Read Batak Dairi Nehemia 8 Bible Online

Nehemia 8 - Batak Dairi bible

Nehemia 8

¹I bulan pitu enggo mo menettap kalak Israel i kutana gennep. I ari sada bulan idi mertumpu mo kalak i karina i Jerusalem, i kasèan i lebbè Pèntu Pengkeruhen Laè. Ipengido kalak i ngo asa ialeng Imam Esra Bukku Patin, sada kalak simpantas ibas Patin siniberèken JAHOWA taba Israel merkitè si Musa.

²Nai iembah si Esra mo bukku i mi lebbè jelma nterrem anak laki simertumpu i balè, daberru, anak-anak sienggo terkira ndorok mengarusi.

³Nai memungkah siceggen nai soh mi cèger ari, ijakaken si Esra mo Patin idi bai kalak i. Karinana ngo kalak i mertuhu-tuhu mendengkohken.

⁴Cènder mo si Esra i langgaten kayu sienggo ipecèndek mi keperluen perpulungen idi. Kettan kamuhunna cènder ngo: Si Matica, si Sema, si Anaya, si Uria, si Hilkia dekket si Maaseya; kettan kambirangna cènder ma mo: Si Pedaya, si Misael, si Malkia, si Hasum, si Hasbadana, si Zakharia dekket si Mesulam.

⁵Datessen ngo bekkas si Esra cènder i dari pada jelma nterrem idi, gabè ndorok mo kalak i karina mengidahsa. Enggo kessa ibuka bukku i, mèter cènder mo jelma nterrem i karina.

⁶Nina si Esra mo, “Poji mo JAHOWA, Dèbata sintèmbul i!” Karina ginemgem i pekèrbangken tanganna mi babo janah mengaloi, “Amèn, amèn!” Nai sujud mo kalak i menembah Dèbata.

⁷Enggo kessa bagi kèkè mo kalak i janah cènder i bekkasna gennep, ningan bagidi ipeterrang barang piga-piga kalak Lewi mo tersèngèt Patiin idi bai kalak i. Kalak Lewi idi imo: Si Jesua, si Bani, si Serebya, si Jamin, si Akub, si Sabetai, si Hodia, si Maaseya, si Kelita, si Azarya, si Jozabad, si Hanan dekket si Pelaya.

⁸Iterjemahken kalak i mo Patin Dèbata idi sada-sada bagian janah menerangken gabè iantusi ginemgem i mo sinijakaken idi.

⁹Mendengkoh ijakaken Patin idi, gabè melui mo ukur jelma nterrem i, janah mertangisen. Nai nina gubèrnur Nehemia mo, dekket Imam Esra si pandè Patin i, bak kalak Lewi simenerangken Patin idi mo taba karina ginemgem i bagèen, “Ari merkedekoen bai JAHOWA Dèbata ndènè ngo ari èn, jadi ulang mo kènè bonek barang pè tangis.

¹⁰Bagèndari pè balik mo kènè; mangan janah mènum mo kè ibagsaen sampang atè. Berèken kènè mo dèba ibas pangaen dekket anggur ndènè nai bai kalak sikurangen. Ai ari merkedekoen bai Jahowa ngo ari èn, jadi ulang kènè susah. Sampang atè siniberèken JAHOWA bai ndènè i mo mempergegohi kènè.”

¹¹Kalak Lewi pè dekket ngo mengapoi jelma nterrem i janah mulak-ulak mendokken, “Ulang bonek ibas ari simerkedekoen ènda.”

¹²Nai merbaliken mo karina jelma nterrem i lako mangan dekket mènum ninganna memella-mellaken pangaen bai kalak sidèban. Lolo ngo kalak i kumerna enggo iantusi lapaten sinijaka sinidengkoh kalak i.

¹³Sibarembenkenna mertumpu mo karina pengulu horong, imam-imam dekket kalak Lewi, nai laus mo mendahi si Esra lako mengguruken nasa peddah ibas Patin JAHOWA nai.

¹⁴Jupa kalak i mo ibas Patin siniberèken JAHOWA merkitè si Musa, idokken JAHOWA ngo bangsa Israel merian ibas sapo-sapo dagang sidekkah pèsta Sapo-sapo.

¹⁵Kumerna i, itingtingken kalak i mo i suberri Jerusalem i gennep kuta dekket i gennep sosor bagènda, “Laus mo kènè mi delleng janah buati kènè mo dahan-dahan kayu sempènur, zaitun, kayu simerminak, palma dekket kayu-kayu sidèban lako memahan sapo-sapo rembang bagè sinihatorken ibas Bukku Patin.”

¹⁶Nai merlausen mo jelma nterrem i memuati dahan-dahan kayu idi. Karina mo kalak i memahan sapo-sapo i babo ntarum ndèas i babo sapo kalak i, i kasèan sapona, i kasèan lebbè Bages JAHOWA, i kasèan sinigembar Pèntu Pengkeruhen Laè dekket i kasèan i gembar Pèntu Pengkeruhen Efraim.

¹⁷Karina jelma sienggo balik i buangen i nai memahan sapo-sapo idi, nai merian mo i sidi. Enda dèng mo perlebbè kalohon ibakin kalak i bagidi kessa nai tikki si Josua anak si Nun, nai karina mo kalak i sennang janah lolo.

¹⁸Pitu ari dekkahna merpèsta kalak i. Gennep ari mo ijakaken si Esra bagian- bagian bukku Patin Dèbata. I ari peualuhken ibakin mo acara samsam bulung, rembang mi hatoren Patin.