Patin.

¹²“Bai Raja Artahsasta nai taba Imam Esra, simemettoh patin Dèbata simerkuasa i sorga.

¹³Kuperèntahken mo taba karina imam, kalak Lewi dekket kalak Israel sidèbanna i i suberri kerajaenku, barang isè sèkel laus mi Jerusalem, kuijinken mo berkat rasken kono.

¹⁴Kumerna aku dekket sipitu kalak pengetuaingku pasulakken kono mi Jerusalem dekket Juda lako memerèso simasa i sidi dekket lako kiperèso tah tuhu-tuhu ma ngo iuèi Patin Dèbata sienggo ipercayaken bamu.

¹⁵Aku dekket pengetuaingku sèkel memèlèken emmas bak pirak bai Dèbata Israel, Dèbata simerian i Jerusalem. Embah mo pèlèen nami idi.

¹⁶Embah ma mo karina emmas dekket pirak sienggo ipepulung kono i suberri Babel dekket karina penumpaki bangsa Israel bak imam-imamna mi Bages JAHOWA Dèbata kalak idi i Jerusalem.

¹⁷Pergunaken mo kèpèng idi selloh menokor lembu tonggal, biri-biri tonggal, anak biri-biri, pagè dekket anggur. Pèlèken mo karina idi i babo langgaten Bages JAHOWA i Jerusalem.

¹⁸Pirak dekket emmas ibana i ndorok ipakkè kono mi keperluenmu dekket dengan-denganmu, rembang bagè sinikelemoken Dèbata ndènè.

¹⁹Sohken mo bai Dèbata i Jerusalem karina perkekkas sienggo iberèken bamu mahan pemojien i Bages Dèbata.

²⁰Janah karina keperluen sidèbanna dèng i Bages JAHOWA, ndorok ipido kono bai kas kerajaen nai.

²¹Taba karina simengurus harta kerajaen i propinsi Efrat Kesunduten kuperèntah- ken asa barang kadè sambing ipido Imam Esra, simettoh Patin Dèbata perkuasa i sorga, berrèken mo ndor bana, soh bagèen buèna;

²²pirak soh mi 3.400 kilo, pagè soh mi 10.000 kilo, anggur soh mi 2.000 sellup, minak zaitun soh mi 2.000 sellup, dekket sira sadikè sambing iperluken.

²³Seppè mo bakinken kènè lako pepadaken karina sinipido Dèbata perkuasa sorga i BagesNa, asa ulang melaga Ia taba aku barang pè taba kalak simemerèntah i podingku.

²⁴Oda ndorok jaloen ndènè belasting bai imam nai, bai kalak Lewi nai, perendè, penjaga pèntu pengkeruhen, perkebbas, barang isè sambing silot ulaenna i Bages JAHOWA.

²⁵Alè Esra, pakè mo kepantasen sienggo iberèken Dèbata bamu, janah pebangkit mo pengulu-pengulu dekket perhukum lako memerèntah karina jelma i propinsi Efrat kesunduten asa nggelluh mengèkut- ken Patin Dèbatamu. Naing mo kennah ajarenkenmu Patin idi bai karina jelma siso memettohsa dèng.

²⁶Karina jelma siso menguèi pati-patin Dèbatamu idi, barang hukum-hukum kerajaen, kennah ndor ihukum matè, barang ibuang, barang isita hartana, barang ikurung.”

²⁷Nai nina si Esra mo, “Poji mo JAHOWA, Dèbata sinisembah empungta! Enggo idungkuli ukur raja i asa enggo gabè uè ia memerèken ukurna mi Bages JAHOWA i Je- rusalem.

²⁸Merkitè pengurupi Dèbata gabè ngkelleng ngo atè raja i tabaku, bagi ma bak pengetua-pengetuana dekket pugabè-pugabèna simerkuasa idi; enggo iberèken JAHOWA Dèbatangku gegoh bangku, makinsa ndorok kuarahken bagi nterremna èkuten horong Israel lako balik mi Jerusalem.”