Read Batak Dairi Nehemia 9 Bible Online

Nehemia 9 - Batak Dairi bible

Nehemia 9

¹I ari duapuluh empat bulan idi ma, mertumpu mo bangsa Israel. Puasa mo kalak i lako menuduhken penelsellen kumarna dosa-dosa kalak i. Ipelingkang kalak i mo dirina bai karina jelma sidèban nai. Sikira tanda merbonek atè, ipakkè kalak i mo kaèn goni janah icircirken tanoh mi takalna. Enggo kessa bagidi mercènderren mo kalak i janah menepetti nasa dosa kalak i dekket dosa mpungna.

³Kira-kira tellu jom dekkahna ijakaken mo bukku Patin JAHOWA, Dèbata kalak i taba kalak i janah sidekkah tellu jom nai nola ma iaku kalak i mo karina dosa- dosa kalak i. Enggo kessa i sujud mo kalak i janah menembah JAHOWA, Dèbata kalak i.

⁴Lot ngo i sidi langgaten lako bai kalak Lewi janah cènder mo i babona si Jesua, si Kadmiel, si Bani, si Sebanya, si Buni, si Serebya, si Bani dekket si Kenani. Merkitè sora nggang mersodip mo kalak i taba JAHOWA Dèbata kalak i.

⁵Perpulungen ibas sidari i, ipungkah kalak Lewi simergerar: si Jesua, si Kadmiel, si Bani, si Hasabneya, si Serebya, si Hodia, si Sebanya dekket si Petahya. Idokken kalak i mo, “Jengjeng mo kita janah sipoji mo JAHOWA Dèbatanta! Sipesakat mo pemojien siamman sumendah baNa! Terpoji mo gerarNa sidom kemuliaen, gerar sitermurmur mengelampoi karinana pemojien!”

⁶Kessa i mersodip mo kalak Israel bagèen, “Kono ngo JAHOWA, janah pellin sada kono ngo kessa JAHOWA; ihanaken Kono ngo bintang dekket suberri angkasa, bagidi ma laut dekket tanoh dekket sagumanna sinna, nai iberèken Kono kenggeluhen bak ijaga. BaMu ngo kuasa i langit mersembah merkuraja; tunduk ngo kalak i baMu janah mengaku ma.

⁷Kono ngo Dèbata, JAHOWA sisadasa. Ipilih kono ngo si Abram arap tengah bangsana nai. Ur sini Babel enggo itadingken ma, kumerna Kono sendiri ngo mengulukensa. Nai iberèken kono ngo bana gerar rimbaru nola. I sidi nai si Abraham nola mo dokenken gerarna.

⁸Idah ko setia janah patuh ngo ia. Nai ibakin kono mo padan ntegguh merimbangkensa. Tanoh Kanaan, Het dekket Amori, tanoh Feris, Jebus dekket Girgasi, karina idi naing iberèken kono bana; mahan bekkas ianen karina pinemparna. Nai ipahèi Kono ngo padan idi tabasa, kumerna ntèger ngo ko janah setia.

⁹Idah Kono ngo kinipersuk empung nami arnia; idengkoh Kono ngo tangisna i Mesir bak i Laut Teberau.

¹⁰Ibaing kono ngo taba raja Mesir, kelengangen mahan tanda-tanda bagi dekket taba pugabè bak ginemgem nagerrina, kumerna ibettoh kono ngo barang bakunè bangsaMu ipekia-kia. Nai termurmur mo gerarMu soh mi ari ènda.

¹¹Lako mahan dalan bai bangsaMu, laut ibellah ko; gabè suberrang mo kalak i arap dasar laut, oda ntaptap ibaing ko. Karina simengeletlet terneknek ibas laè mbages i, tosè bagè batu lenneng i laut sintengam i.

¹²Merkitè hembun iuluken ko kalak i tupung mahar ari. Janah tikan berngin ibendangi kono dalanna merkitè tihang api.

