Read Batak Dairi Esra 9 Bible Online

Esra 9 - Batak Dairi bible

Esra 9

¹Enggo kessa pul karinana idi ibahanken, roh mo mendahi aku tah piga-piga kalak simpantasniasè bangsa Israel. Ibagahken kalak i mo, ukum kalak Israel, bang dekket imam-imam, dekket kalak Lewi oda isirang dirina bai bangsa-bangsa simerian i sikulilingna idi imo bangsa Amon, Moab, Mesir, Kanaan, Het, Feris, Jebus dekket Amori. Ai imam-imam dekket kalak Lewi pè enggo memakin bagi. Karina ngo kalak i mengulaken perulaen-perulaen siso merjullat bagè siniulaken bangsa-bangsa idi.

²Muat berru bangsa sidèban ngo anak laki Jahudi gabè oda nèngè mo memellin bangsa sienggo ipilih JAHOWA. Ntengamna dèng, gabè kalak simpantasniasè dekket perpangkat Israel ngo lebbèen maing bagidi.

³Mendengkoh idi, gabè kessal kalohon ngo ukurku gabè kuribak mo pakkèenku janah kurengkati mo bukku dekket janggutku, nai dogok mo aku ibagasen atè-atè nggettem ibagasen.

⁴Terrus ngo aku dogok soh dapet katikana pesakatken pèlèen ciboen. Nai merohen mo kalak mencingkoi aku. Buradan ngo kalak i mernèngèt asup Dèbata Israel tersèngèt dosa-dosa sienggo balik ibuangen idi nai.

⁵Tikan tubenna lako memèlèken pèlèen cibon, kèkè mo aku i bekkasku tetongkel idi nai janah ningan merpakèen meribak-ribak, sujud mo aku janah mendoroken tanganku taba JAHOWA Dèbatangku.

⁶Ningku mo, “Alè Dèbatangku, mèla ngo aku lako pedorgakken takalku i hadeppenMu. Mertindih-tindih ngo dosa nami i babo takal nami songket mi langit.

⁷Kessa nai i nggelluh empung nami nai soh mi bagèndari, dak merdosa ngo kami bangsaMu ènda taba ko. Kumerna i mo kami, raja-raja bak imam-imam nami enggo italuken raja-raja sidèban. Ibunuh ngo kami, isamun janah ibantun bagè tabanen. Enggo sondel pengelèaina bai nami, bagè simasa i ari sidari èn.

⁸Tapi bagèndari, ialè JAHOWA Dèbata nami, rembaru dèng Kono mermasèh atè taba kami. Ipaluah kono ngo kami dèba ibas hamba nai asa nggelluh ibagasen damè i bekkas simerkedekoen ènda. Iberèken kono ngo nggelluh rimbaru bai nami.

⁹Tikan ihamba dèba dèng pè kami, oda ngo itadingken kono kami. Kono ngo memakin ikekelengi raja Persia i kami janah iduè nggelluh bak pejengjengken balik BagesMu sitading pellin empak-empak nai ngo kessa. Iberèken kono ngo perculèndungen bai nami i sènda i Juda dekket i Jerusalem.

¹⁰Tapi bagèndari, ialè JAHOWA Dèbata, enggo kessa pul karina simasa i, kadè mo ndorok terdokken kami? Enggo mo oda kusuihken kami pati-patinMu,

¹¹siniberèkenmu bai nami merkitè nabi-nabi, naposomu i. Ibagahken kalak i ngo bai nami ukum tanoh sinaing kuiani kami idi oda mpanting kumerna karinana pengisina i punca nai soh mi ujungna meronah ngo ulah-ulahna janah jahat.

¹²Igerra nabi-nabi i ngo kami asa ulang mersibuaten berru dekket kalak i, barang pè mengurupi kalak i asa nduma janah sennang. Mula patuh kami, gabè mergegoh ngo kami janah me- ngakapken hasil tanoh i dekket menguarisken bai pinempar nami soh sidekkah-dekkahna.

¹³Enggo merdosa kami bak mengelausi patinMu, janah enggo ihukum kono kami. Tapi kubettoh kami ngo, alè Dèbata nami, kum hukum siniampèkenmu idi oda bagè mbotong sipatut tahanen nami, balikna nola tupèh, gabè ipaluah kono ngo kami.

¹⁴Asa, bakunè nola mo perjadina, oda kusuihken kami nèngè perèntahMu janah mersibuaten berru dekket kalak jahat i? Mula kuulaken kami idi, oda terjua mak melaga kalohon kono dungna gabè igeppui kono mo kami karina janah sada poda iduè kono kami nggelluh.

¹⁵Adil ngo kono, JAHOWA, Dèbata Israel, kasi pè bagidi ibelli kono ngo kami nggelluh. Kupertuhu kami ngo salah nami baMu; oda ngo merhak kami lako mengadep mi lebbèMu.”