Read Batak Dairi Ester 5 Bible Online

Ester 5 - Batak Dairi bible

Ester 5

¹Petellu ariken puasana i, ipakkè si Ester mo pakèen bindoharana, nai laus mo ia mi kasèan perbagasen istana janah cènder mo ia i lebbè pèntu runggu. Tupung ngo raja i kundul ipas tahtana menghadep mi pèntu i.

²Idah kessa mo si Ester cènder i ruar, mèter turah mo ukur ngkellengna janah idoroken mo tongket emmasna tabasa. Nai mi lebbè mo si Ester, idegges mo punca tongket i.

³Nai mengkuso mo raja i, “Kadè alè Bindoharangku? Kadè ipergeddo ukurmu? Bagahken mo! Mula pè ipido ko sitengah kerajaenku, kuberèken ngo i.”

⁴Ialoi si Ester mo, “Mula toko atè raja i, naing mo nemmu roh raja i dekket si Haman mi pertamuèen sikubaing bai Rajai.”

⁵Idokken raja i mo asa ndor roh si Haman, asa roh kalak i menguèi undangen si Ester i. Nai roh mo kalak i mi pertamuèen sinibaing si Ester i.

⁶Tikan mènum anggur, mengkuso mo raja i, “Bagèndari pè pido mo kadè sinaing kuberèken, mula pè sitengah daripada kerajaenku i.”

⁷Ialoi si Ester mo,

⁸“Mula toko ngo atè Rajai menguèi pengidoenku, naing mo nemmu roh dèng Rajai dekket si Haman mi pertamuèen sikubaing ciboen baremben. Tikan pertamuèn imo lot pengidonku taba Rajai.”

⁹Balik mo si Haman i pertamuèen bindohara Ester i nai ibagasen sampang atè. Tapi idah kessa mo si Mordekhai i pèntu pengkeruhen i, siso uè kèkè menghormatsa, gabè malaga kalohon mo ia.

¹⁰Kasi pè bagi, ibekkem dèng ngo ukurna janah balik mo ia mi bagesna. Soh kessa ia mi bagesna i, idokken mo roh dengan-denganna dekket sinibagesna si Zeres pè asa kundul-kundul i gembar kalak i.

¹¹Nai merbual mo si Haman taba kalak i janah ièndèl-èndèlken kinibèakna, buè dukakna daholi, kuasana sinijalona bai raja nai dekket pangkatna datessen daripada sidèbankenna i.

¹²Nina dèng ma, “Bindohara Ester pè, pellin aku dekket raja i ngo kessa iundang mi pertamuèen sinibaingna bai nami, janah ciboen baremben pè iundang dèng ma ngo kami.

¹³Tapi kadè poda lapaten karinana i, sidekkah kuidah dèng si Mordekhai kalak Jahudi i kundul i pèntu pengkeruhen istana.”

¹⁴Mendengkoh karinana i idokken sinibagesna dekket dengan-denganna i mo bagèen, “Dokken mo memahan sada tihang penggantungen duapuluh dua mèter datesna. Nai njengkas sibarembenkenna pido mo ijin bai raja i nai asa igantung si Mordekhai i tihang i. Mula enggo bagi sennang mo kono laus mi pertamuèen i.” Selloh ngo usul i dok atè si Haman, kumarna i mèter isudu mo mendokken memahan tihang penggantungen i.