¹³Susur ngo kono i langit nai mi babo delleng Sinai, nai mengerana mo ko dekket bangsaMu sendiri. Iberèken kono ngo patin, hatoren dekket perèntah ntèger bana merguna ma ngo janah.

¹⁴Ari Sabat Simbadia kennah pèstanken kalak i, janah merkitè si Musa iberèken kono patinMu i.

¹⁵Sinderrang melèhè kalak i janah kurang pangaen, iberèken kono ngo roti i langit nai. Janah arap batu mpihir, sesset janah mpihir lot ibaing kono laè pepalum muas, marir. Ipasulak kono kalak i lako mengiani tanoh sienggo ipadanken kono merkitè bulaban.

¹⁶Tapi tunggang janah mpihir ngo ukur empung nami; perèntah-perèntahMu pè oda iuèi kalak i.

¹⁷Mengalo ngo kalak i, bak simerandal nibaingMu oda ièngèt, janah karina kelengangen sinipehanaMu, mersep arap pendèngèt. Tunggang ngo kalak i mènter memilih sada kalak èkutenna, memabai kalak i mi Mesir, asa balik gabè hamba. Tapi ukum Ko alè Dèbata dak uè pelamlamken, dak sobar, perlamlam, dom permasèh atèen. Termurmur ngo masèh atèMu, oda ngo itadingken Kono kalak i.

¹⁸Iteppa kalak i ngo gana-gana bagè lembu. Nai idokken kalak i mo, ‘En ngo Dèbata ndènè, simengarak kènè i perhambaen Mesir nai.’ Alè Dèbata, ilèai kalak idi ngo kono!

¹⁹Kasi pè bagi oda ngo itadingken kono kalak idi i gurun pasir kumerna dom masèh atè ngo Kono. Oda ngo isintak kono tihang api bak hembun menuduhken dalan bai kalak i mahar bak berngin.

²⁰Merkitè kuasaMu simerandal i iajari kono ngo kalak i. Cukup ngo pangaen manna dekket laè ènumen bai kalak i.

²¹Sidekkah empatpuluh tahun i perdalanen, ipepada kono ngo bai kalak i nasa keperluen. Oda mumuk pakkèen kalak i, oda ncio barang pè mbessar nèhèna iakap kalak i.

²²Iberèken kono ngo kemenangen bai kalak i merimbangken mèduk kerajaen dekket bangsa siniperbalengen tanoh kalak i. Kuta Hesybon nagerri Raja Sihon itaban kalak i; Basan nagerri Raja Og iiani kalak i.

²³Ibakin kono ngo pemparen kalak i bagè buè bintang sinilangit i. Iberèken kono ngo tanoh mahan ianenna, tanoh sienggo niperbagahmu taba empungna.

²⁴Italuken kalak i ngo tanoh Kanaan; pengisi sinisidi pè Kono ngo pepatuken. Iberèken kono ngo bai ummatMu kuasa memakin lemmona taba bangsa-bangsa Kanaan bak raja-rajana.

²⁵Irampasi ummatMu ngo bèntèng-bèntèng pertahanen, tanoh nggabur dekket sapo sidom kekayaen. Telaga-telaga dekket mata mul irampas kalak i pekken anggur, kayu zaitun dekket buah-buahen sidèbanna i. Nggomok mo kalak i kumerna kipangani tuk gegohna. Iakapi kalak i mo nasa pemerèkenMu simerandalna.

²⁶Tapi dak mengalo janah oda menguèi kono kum ummatMu, oda isuihken patiin dekket hatorenMu, memunuh nabi-nabi sipesèngètken kalak i, janah pasulakken kalak i balik mendahi kono, Dèbatana i. Ialè Jahowa dak gennep tèk ngo dak ilèai kalak i kono,

²⁷nai isohken kono mo kalak i taba musuhna mpiah kalohon ngo pengerajai dekket pendersana. Tapi ibas kesusahen simenjerngem, tenggo-tenggo ngo kalak i baMu mengido pengurupien. Idengkohken Kono ngo i sorga nai; merdengan dom masèh atè ngo ko mengaloi. Ipasulak kono ngo simenguluken dekket lubalang paluahken kalak i meraloken imbang.

