Read Batak Dairi Nehemia 12 Bible Online

Nehemia 12 - Batak Dairi bible

Nehemia 12

¹Enda mo gerar-gerar imam dekket kalak Lewi sibalik i buangen nai rasken dekket si Zerubabel anak si Sealtiel dekket rasken Imam Huntuen Jesua:

²Imam-imam: Si Seraya, si Jeremia, si Esra, si Amarya, si Malukh, si Hatus, si Sekhanya, si Rehum, si Meremot, si Ido, si Ginetoi, si Abia, si Miyamin, si Maaja, si Bilga, si Semaya, si Joyarib, si Jedaya, si Salu, si Amok, si Hilkia, bak si Jedaya. Kalak i mo imam-imam èkuten i tikki si Jesua.

⁸Kalak Lewi: Simenguluken endè lias atè: Si Jesua, si Binui, si Kedmiel, si Serebya, si Juda dekket si Matanya.

⁹Anggota pulungen perèndè simengendèken endè mengaloi imo si Bakbukya, si Uni dekket denganna sada horong.

¹⁰Enda mo usur pemparen Imam Huntuen Jesua: Si Jesua, si Joyakim, si Elyasib, si Joyada,

¹¹si Jonatan, si Jadua.

¹²Enda mo gerar-gerar imam èkuten dekket horong kalak i sinderrangna si Joyakim gabè Imam Huntuen: [Imam] — [Horong] Si Meraya — Si Seraya si Hananya — si Jeremia si Mesulam — si Ezra si Johanan — si Amarya si Jonatan — si Melikhu si Josep — si Sebanya si Adna — si Harim si Helkai — si Merayot si Zakharia — si Ido si Mesulam — si Gineton si Zikhri — si Abia ..... — si Minyamin si Piltai — si Moaja si Samua — si Bilga si Jonatan — si Semaya si Matnai — si Joyarib si Uzi — si Jedaya si Kalai — si Salai si Heber — si Amok si Hasabya — si Hilkia si Netaneel — si Jedaya

²²Gerar-gerar tersèngèt èkuten kadè-kadè kalak Lewi dekket imam enggo isuratken i tikan nggelluh Imam Huntuen bagèen: Si Elyasib, si Joyada, si Johanan dekket si Jadua. Gerar-gerar idi enggo pul isurat tikan si Darius gabè raja Persia.

²³Tapi ukum tersèngèt èkuten merhorong-horong kaum Lewi pellin soh mi tikki si Jonatan kempu si Elyasib ngo kessa tersurat.

²⁴Siniuluken si Hasabya, si Serebya, si Jesua, si Binui dekket si Kadmiel, ibagi ngo kalak Lewi barang piga-piga nuhnuhen. Pukpuk mo dak lot dua nuhnuhen simerkebbas memoji JAHOWA dekket pesakatken lias atè tabasa merkitè mersialo-aloen, rembang mi hatoren Raja Daud, naposo Dèbata idi.

²⁵Simertaram i pèntu pengkeruhen Bages JAHOWA idokken menjaga gennep langgih perbekkellen i gembar pèntu pengkeruhen Bages JAHOWA imo: Si Matanya, si Bakbukya, si Obaja, si Mesulam, si Talmon dekket si Akub.

²⁶Kalak i nggelluh tikala si Joyakim anak si Jesua kempu si Jozadak janah i tikki Gubèrnur Nehemia bak Imam Ezra, simemettoh Patiin idi.

²⁷Sinderrangna irasmiken dingding pagar batu kuta Jerusalem, idiloi mo karina kalak Lewi i karina bekkas kalak idi nai, asa dekket periahken ulaen idi, merkitè endè-endè lias atè, dekket merkitè malu genderrang dekket kucapi.

²⁸Nai merpulung mo perendè ibas kaum kalak Lewi idi nai, bang simerkebbas i sikuliling kuta Jerusalem nai, bang pè i sikuliling kuta Netofa nai,

²⁹i kuta Bet-Gilgal nai, Geba dekket kuta Azmawet nai.

³⁰Karina imam dekket kalak Lewi menguras dirina ngo lebbè kalak i, nai ipè asa menguras jelma nterrem, bagi ma mi pèntu-pèntu pengkeruhen dekket dingding pagar kuta idi.

³¹Kudokken mo karina pengulu kalak Juda menangkih mi babo dingding pagar batu i lako mengatur dua nuhnuhen mbellen sinaing perotor mengkulilingi kuta i ninganna mengendèken endè pemojien mendokken lias atè bai Dèbata. Nuhnuhen perlebbè merrotor i babo dingding pagar batu i, menghuju mi kamuhun, mi Pengkeruhen Sampah.

