Read Batak Dairi Ester 3 Bible Online

Ester 3 - Batak Dairi bible

Ester 3

¹Daoh-daoh arien, ipebangkit Raja Ahas- weros mo si Haman gabè perdana menteri. Ukum si Haman anak si Hamedata i pemparen si Agag nai ngo.

²Iperèntahken raja i ngo taba karina pugabèna asa ipesangap si Haman merkitè mersembah i hadeppenna. Laènken si Mordekhai, karina ngo menguèi perèntah i.

³Ipengkusoken pugabè sidèban i istana i mo tabasa, kasa ilanggar perèntah raja i,

⁴janah gennep ari ngo dak idokken kalak i tabasa asa iuèi, tapi oda idengkohken. Nina ngo, “Kalak Jahudi ngo aku; oda ndorok mersembah aku taba jelma.” Nai ibagahken kalak i mo i mbang si Haman, kumarna naing ibettoh kalak i tah bakunè ma ibaing taba si Mordekhai i.

⁵Ibettoh si Haman kessa mo oda uè si Mordekhai mersembah bana, melaga kalohon mo ia.

⁶Janah ibettoh kessa kalak Jahudi ngo keppè si Mordekhai, iputusken mo menghukum si Mordekhai. Oda ngo pellinsa sambing, tapi karina kalak Jahudi ngo naing iripasken i kerajaen Persia nai.

⁷I tahun pesipuluhduaken pemerèntahen Raja Ahasweros, i bulan sada, imo bulan Nisan, idokken si Haman mo mertendung sinigerarenna “purim” lako memettoh ndigan ari bak bulanna selloh pesautken niatna jahat i. Nai ipetettah mo ari sipuluh tellu bulan dua bellas, imo bulan Adar.

⁸Idokken si Haman mo taba raja i, “Alè Raja nami, lot ngo sada bangsa sidèban mèrap i suberri propinsi kerajaen èn. Adatna pè laèn kalohon ngo ipas adat bangsa-bangsa sidèban nai. Oda ngo iuei kalak i hatoren kerajaen. Kemulihkenna i, ulang nemmu ipaduè Rajai kalak i memaingken lemmo-lemmo atèna.

⁹Mula toko atè Rajai naing mo nemmuken sikaruarken sada perèntah mengeripasken kalak i. Mula uè ngo Rajai menjalo usulku, ndorok mo kubuat lebbih 340.000 kilo pirak gabè mengisi kas Rajai.”

¹⁰Mendengkoh i, mèter iruah raja i mo cincin sinipakèna i jari-jarina nai, asa icap sitingtingenken i rasmi, nai iberèken mo taba si Haman musuh mbellen bangsa Jahudi i.

¹¹Nina raja i mo mbangsa, “Kusohken mo bangsa i dekket hartana bamu. Baing mo bakunè selloh dok atèmu taba kalak i.”

¹²Nai i ari sipuluh tellu bulan sada, idilo si Haman mo juru tulis raja-raja. Idokken mo kalak i menurat surat, katana dos mi karina siniperèntahkenna, nai iterjemahken mo kata surat i mi karina kata janah isalin mi karina surat siterpakkè i kerajaen i. Isurat ngo surat i merkitè gerar Raja Ahasweros nai icap dekket cincinna i, nai itengesken mo ndor mendahi karina perkuasa, gubèrnur dekket perpangkat ndates karina propinsi. Ukum isina imo perèntah mendokken, ari sipuluh tellu bulan Adar, karina bangsa Jahudi, tua-tua barang poso dèng, daberru bang pè anak-anak, kennah ibunuh oda lot ampunen, janah karina harta kalak idi irampasi.

¹⁴Kennah itingtingken ngo perèntah i i gennep propinsi asa karina jelma enggo kebbas tupung ari sienggo itentuken i.

¹⁵Isudu mo berkat pasuleken menaruhken surat-surat i mi karina propinsi kerajaen. Merkitè perèntah raja, itingtingken ma mo perèntah idi i Susan induk kuta Persia. Enggo kessa i kundul-kundul mo raja i dekket si Haman ningan mènum anggur, tapi ukum kuta Susan enggo gontar kumarna berita i.