Read Batak Dairi Nehemia 4 Bible Online

Nehemia 4 - Batak Dairi bible

Nehemia 4

¹Tikanna idengkoh si Sanbalat ukum kami kalak Jahudi sidang pekadèken pagar kuta i, gabè melaga kalohon mo ia janah itubennai mo mengerèhèi kami.

²Idokken mo i lebbè dengan-denganna dekket soridadu Samaria, “Kadè ngo sinibahan kalak Jahudi simerjaya siso mergoldè adoi? Mada ngo naing ipekkadè kalak i nola kuta ènda? Idok kalak i ngo ndorok pul ulaen idi ibagasen sidari, pellin merkitè memèlèken pèlèen sambing? Ndorok ngo katèna ibakin kalak i sampah simertèmbun sienggo messeng i gabè batu-batu dingding pagar?”

³Nai nina si Tobia sicènder i gembarna i ma mo, “Tengen kènè mo dingding pagar batu sinipecèndek kalak i! Kocing utan pè ndorok ngo mengerumpakken i!”

⁴Nai mersodip mo aku, “Ialè Dèbata, dengkohken mo barang bakunè pengelèai kalak i bai nami! Sempaken mo pengelèai kalak idi mi babo ntakal kalak i. Belli mo harta milik kalak i ilaum janah ibantun, janah kalak i sendiri itaban mi nagerri ndèba.

⁵Ulang mo ampuni kejahaten kalak i janah ulang lupaken dosa kalak i, kumerna enggo ilèai kalak i kami situpung sidang membangun èn.”

⁶Sidekkah bagidi tong ngo kuempet kami pekadèken dingding pagar batu i, janah oda sadikè dekkah pul mo enggo karina dingding pagar batu i, terpekadè enggo sitengah datesna, kumerna mertuhu-tuhu ngo jelma nterrem i mahan bahaen.

⁷Tikan idengkoh si Sanbalat, si Tobia dekket jelma kalak Amon bak Asdod bang kalak Arab enggo makin sautna peliasken dingding pagar batu Jerusalem i janah nasa ruang-ruang sinidingding pagar batu i enggo tubenna itutup, gabè melaga kalohon mo kalak i.

⁸Mertaki mo kalak i naing menjuhap Jerusalem lako pemasaken kegontaren.

⁹Kumerna i mersodip mo kami taba Dèbata nami janah menjaga kuta idi mahar ari berngin.

¹⁰Tapi imulai kalak Juda mo mengendèken endè: “Kerri gegohta lako merembah embahen, keppèken mèduk dèng sampah merpelguken. Bagè mak tellap nèngè pengakapta karèjo bagèen pekadèken dingding pagar batu kuta èn.”

¹¹Sinderrangna bagidi mertaki ngo musuh nami sintempu lako menjuhap kami, lako memunuh kami asa sondat ulaen nami.

¹²Tapi nggati ngo roh taba kami, kalak Jahudi simerian i gembar kalak i lako memagahken taki musuh idi.

¹³Kumerna i kupempellaken mo peddang, kujur dekket panah bai ginemgem, nai kusagiken mo kalak i mengèkutken horongna i podi dingding pagar batu i, i bekkas siso dung dèng ipekkadè.

¹⁴Tikan kuidah bagè buradan ngo ginemgem i, kudokken mo bai kalak i dekket bai simpantasniasè bak pengulu-pengulu, “Ulang kebiari kè musuh i! Engèt kènè mo Jahowa pergegoh janah mahantu, janah juhap mo kè lako bai kaka-anggi ndènè, dukak-dukak, sinibages dekket bages ndènè!”

¹⁵Terbertik ngo bai musuh nami enggo kubettoh kami taki kalak i. Nai satdar mo kalak i, Dèbata ngo menondati taki kalak i. Nai kuolihi kami karina nola mo karèjo pekadèken dingding pagar batu i.

¹⁶Tapi mungkah i ari i nai, pellin site- ngah nai ngo kessa anak buahku sikarèjona, ukum sitengah nai merjaga-jaga ngo janah merpakèen baju geraha janah mersinjataken kujur, tambeng-tambeng dekket panah. Mertuhu-tuhu ngo karina pengulu ginemgem memerèken penumpaki bai ginemgem,

¹⁷situpung peliasken dingding pagar batu i. Karina perlanja simenaruhi haliu i merkitè serrap tangan, ukum serrap tangan nai menjèmak sinjata.

¹⁸Tukkang-tukkang batu karèjo, tapi mbenting ngo peddang i abakna. Simenempul sarunè magahken mara, dak tong ngo i gembarku.

¹⁹Nai kudokken mo taba jelma nterrem, simpantasniasè bak karina pengulu, “Enggo makin mbellang janah makin ndaohna sibahanenta èn, gabè mèrap bagidi ngo kita mengèkutken nggeddangna dingding pagar batu èn, enggo pedaoh-daoh sisada bai sisada nai.

²⁰Asa, mula idengkoh kènè sora sarunè, mèter ndor mo merpulung i sikuliling nami i sènda. Dèbatanta ngo mergeraha mengkepkep kita.”

²¹Bagidi mo kami karèjo mungkah siceggen nai soh mi taridah nola bintang i langit cibonkenna. Sitengah mo ibas ginemgem idi nai peka- dèken dingding pagar batu, janah sidèbanna i merjaga-jaga mo menjèmak kujur i tanganna.

²²Sidekkah mahan bahaen i karina perkebbas dekket pengurupi kalak i, kudokken mo merberngin i Jerusalem. Merkitè dalan bagidi ndorok mo kami menjaga kuta i tupung berngin janah tikan mahar pekadèken dingding pagar batu.

²³Aku sendiri pè, bang dengan-denganku, anak buahku dekket pengabalku dak tong ngo memakè pakkèen mengula, bang mahar bang berngin pè. Dak tong ngo kami merjaga ninganna sinjata i tangan.