Read Batak Dairi Nehemia 13 Bible Online

Nehemia 13 - Batak Dairi bible

Nehemia 13

¹Sidangna ijakaken patiin si Musa bai jelma nterrem, jupa mo keterangen ènda: ‘Kalak Amon dekket kalak Moab mak ndorok mersaor dekket ummat Dèbata;

²kumerna sidang i perdalanen bangsa Israel mbungkas i Mesir nai, oda nggèut bangsa sidua idi memerèken pangaen dekket laè taba bangsa i. Balikna nola gabè iupahi kalak i ngo si Bileam lako menumpahi bangsa Israel, tapi gabè itukar Dèbatanta ngo sumpah idi gabè pasu-pasu.’

³Tikan idengkoh bangsa Israel kessa mo idi, ipesisi kalak i mo karina bangsa sidèban bai kalak Israel nai.

⁴Sinderrang madèng i Imam Elyasib, sienggo idokken kin menjamotken langgih-langgih perbekkellen i Bages JAHOWA, selloh kin ngo peralè-alèenkenna dekket si Tobia.

⁵Iberèken si Elyasib ngo bai si Tobia sada bilik mbellen, situhuna bekkas ipèmaken mahan bekkas pemeneppen pèlèen pagè, kemenjen, haliu sipakèen i Bages JAHOWA, pèlèen bai imam, nipersipuluh pagè, anggur, dekket minak zaitun, sinaing pella-pellaenken bai kalak Lewi, peroning-oning dekket pertaram pengkeruhen Bages JAHOWA kin ngo nemmu i.

⁶Tikan masa tersèngèt idi, tupung ngo aku oda i Jerusalem, kumerna i tahun petellupuluh duaken pemerèntahen si Artahsasta, raja Babel, laus ngo aku mi Babel lako menghadep raja. Kessa pè tah sadikè dekkah nola asa iduè aku,

⁷balik mi Jerusalem. Kessa soh mi sèn, tersengget ngo aku kessa kubettoh enggo iberèken si Elyasib sada bilik bai si Tobia i Bages JAHOWA.

⁸Melaga kalohon mo aku janah kupembentirken mo karina ugasen si Tobia i mi ruar.

⁹Nai kudokken mo asa ibakin kerja menguras bilik idi. Enggo kessa i kuolihken mo mi sidi karina pèlèen pagè dekket kemènjen bak haliu Bages JAHOWA.

¹⁰Laènkenna i, kudapet ngo ukum peroning-oning dekket kalak Lewi enggo menadingken Jerusalem janah balik mi jumana gennep, kumerna oda nèngè icukupi sinterrem idi keperluen kalak idi.

¹¹Nai kupincang mo nasa simpantasniasè kumerna enggo ibelli kalak i terbengkella Bages JAHOWA. Nai kudiloi mo balik kalak Lewi dekket peroning-oning idi janah kudokken nola mengolihi merkebbas.

¹²Nai tubenna nola mo karina kalak Israel memerèken nipersipuluh pagè, anggur, dekket minak zaitun, bak menaruhken mi bilik perbekkellen.

¹³Kudokken mo kalakna lako menjamotken bilik perbekkellen idi imo: Imam Selemya, si Zadok sada kalak simettoh Patiin dekket si Pedaya sada kalak Lewi. Kubakin mo si Hanan anak si Zakur kempu si Matanya mengurupi kalak i. Kubettoh ngo ukum kalak èn kettoken ngo janah mengurus perbagina barang-barang idi taba dengan-denganna sada ulaen ibagasen sènteng.

¹⁴Alè Dèbatangku, èngèt mo karina si- enggo kubakin i mi BagesMu dekket meng- kebasisa.

¹⁵Tikalana idi kuidah ngo tupung ari Sabat pè lot ngo barang piga-piga kalak i Juda mengilang anggur. Lot ma ngo dèba kalak simemakin pagè, anggur, buah anggur, buah kayu ara dekket ugas-ugasen sidèban mi babo kalodèna janah merembah mi Jerusalem. Kugerra mo kalak i mertiga-tiga i Jerusalem.

¹⁶Lot ma barang piga-piga kalak i Tirus nai roh mi Jerusalem merembah ikan dekket mermatcam bagè tiga-tigana mi Jerusalem tupung ari Sabat, lako dèaenna bai kalak Jahudi.

