Read Batak Dairi Nehemia 1 Bible Online

Nehemia 1 - Batak Dairi bible

Nehemia 1

¹Bagèen ngo berita tersèngèt pengulaen si Nehemia anak si Hakhalya. Tupung bulan Kislew barang pekesibah tahun peduapuluhken pemerèntahen si Artahsasta mengerajai Persia, aku, si Nehemia tupung merkebbas i Susan, kuta sabungen kerajaen i.

²Tikanna i roh ngo si Hanani dengan sibeltekku i Juda nai rebbakken dekket barang piga-piga kalak denganna. Nai kukusoi mo kalak i tersèngèt bakunè ngo Jerusalem dekket kalak Jahudi sienggo balik i kebuangen Babel nai.

³Nai isukutken kalak i mo ukum kalak siterbuang sienggo balik mi lebbuh i, ndersa ngo pernggelluh kalak i bagèndari janah ilèai bangsa-bangsa sidèban silot i sikulilingna. Janah dèng ma, tong dèng ngo ompak-ampik bana sompar-baèr karina pagar kuta Jerusalem dekket karina pèntu pengkeruhen pè oda lot dèng ipekkadè kessa nai kin ilekkup tikala i.

⁴Mendengkoh berita i, dogok mo aku janah tangis. Tah piga ari dekkahna aku dak tong merbonek atè. Terrus mo aku puasa ninganna mersodip taba Dèbata,

⁵“Ialè JAHOWA Dèbata perkuasa i sorga. Kono ngo Dèbata simehejina, janah roh ngo kami menhadep taba Kono ibagasen mbiar. Tettap ngo kono setia janah mernèngèt padanMu taba kalak simengkekelengi kono dekket simenguèi perèntahMu.

⁶Tengen mo aku alè JAHOWA, janah dengkohken mo sodip sikusodipken mi hadeppenMu mahar dekket berngin lako bai bangsa Israel, naposo-naposoMu idi. Kubettoh ngo ukum kami bangsa Israel, enggo mo merdosa; bang aku dekket empungku tong ma ngo enggo merdosa.

⁷Enggo durhaka kami baMu janah mengelausken perèntah-perèntahMu. Oda kuuèi kami pati-patien sienggo iberèken ko bai nami merkitè si Musa, naposomi.

⁸Alè JAHOWA, èngèt mo karina kataMu sienggo idokken si Musa merkitè perèntahMu mendokken, mula oda setia kami bangsa Israel taba kono, gabè mambur mèrap mo kami ibaing kono i tengah-tengah bangsa sidèban.

⁹Tapi mula balik ngo kami taba kono, janah menguèi perèntahMu, pepulungenMu nola ngo kami sienggo mèrap idi, tukasi nola pè kami i punca dunia. Nai iolihken kono mo kami mi bekkas sienggo ipilih kono kin gabè bekkas memoji ko.

¹⁰Alè JAHOWA, naposoMu ngo kami, bangsaMu sendiri sienggo ipaluah Kono merkitè kuasa dekket kegegohenMu mahantu.

¹¹Dak dengkohken mo sodipku dekket sodip karina naposoMu sidèban siuè pesangapken Kono. Berèken mo pengurupinMu asa ibagasen ari sidari èn dapetten masèh atè naposoMu èn bai raja i nai.” Tikanna i aku ngo simengurus ènumen raja.