Read Batak Dairi Nehemia 5 Bible Online

Nehemia 5 - Batak Dairi bible

Nehemia 5

¹Daoh-daoh arien nola, mèduk mo kalak Jahudi, anak laki bak daberru, tubenna kelsohen tersèngèt denganna sada bangsa.

²Lot ngo simendokken, “Anakku mbuè. Perlu ngo bai nami pagè mahan nggelluh nami.”

³Lot dèba mendokken, “Terpaksa ngo kugadèken juma, pekken anggur dekket sapo nami lako menokor pagè asa ulang matè rapar kami.”

⁴Janah lot dèng ma ngo dèba mendokken, “Enggo merjual kèpèng kami lako menggarar asa cingki belasting sienggo itentuken raja belasting juma dekket pekken anggur nami.

⁵Otang kalak Jahudi ma ngo kami? Otang dos ngo dukak nami dekket dukak-dukak kalak Jahudi sidèban i? Tukasi pè bagidi kubelli kami ngo dukak-dukak nami gabè hamba. Enggo ngo lot dèba berru nami terdèa gabè hamba. Oda terdokken kami barang bakunè kerna enggo kugadèken kami juma dekket pekken anggur nami.”

⁶Mendengkoh pehehui kalak idi, gabè melaga kalohon mo aku,

⁷janah menekatken lako mertindak. Nai kupesèngèt mo karina simpantasniasè dekket èkuten ginemgem. Ningku mo, “Ipekia-kia kènè ngo kaka-anggi ndènè!” Nai kuuluken mo runggu sinunu lako menangani simasa i,

⁸janah mendokken, “Nasa tuk gegohta enggo sibaing menebbus kaka-angginta kalak Jahudi siso terjua kennah merdèa dirina bai bangsa sidèban. Tapi keppè bagèndari gabè kènè nola ngo memaksa kalak i merdèa dirina taba kènè, keppèken kènè pè kalak Jahudi ngo!” Singkebabah sora poda teraloen pengulu-pengulu idi.

⁹Nai ningku dèng ma, “Oda toko ulah-ulah ndènè i! Patutna kennah merkebiaren ngo kènè nemmu taba Dèbata. Merkitè dalan bagidi tentu oda nèngè lot dalan ibakin kènè taba musuhta siso mertuhan i lako mengelèai kita.

¹⁰Aku sendiri, kene alè kaka-anggingku dekket dengan-denganku enggo pejualken kèpèng dekket pagè bai ginemgem. Oda pella kutunggu kami nèngè i balik.

¹¹Kènè pè naing mo menelangsaèken utang-utang ginemgem bai ndènè i, bang pè i utang kèpèng barang pè pagè, bang nola pè anggur barang minak Zaitun. Olihken kènè mo ndor juma, pekken anggur, pekken zaitun dekket bages kalak i!”

¹²Ialoi karina pengulu idi mo, “Kuuèi kami pè sipesèngèt ndènè i. Kuulaken kami pè karinana janah oda kupido kami nèngè gararna barang kadè pè bai kalak i nai.” Nai kudiloi mo imam-imam janah kudokken mo pengulu-pengulu i ndai mersumpah i lebbè imam-imam idi, magahken tuhu karina sienggo niruapken kalak i, kennah ibahanken.

¹³Nai kutalkasi mo tali abakku nai kusamsamken ninganna mendokken, “Bagèen mo nemmu isamsamken Dèbata barang isè kalak siso memahèi padanna. Gabè mpersuk mo akapenna, ibuat Dèbata mo sapo dekket hartana!” Karina sinterrem idi mengaloi, “Amèn!” nai ipoji mo JAHOWA. Asa ipahèi pengulu-pengulu idi mo padan kalak idi i.

¹⁴Enggo mo gabè gubèrnur Juda aku sipuluh dua tahun dekkahna, imo memungkah i tahun peduapuluhken nai soh mi tahun petellupuluhduaken pemerèntahen Raja Artahsasta. Sidekkahna i mo tukasi pè aku gubèrnur, bagi dekket kaka-anggingku oda nung kubuat upahku.

¹⁵Ukum gubèrnur lebbèenkenku, dakdak ngo gabè boban taba ginemgem kerna ipaksa kalak i ngo 40 kèpèng pirak sidari menokor pangaen dekket anggur. Dekket ngo pugabè-pugabè kalak idi pè memetcek ginemgem. Tapi oda nggèut aku memakin bagidi kumerna merkebiaren ngo aku taba Dèbata.

¹⁶Nasa gegohku kutunahken ngo lako pekadèken dingding pagar batu, janah oda lot terolih tanoh giam cituk pè sikira upahku, kasi pè karina pengurupingku dekket ngo karèjo i pembangunen idi.

¹⁷Siratus limapuluh kalak Jahudi dekket simpantas niasè ncemmal ngo kutamuèi mangan i bagesku, oda niètong dèng tamuè siroh i bangsa-bangsa cibal baleng nami nai.

¹⁸Gennep ari ngo kuhantari ipas ucangku nai sada lembu, ennem biri-biri nggomok janah mèduk dèng manuk. Ninganna dèng, gennep dapet sipuluh ari dak kucukupi ngo taha-taha anggurku. Kasi pè bagidi oda nggèut aku mengido upahku gubèrnur, kumerna enggo kubettoh enggo mbotong kalohon boban sipersanen ginemgem.

¹⁹Pengidoenku alè Dèbata, èngèt mo karina sienggo kubaing i bai bangsa èn janah pasu-pasu mo aku.