¹⁷Kupesèngèt ngo pengulu- pengulu kalak Juda janah kudokken, “Oda ngo satdar kènè ai enggo iulaken kènè kejahaten kumerna mengelèai ari Sabat?

¹⁸Kumernaken dosa sibagèn i ngo asa ihukum Dèbata empungta janah mengelala kuta ènda. Mada ngo naing itambahi kènè dèng ma pungur Dèbata taba Israel merkitè mengelèai ari Sabat?”

¹⁹Kumerna i kuperèntahken mo asa gennep mendapetken ari Sabat, imo ari Jumahat ciboen, karina pèntu pengkeruhen kuta mènter mo itutup enggo kessa bon ari, janah mak ndorok ibuka kum mak dèng dung ari Sabat, ari Sabtu ciboen. Kubakin mo barang piga-piga kalak anggotangku i gennep pèntu pengkeruhen idi lako menjaga asa i ari Sabat oda lot tiga-tiga mbengket mi bagasen kuta.

²⁰Tapi lot ngo sipata tah piga-piga kalak pertiga-tiga dekket perdèa-dèa enggo mermalam i balik dingding pagar batu tupung ari Jumahat berngin.

²¹Kudokken mo taba kalak i, “Sia-sia ngo ipèma kènè i sidi soh mi siceggen. Manat, mula ibakin kènè dèng bagidi sikali nai, mposi mo kubaing taba kènè!” Mungkah i sidi nai oda nèngè pennah roh kalak i tupung ari Sabat.

²²Nai kudokken mo kalak Lewi menguras dekket menjaga pèntu-pèntu pengkeruhen lako menjamotken asa karina kalak pesangap- ken ari Sabat. Mersodip mo aku, “Alè Dèbata, dak èngèt mo aku kumerna simasa i ma, janah masèh mo atèMu baku rembang mi masèh atèmu simbelgah i.”

²³Tikalana i ma, enggo mèduk kuidah kalak Jahudi jejap dekket daberru-daberru bangsa Asdod, Amon dekket Moab.

²⁴Dèba dukak-dukak kalak idi oda iantusi nèngè kata Jahudi, tapi gabè kata Asdod barang kata sidèbanna i nai ngo.

²⁵Kupincang janah kusumpahi ngo kalak i. Lot ngo dèba kutendelli dekket kujambul bukna. Nai kudokken mo kalak i mersumpah merkitè gerar Dèbata magahken oda nèngè kalak i bak dukak-dukakna memuat berru sidèban.

²⁶Ningku mo, “Otang dosa sibagèen i ngo sinibahanken Raja Salomo? Oda ngo nemmu lot nèngè raja i dunia èn sitermurmuren daripadasa. Ikekelengi Dèbata ngo ia janah ipebangkit ngo ia gabè raja i suberri Israel. Tukasi nola pè bagidi enggo iajar-ajari daberru-daberru bangsa sidèban i ia lako mengulaken dosa.

²⁷Sondel kinijahat ngo ulah-ulah ndènè i! Pang ngo kènè mengalo Dèbata merkitè memuat berru bangsa sidèban!”

²⁸Si Joyada imo anak Imam Huntuen Elyasib, tapi sada kalak ibas anak si Joyada nai enggo gabè kèla si Sanbalat i kuta Bet-Horon. Kumerna i kupelaus mo si Joyada i Jerusalem nai.

²⁹Mersodip mo aku, “Alè Dèbatangku, èngèt mo barang bakunè cara kalak i mengelèai ulaen imam dekket perpadanenMu meradepken imam-imam bak kalak Lewi!”

³⁰Bagidi mo pemaingku pepantingken bangsa Israel ibas sagumanna simelamun nai. Kupetattah mo hatoren-hatoren taba imam-imam dekket kalak Lewi, asa dak lot ulaen kalak i gennep.

³¹Kuatur ma ngo asa tupung tikki merkedekoen, ndorok ipèmaken sebban keperluen memèlèken pèlèen, janah ndorok ginemgem i menaruhken pèlèen hasil perlebbè cinametna i. Ujungna mersodip mo aku, “Alè Dèbatangku, èngèt mo karinana i janah pasu-pasu mo aku.”