Read Batak Dairi Nehemia 6 Bible Online

Nehemia 6 - Batak Dairi bible

Nehemia 6

¹Idengkoh si Sanbalat, si Tobia, si Gesyem dekket musuh-musuh nami sidèbanna idi mo enggo pul kupekkadè kami dingding pagar batu i, janah karina simeruangna enggo ipètut, tukasi pè tikanna i oda dèng ileketken kami pèntu-pèntu pengkeruhen kuta i.

²Nai itengesken si Sanbalat dekket si Gesyem mo dilo-dilo taba aku asa roh lako merrunggu dekket kalak i i sada kuta i Napa Ono. Tapi kubettoh ngo naing memakin mara kalak i taba aku.

³Kumarna i kutengesken mo alus bagèen taba kalak i, “Oda terbaing aku roh kerna tupung lot ulaen bahanenku penting. Lao ngo ulaen idi mula kutadingken lako pejumpa dekket kènè.”

⁴Sanga ngo empat kali kalak i menengesken dilo-dilo bagidi taba aku, janah dak dos ma ngo tong pengaloingku.

⁵Pelima kaliken roh ngo sada kalak anak buah si Sanbalat janah merèken surat terbuka,

⁶bagèen katana: “Tuhu ngo nina si Gesyem lot bertikna i bangsa-bangsa silot i sikuliling i sèn, mendokken naing mertaki memberontak ngo kènè dekket karina kalak Jahudi, janah kumernaken i ngo asa ipelias kènè dingding pagar batu kuta èn. Idokken dèng ma ngo naing ipebangkit kènè diri ndènè gabè raja Juda,

⁷janah enggo meneddo barang piga-piga kalak nabi lako menettahken kènè i Jerusalem. Bakunè pè kennah soh ngo bertikna idi bai raja. Kumerna i, roh mo kono lako mengarihken tersèngèt mi si.”

⁸Tapi kutenges mo pengaloingku bagèen, “Karina sinidokken ndènè idi sada poda tuhu i janah pellin sura-suramu sambing ngo i.”

⁹Icuba kalak i ngo mencubiari kami asa kupetadi kami bahanen idi. Mersodip mo Aku, “Alè Dèbata, pergegohi mo aku!”

¹⁰I sinderrangna i ma, laus mo aku mi bages si Semaya anak si Delaya janah kempu si Mehetabeel, kumerna merhalangen ia roh mendahi aku. Nina mo mbang aku, “Laus mo kita sidua ciboni mi Bages Jahowa. Sigerruk mo karina pèntuna, kumerna lot ngo kalak naing memunuh kono. Katèngku berngin èn ngo kono naing ibunuh.”

¹¹Tapi kualoi mo, “Ukum aku oda ngo bagè kalak singgèut mutput. Bagè jelma biasa aku oda ndorok memengketti Bages Jahowa, asa ulang matè aku. Malot i, oda nggèut aku!”

¹²Enggo kessa kupikir-pikiri tersèngèt mi si, satdar mo aku ukum rana si Semaya idi oda ngo bai Dèbata nai, tapi bai si Tobia dekket si Sanbalat nai ngo. Enggo isisip kalak i si Semaya lako magahken alaten idi taba aku.

¹³Taki kalak i imo asa mbiar aku katèna janah asa kuuèi sinidokken kalak i asa merdosa. Merkitè bagidi dapet kalak i mo kesempaten lako peroha-rohaken gerarku asa gabè buah bibir ndèba aku.

¹⁴Mersodip mo aku, “Alè Dèbata, èngèt mo kadè sinibakin si Tobia dekket si Sanbalat idi. Hukum mo kalak i! Bagi ma dekket sada kalak nabi daberru mergerar si Noaja dekket nabi-nabi sidèban sinaing pebiar-biarken aku.”

¹⁵Sanga ngo 52 ari dekkahna pekadèken dingding pagar batu i, janah dung mo bahanen i i ari duapuluh lima bulan Elul.

¹⁶Tikan idengkoh musuh-musuh nami bangsa-bangsa i sikuliling sini sidi, tersèngèt i, mbiar ngo kalak i kenna kememalu, kumerna karina ngo kalak bettoh-bettohen iulaken kami pè bahanen idi merdenganken pengurupien Dèbata ngo.

¹⁷Sinderrang bagidi dak tong dèng ngo pengulu-pengulu Jahudi mersitengessen surat dekket si Tobia.

¹⁸Mèduk ngo kalak Jahudi merdengan taba si Tobia, kumernaken kèla si Sekhanya anak si Arah ngo ia. Janah dèng ma si Johanan, anak si Tobia, memuat berru si Mesulam anak si Berekhya.

¹⁹Tukasi pè dak pukpuk memaingken surat taba aku lako mencubiari aku, dak igegol-gegoli pengulu kalak Jahudi i ngo karina simendè ibaing si Tobia i lebbèngku. Laènkenna i karina sikuranaken, ibagahken kalak i ngo mbangsa.