Read Batak Dairi Ester 1 Bible Online

Ester 1 - Batak Dairi bible

Ester 1

¹I Susan, induk kuta Persia memerèntah ngo Raja Ahasweros. Lot ngo 127 propinsi kerajaenna i, mulai i India nai soh mi Sudan.

³I tahun petelluken kerajaenna i, memaing pèsta mbellen ngo Raja Ahasweros dekket pugabèna. Roh ngo karina pakalima Persia dekket Media mi pèsta i, bagi ma bang karina gubèrnur dekket perpangkat gennep propinsi.

⁴Ennem bulan dekkahna raja i pacidahken kinibèak istanana dekket kinimahantu bak kemuliaen kerajaenna.

⁵Enggo kessa i merpèsta nola mo raja i rebbak dekket karinana ginemgemna kalak bèak, bang kalak ncor pè i Susan. Seminggu dekkahna ibaing pèsta idi i kasèan pekken istana raja.

⁶Ibunga-bungai ngo kasèan istana dekket kaèn linen meratah dekket mbulan, ièkèti dekket tenali linen halus janah isangketken mi gellang-gellang pirak sinibaing mi tihang-tihang batu pualam. Ibaing ma ngo i terruhna i pèntas-pèntas emmas bak pirak i babo hatap merlampis pualam mbulan, mbara dekket mbèrèng, mutiara merkillok-killok dekket batu pirus meratah.

⁷Ipèmaken raja i ngo anggur mbuè kalohon, ihantari ibas perènumen-perènumen emmas mermatcam bagè.

⁸Tamuè-tamuè i pè tuk gegohna ngo mènum anggur tapi oda ma ngo ipaksa kennah mènum. Enggo kin ngo idokken raja i taba perkebbas istana, asa gennep tamuè i ikebbasi mengèkutken kadè sinikelemokenna gennep.

⁹Sinderrang bagidi si Wasti bindohara i pè memaing pèsta ma ngo dekket daberru-daberru ibas istana.

¹⁰I ari pepituken, mènum-mènum mo raja i sanga lolo kalohon ia, kumarna i idilo mo pugabèna sipitu kalak, imo simengkebasisa, mergerar si Mehuman, si Bista, si Harbona, si Bigta, si Abagta, si Zetar dekket si Karkas.

¹¹Idokken mo asa ialengi bindohara Wasti roh mi lebbèna merbulang-bulang kerajaen i babo takalna. Mberru kalohon ngo bindohara i. Dok atè raja naing ipetontonken ngo kinimberruna i bai karina perpangkat ndates dekket karina tamuèna i.

¹²Tapi ipesakat perkebbas i kessa mo perèntah raja i taba bindohara Wasti, oda ngo uè ia roh, gabè melaga kalohon mo raja i.

¹³Kecemmalen raja i ngo mengido pendapet bai kalak simpantasniasè nai tersèngèt hukum dekket adat. Kumerna i idilo mo penasèhatna simemettoh bakunè baingen mula bagi matcamna.

¹⁴Penasèhat singgatina kalon idilo raja i imo si Karsena, si Setar, si Admata, si Tarsis, si Meres, si Marsena dekket si Memukan. Kalak i mo pugabè sindatesna i kerajaen Persia dekket Media.

¹⁵Idokken raja i mo taba sipitu kalak i, “Enggo kupasulak naposongku mendahi Bindohara Wasti asa roh ia nemmu mi sèn. Tapi oda uè ia. Mengèkutken hukum bakunè sibaing tabasa?”

¹⁶Nai nina si Memukan mo taba raja i dekket taba perpangkat ndates sinisidi, “Merkitè pemaing Bindohara Wasti i, oda ngo pellin Rajai ilèai, tapi karinana ngo pugabè-pugabè Rajai, dekket dèng ngo tupèh karinana daholi silot i kerajaen èn.

¹⁷Ai ibettoh karina daberru mo pemaing bindohara i, gabè oda nèngè mo isuihken kalak i sinibalèna gennep. Dokenken kalak i mo, enggo iperèntahken Rajai Bindohara Wasti asa roh menghadep, tapi oda uè bindohara.

¹⁸Jadi mula idengkoh sinibages perpangkat i Persia dekket Media kessa mo simasa i, mèter ibagahken mo i bai sinibalèna. Nai pengkerohkenna gabè mengalo mo sinibages mi perèntah sinibalèna janah ilagai sinibalèna mo sinibagesna.

¹⁹Kemulihken i kupidoken kami bai Rajai, asa ibaing Rajai sada keputusen mendokken oda nè ndorok bindohara Wasti menghadep Rajai. Keputusen i kennah gabè hukum mo idi i Persia dekket Media, janah siso ndorok obahen. Enggo kessa i, gabè daberru sidèban nola mo i bekkas bindohara Wasti i kin, sitermendèen pengelakona.

²⁰Mula tersar kessa mo keputusen Rajai i suberri karajaen simbellang èn, gabè ipesangap sinibages mo sinibalèna, bèak barang ncor pè.”

²¹Iuèi raja dekket pugabè-pugabè perpangkat ndates mo usul si Mehukan i, nai mèter iulaken raja i mo.

²²Itengesken mo surat mi karina propinsi i kerajaenna, ibas kata dekket surat propinsi i gennep. Kata perèntah i mendokken ipas gennep jabu, sinibalè ngo gabè èkuten dekket simemaing keputusen.