²⁸Tapi enggo kessa mènak nola nagerrina i, mènter merdosa nola mo kalak i mengolihi. Nai ipesakat ma mo kalak i nola taba musuh simendersa. Bagi pè i, tikan kessa satdar kalak i janah peselsel dilo-dilo mo kalak i baMu mengido asa ipaluah. Nai idengkohken Kono ngo i sorga nai, janah dakdak ngo iurupi Kono, kumerna dak masèh ngo atèmu taba kalak i janah uluk ngkelleng atèmu.

²⁹Ipesèngèt kono ngo kalak i asa iuèi peddahMu, tapi dak itulak kalak i ngo patinMu merdengan ndates ukur. Keppèken, mula iulaken kalak idi patinMu i, kennah selloh ngo nggelluh kalak i. Perkata sada ngo kalak i janah perukur batu oda nggèut ajaren, oda uè mèut.

³⁰Mengurun tahun, gancih tahun, dak sobar ngo Ko pesèngètken kalak i merkitè nabi, mengerana ngo tendiMu taba kalak i. Tapi isompel ummatMu ngo pènggelna, nai isohken Kono mo kalak i taba bangsa-bangsa suberri aur.

³¹Tapi kumernaken sondel masèh atèMu oda itadingken barang itumpatken Kono kalak i. Situhuna, pellin Kono ngo Dèbata siso lot codinna; sondel ngo ngkellengMu, masèh atèmu mengiba-ngiba!

³²Ialè Dèbata, Dèbata nami simergegoh i. Dèbata meheji janah mahantu i. Ntegguh ngo karina padan ijemmak Kono; ipahèi janah iulaken kono bagah-bagahMu. Mulai i tikan raja-raja Assur nai simendersa kami soh bagèndari, mermatcam bagè ngo kinimpersuk sempa bai nami. Karina raja nami, imam, nabi dekket simpantasniasè, bak empung nami bak ginemgem karinana mendersè. Ulang mo lupaken karina kinidersa idi! Ulang mo patakken ibas pernèngètenMu nai.

³³Ntèger ngo pemahanMu, ihukum kono ngo kami simerdosa; kasi pè kami idomi tikas, dak tong ngo kono setia.

³⁴Empung nami, raja, imam dekket nasa simpantasniasè, mengelausi patinMu janah pukpuk iosè. Nasa perèntah dekket sèngèt-sèngèt sinibaingmu oda isuihken, janah oda ma idengkohken.

³⁵Ipasu-pasu Kono ngo raja-raja simengerajai ummatMu; tikan merian kalak i i tanoh mbellang janah nggabur siniberèkenMu. Bagi pè tong ngo oda nggèut kalak i menadingken perulaen jahat; oda uè tunduk bak menguèi ukum baMu.

³⁶Nai bagèndari enggo gabè hamba kami i tanoh siniberèkenmu sikira gemgemmen nami. Nggabur ngo tanoh èn, gukguk hasilna, patut kin nemmu kurasaken kami.

³⁷Nasa hasil sidapet i tanoh ènda nai kennah berèenken bai raja-raja nagerri. Ipebangkit kono ngo perkuasa idi mengerajai ummatMu, gabè hukumen kerna dosa nami baMu. Lemmo-lemmo kalak i ngo memerèntah kami mi diri nami dekket pinakan silot bai nami. Kemulihken i ndersa ngo kuakap kami bagèndari, pukpuk sessak bana bonek atè nami!”

³⁸Merhenjellen mi karina simasa i, memaing padan ntegguh janah tersurat mo kami kalak Israel, janah icap simenguluken kami, bang kalak Lewi dekket sada kalak imam nami.