Read Batak Dairi Ester 4 Bible Online

Ester 4 - Batak Dairi bible

Ester 4

¹Idengkoh si Mordekhai kessa mo simasa i, iribak mo pakènna, ipakkèken nola mo kaèn goni pertanda bonek. Ibaing mo cirabun mi takalna, nai merdalan mo ia i kuta i ninganna tangis muo-uo kumarna bonekna.

²Mentadi mo ia i pèntu pengkeruhen istana, kumarna igerra ngo mbengket kalak simerpakèen goni.

³Bagi ma ngo i karina propinsi, tangis ngo karina kalak Jahudi enggo kessa itingtingken perèntah raja i. Puasa mo kalak i, tangis janah mernong-alè, mèduk ngo kalak i memakè kaèn goni janah galè i babo cirabun.

⁴Ibagahken simerbaju dekket perkebbas simengkebasi bindohara Ester kessa mo i tabasa karina pemaing si Mordekhai i, gabè bonek kalohon mo si Ester. Itengesken mo oles bai si Mordekhai mahan gancih oles gonina i, tapi oda uè si Mordekhai menjalo.

⁵Nai idilo si Ester mo si Hatah, imo sada kalak sinidokken raja i mengkebasi keperluen si Ester. Ipasulak mo si Hatah mengkusoi si Mordekhai kadè pana masa janah kasa bagi ibaing.

⁶Nai laus mo si Hatah mendahi si Mordekhai i kasèan kuta i lebbè pèntu pengkeruhen istana i.

⁷Isukutken si Mordekhai mo tabasa kadè masa dekket sadikè buè riar pirak ijandiken si Haman pemasukenna mi kas raja, mula enggo kessa iripasken kalak Jahudi i.

⁸Iberèken si Mordekhai ma ngo bai si Hatah salinen surat raja sienggo ibahan i Susan imo perèntah mengeripasken kalak Jahudi. Idokken ngo taba si Hatah asa iberèken surat i taba si Ester ninganna ipeterrang simasa i tabasa, janah ipidoken ma asa idahi si Ester raja i lako mengido masèh atè taba bangsana.

⁹Nai laus mo si Hatah mendahi si Ester janah pesakatken tennah si Mordekhai i bana.

¹⁰Tapi ipasulak si Ester nola mo si Hatah mendahi si Mordekhai magahken tennahna èn.

¹¹“Gennep jelma, daholi barang daberru, mula roh mi kasèan perbagasen istana, ukum oda ngo idilo raja i, kennah ihukum matè ngo. Sada hatoren ngo i janah karina kalak mulai penasèhat raja soh mi ginemgem i propinsi-propinsi, ibettoh ngo i. Pellin sada ngo kessa dalan maluah i hatoren i nai, imo mula idoroken raja i tongket emmasna taba jelma siroh i. Mula bagi kessa ibaing, maluah mo ia. Tapi enggo sebulan, oda lot idilo raja i aku.”

¹²Nai ipesoh si Hatah mo tennah si Ester i taba si Mordekhai.

¹³Jadi itennahken si Mordekhai mo sipesèngètna èn taba si Ester, “Ulang dok atèmu laèn kono bai kalak Jahudi nai, kumarna i istana kono!

¹⁴Ukum kalak Jahudi kennah terolih pengurupien ngo, barang bakunè pè dalanna, asa gabè maluah kalak i. Tapi mula sip sambing ngo kono enggo pè bagèen masa, kono pè matè ngo janah karina simpangaen bapamu pè tumpat mo. Oda nibettoh tah bakunè kumerna sibagèn i asa terpilih kono gabè bindohara.”

¹⁵Nai itennahken si Ester mo berita bagèen taba si Mordekhai,

¹⁶“Pepulung mo karina kalak Jahudi silot i Susan asa isodipken aku. Ulang kènè mangan bak mènum sidekkah tellu ari. Aku pè dekket simerbaju naposongku puasa ma mo. Enggo kessa i laus mo aku menghadep raja, tukasi pè i mengelaggar hatoren. Mula kennah matè aku kumernaken i, matè mo.”

¹⁷Nai laus mo si Mordekhai mahanken bagè sinitennahken si Ester i.