³²Merdalan mo si Hosaya i podi perendè i, ièkutken dèba ibas pengulu kalak Juda nai.

³³Imam-imam ènda nola merdalan mo i podi kalak i ninganna menempul sarunè, imo: Si Azarya, si Ezra, si Mesulam, si Jehuda, si Benjamin, si Semaya dekket si Jeremia. Ièkutken si Zakharia anak si Jonatan, kempu si Semaya mo kalak i. Barang piga-piga ibas empung kalak idi nai imo: Si Matanya, si Mika, si Zakur i horong si Asaf nai.

³⁶I podina merdalan mo anggota-anggota ibas horongna nai, imo: Si Semaya, si Azareel, si Milalai, si Gilalai, si Maai, si Netaneel, si Jehuda dekket si Hanani. Karina ngo kalak i merembah oning-oningen, dos bagè sinipakkè Raja Daud, naposo Dèbata idi. Imam Esra, simemettoh Patiin Dèbata idi, merdalan sikira pengulu barisen idi.

³⁷Soh kessa mo mi Pèntu Pengkeruhen Laè Mercikal mengèluk mo kalak i janah mengenangkengi Kuta si Daud, nai balik mi dingding pagar batu Pèntu Pengkeruhen Laè kettan kebincaren kuta i.

³⁸Nuhnuhen perendè sisada nai merbaris i babo dingding pagar batu menghuju mi kambirang, janah kuèkutken mo rasken dekket dèba bai ginemgem idi nai. Merkènter mo kami arap Palas Perciduduen soh mi Dingding Pagar Batu Mbellang.

³⁹Nai memellus mo kami arap Pèntu Pengkeruhen Efraim, Pèntu Pengkeruhen Usang, Pèntu Pengkeruhen Ikan, Palas Hananeel, dekket Palas Mea soh mi Pèntu Pengkeruhen Biri-biri. Mentadi mo nuhnuhen nami i gembar Pèntu Pengkeruhen Pertaramen i gembar Bages JAHOWA.

⁴⁰Nai sakat mo duana nuhnuhen perendè idi mi gembar Bages JAHOWA. Laènken pengulu-pengulu sininuhnuhenku,

⁴¹dekket ma ngo imam-imam simenempul sarunè, imo: Si Elyakim, si Maaseya, si Mi- nyamin, si Mika, si Elyoënai, si Zakharia dekket si Hananya;

⁴²i podi kalak i merdalan mo si Maaseya, si Semaya, si Eleazar, si Uzi, si Johanan, si Malkia, si Elam dekket si Ezer. Merendè ngo perendè i siniuluken si Jizrahya.

⁴³Sidarinkenna i mèduk ngo pèlèen ipèlèken bai JAHOWA. Mersampang atè ngo sinterrem i kumerna enggo ibaing Dèbata kalak i mersennang-sennang. Engket ngo merpèsta daberru bak anak-anak, janah terdengkoh ngo sora iaia kalak i soh mi ndaoh.

⁴⁴Tikanna i lot ngo barang piga-piga kalak ibakin lako menjaga langgih perbekkellen bekkas memennep penumpakiin mi Bages JAHOWA, bagidi dekket pèlèen nipersipuluh hasil perlebbè ibas ndiula nai gennep tahun. Kennah ipepulung simenjaga i ngo karina penumpaki idi i juma sikuliling gennep kuta nai. Karina penumpakiin idi iberèken taba imam-imam dekket kalak Lewi idi rembang mi hatoren Patien. Ihargai kalak Juda ngo imam-imam bak kalak Lewi,

⁴⁵kumerna kalak idi ngo simengkebasken ulaen menguras dekket ulaen sidèbanna sienggo iperèntahken Dèbata. Bagi ma ngo peroning-oning dekket pertaram pengkeruhen Bages JAHOWA, iulaken kalak idi ngo bahanna, rembang bagè sinihatorken Raja Daud dekket si Salomo, anakna idi.

⁴⁶Kessa nai i umur Raja Daud dekket si Asaf pandè oning-oning i, enggo mo dak ièndèken perendè endè-endè pemojien lias atè taba Dèbata.

⁴⁷Tikan nggelluh si Zerubabel dekket tikan si Nehemia, karina keteremmen kalak Israel merèken pèlèen lako mencukupi keperluen sigennep ari bai perendè dekket pertaram pengkeruhen Bages JAHOWA. Iberèken ginemgem idi ngo pèlèen simerkedekoen bai kalak Lewi, janah iberèken kalak Lewi ma mo bai imam-imam perbagianen sienggo itentuken kin.