Read Batak Dairi Nehemia 2 Bible Online

Nehemia 2 - Batak Dairi bible

Nehemia 2

¹Tikan sidari, kessa empat bulan nai nola, imo tupung Nisan, sidangna mangan Raja Artahsasta, kuhantari mo anggur bana, tapi ncèrben ngo abèngku. Oda nung dèng aku ncerben idahen i lebbèna bagè sidarinkenna idi.

²Kumerna i mengkuso mo ia, “Kasa bagi bonekmu idahen padahal oda ngo mersakit? Pasti kennah lot barang tah kadè iarsakken kono.” Tersengget mo aku,

³nai kualoi mo, “Njuah-njuah mo Rajai soh mi amman sumendah! Bakunè mo mak bonek aku naposomu èn, mula kuta bekkas kuburen empung naposomu ènda bagèndari tading pellin rumpak-rumpakna nai ngo janah pèntu pengkeruhenna enggo kerri ilekkup api.”

⁴Ikusoi raja i mo, “Nai kadè ngo pana ipergeddo ukurmu?” Ibagasen ukur mersodip mo aku taba Dèbata simerkuasa i sorga,

⁵nai ningku mo taba raja i, “Mula selloh dokatè Rajai janah iuèi kènè pengidoen naposo ndènè, pasulak mo naposomu ènda mi tanoh Juda, lako peliasken balik kuta bekkas kuburen empung naposomu ènda.”

⁶Nai iuèi raja si kundul rasken dekket Bindoharana i mo sikupidoken. Ikusoken mo barang sadikè dekkahna aku merian i sadèi, janah ndigan balik, nai kubagahken mo tabasa ari sienggo kutiti kin.

⁷Kessa i kupido mo surat embahen bai gubèrnur i propinsi Efrat Kesunduten, asa ipemudah kalak i perdalanenku sakat mi Juda.

⁸Laènkenna i, kupido dèng ma ngo surat lako bai si Asaf, simenjaga rambah kerajaen, asa ipèmaken kayu mahan pèntu pengkeruhen bèntèng i gembar Bages JAHOWA, dekket lako mahan pagar kuta bak bages sinaing kuiani. Iuèi raja i ngo karina pengidoenku idi, kumerna iurupi Dèbata ngo aku.

⁹Rasken dekket barang piga-piga kalak pakalima dekket soridadu merkuda siniperèntahken raja i lako mendengani aku, berkat mo aku mi Efrat Kesunduten. Kuberèken mo surat i bai karina gubèrnur.

¹⁰Tapi tikan idengkoh si Sanbalat, kalak Bet-Horon dekket si Tobia, sada kalak pugabè simersangap i Amon nai, ukum pekirohku lako keperluen bangsa Israel, nggogo kalohon mo atè kalak i.

¹¹Sakat mo aku mi Jerusalem, nai perongkahken badan mo tellu ari.

¹²Sidekkahna i oda lot bai isè kubagahken, Dèbata ngo menettoi aku lako pekadèken kuta Jerusalem i mengolihi. Sibarembenkenna berngin- berngin ndungo mo aku, nai kuarahken mo barang piga-piga kalak dengan laus mi ruar kuta i. Oda lot kuembah kami pinakan sidèban, laènken kalodè sikukunduli.

¹³Gellap dèng ngo ari, sinderrangna kutadingken kami kuta i memellus arap Pèntu Pengkeruhen Lembeng kan kesunduten. Kuhuju kami mo mi selatan, mi Pèntu Pengkeruhen Sampah, memellus arap Laè Mata-mata Naga. Tikan perdalanen idi, kuperèso mo karina simercèdaen i dingding pagar kuta i, janah kuidah ma mo pèntu pengkeruhen sienggo kerri ipangani api.

¹⁴Enggo kessa i nola terrus mo kami mi utara arap kebincaren kuta i, mi Pèntu Pengkeruhen Laè Mercikal dekket Bendar Raja. Tapi oda lot i sidi dalan sindorok idalani kalodè sikupasang i, kumerna mbuèsu batu merentuh.

¹⁵Nai mengencuah mo kami mi Lembeng Kidron janah menerrusken perdalanen bernginkenna i, ninganna memerèso dingding pagar kuta. Enggo kessa i mengèluk mo kami janah balik mi kuta arap Pèntu Pengkeruhen Napa.

¹⁶Sada kalak poda ibas simpantasniasè nai memettoh barang pak dikè aku laus, janah barang kadè sikusura-sura i. Kumerna soh mi katika i oda lot dèng barang kadè kubagahken bai denganku sada bangsa, bang bai imam barang pè bai simpantasniasè, barang pè taba pugabè-pugabè, dekket barang isè sambing sinaing dekket peliasken kuta Jerusalem.

¹⁷Tapi ningku nola mo taba kalak i, “Tengen kènè mo kinidersanta ènda! Pellin tading rumpak-rumpak nai ngo kessa Jerusalem janah pèntu-pèntu pengkeruhenna pè enggo kerri melekkup. Aci mo kita asa sipelias nola balik dingding pagar kuta Jerusalem asa ulang nèngè kita ilèai.”

¹⁸Nai kusukutken mo taba kalak i bakunè cara Dèbata lako mengurupi aku janah kadè sienggo idokken raja taba aku. Ialoi kalak idi mo, “Aci mo, sitebenai peliasken!” Nai merkebbas-kebbas mo kalak idi lako tubenna karèjo.

¹⁹Tikan terbettoh taki nami idi bai si Sanbalat, si Tobia dekket si Gesyem, sada kalak Arab, itertabai janah irèhè kalak i mo kami. Nina kalak i, “Kadè pana sinaing ulanken ndènè? Tah mada ngo naing memberontak nola kènè taba raja?”

²⁰Kualoi mo, “Dèbata simerkuasa i sorga i ngo naing menumpak bahaen nami gabè merhasil. NaposoNa ngo kami janah naing kutebennai kami mo membangun. Tapi ukum kènè oda lot kadè hak bak milik ndènè i Jerusalem. Balikna mula lot jelma mengerana tersèngèt Jerusalem, oda lot igegoli ukum gerar ndènè.”