Read Batak Dairi Nehemia 11 Bible Online

Nehemia 11 - Batak Dairi bible

Nehemia 11

¹Pertaki simenettap i Jerusalem bak ginemgem mertendung lako memilih sada jabu ibas gennep sipuluh jabu nai sikennah merian i kuta simbadia Jerusalem. Siso terpilih ndorok mo ia merbekkas i kuta sidèbanna.

²Ibas kalak idi nai lot ma ngo uè menettap i Jerusalem janah ipoji jelma nterrem ngo kalak sibagidi.

³I kuta sidèbanna i, merian mo jelma keteremmen Israel, imam-imam, kalak Lewi, perkebbas Bages JAHOWA, dekket pinempar simengkebasi si Salomo i tanoh milik kalak i dekket i kuta-kuta kalak i èn sendiri.

⁴Merian i Jerusalem ma ngo barang piga-piga kalak i marga Juda dekket Benjamin nai. Enda mo gerar-gerar kalak i: I marga Juda nai: Si Ataya anak si Uzia bak kempu si Zakharia. Barang piga-piga kalak bai empungna nai imo: Si Amarya, si Sefaca, dekket si Mahalaleel, si Peres, si Juda. Buèna 468 kalak janah mahantu-mahantu. Si Maaseya anak si Barukh, kempu si Kolhoze. Barang piga-piga kalak bai empungna nai imo: Si Hazaya, si Joyarib, si Zakharia, si Syela, si Juda.

⁷I marga Benjamin nai: Si Salu anak si Mesulam, kempu si Joed. Barang piga-piga kalak bai empungna nai imo: Si Pedaya, si Kolaya, si Maaseya, si Itiel dekket si Jesaya. Si Gabai dekket si Salai. Ncelket kalohon dèng ngo kalak i dekket si Salu. Pulung karina 928 kalak buèna iuluken si

⁹Joel anak si Zikhri bak wakilna, si Juda anak si Hasenua.

¹⁰Imam-imam: Si Jedaya anak si Joyarib dekket si Jakhin. Si Seraya anak si Hilkia, kempu si Mesulam. Barang piga-piga kalak bai empungna nai imo: Si Zadok, si Merayot, si Ahitub simenjujung ulaen Imam Huntuen.

¹²Karina lot ngo 822 imam simerkebbas i Bages JAHOWA. Si Adaya anak si Jeroham kempu si Pelalya. Barang piga-piga kalak bai empungna nai imo: Si Amzi, si Zakharia, si Pasyhur dekket si Malkia.

¹³Ekuten sisimpangaen i horong idi buèna 242 kalak. Si Amasai anak si Asareel, kempu si Ahzai. Empungna imo: Si Mesilemot dekket si Imer.

¹⁴Ibas horong èn nai lot ngo 128 kalak lubalang mahantu. Huntuen kalak i imo si Zabdiel, anak si Gedolim.

¹⁵Kalak Lewi: Si Semaya anak si Hasub kempu si Azrikam. Empungna imo: Si Hasabya dekket si Buni. Si Sabetai dekket si Jozabad induk kalak Lewi simengerajai ulaen i ruar Bages JAHOWA. Si Matanya anak si Mika kempu si Zabdi, ibas pemparen si Asaf nai. Ia ngo menguluken perendè ibas ulaen mersodip pesakatken lias atè. Si Bakbukya wakil si Matanya. Si Abda anak si Samua kempu si Galal, i pemparen si Jedutun nai. Pulung karina 284 kalak.

¹⁹Penjaga pèntu pengkeruhen: Si Akub, si Talmon dekket dengan-dengan kalak i. Karinana buèna 172 kalak.

²⁰Jelma keteremmen Israel, imam dekket kalak Lewi sidèbanna, merian i tanoh kalak idi i barang piga-piga kuta i Juda.

²¹Perkebbas i Bages JAHOWA merian i soki kuta Jerusalem simergerar Ofel. Mengula ngo kalak i siniuluken si Ziha dekket si Gispa.

²²Mandur kalak Lewi simerian i Jerusalem imo si Uzi anak si Bani, kempu si Hasabya. Empungna imo si Matanya dekket si Mika. Termasuk horong si Asaf ngo ia, simengkebasi oning-oningen tupung pulungen i Bages JAHOWA.

²³Gèlèren gennep horong lako menjamah oning-oningen i Bages JAHOWA sigennep ari itentuken mengèkutken hatoren raja.

²⁴Si Petahya anak si Mesezabeel ibas horong si Zera i marga Juda nai, gabè wakil bangsa Israel i istana Persia.

²⁵Mèduk ngo itengah-tengah ginemgem i nai merian i kuta sindessing dekket tahuma kalak i. Lot ngo barang piga-piga kalak ibas marga Juda nai merian i tanoh kellang-kellang Bersyeba kettan selatan dekket Napa Hinom kettan utara. Merian ngo kalak i i kuta sinisuratken i sèn dekket sosor i sikulilingna: Kiryat-Arba, Dibon, Jekabzeel Jesua, Molada, Bet-Pelet Hazar-Sual, Bersyeba Ziklag, Mekhona En-Rimon, Zora, Jarmut, Zanoah, Adulam, Azeka, Lakhis.

³¹Lot ma ngo barang piga-piga kalak marga Benjamin nai merian i Geba, Mikhmas, Ai, Betel dekket sosor-sosor sinigembarna,

³²i Anatot, i Nob, i Ananya,

³³Hazor, Rama, Gitaim,

³⁴Hadid, Zeboim, Nebalat,

³⁵Lod, Ono dekket i Napa Tukkang-tukkang.

³⁶Piga- piga nuhnuhen kalak Lewi simadèngkenna i enggo kin merian i tanoh Juda idokken mo merkebbas rebbak dekket kalak Benjamin.