Read Batak Dairi Ester 6 Bible Online

Ester 6 - Batak Dairi bible

Ester 6

¹Bernginkenna i oda nggèut terpeddem raja i. Kemulihken i, idokken mo asa ibuat bukku penuraten simasa i kerajaen janah idokken mo kalak menjaka.

²Lot mo ibagasenna tersurat, ibagahken si Mordekhai lot mertaki-taki naing memunuh raja i, imo taki-taki si Bigtan dekket si Teres, imo perjahat sidua kalak simerkebbas i bilik raja.

³Ikusoi raja i mo, “Bakunè ngo enggo sibaing pesangapken si Mordekhai sikira ali jasana i?” Ialoi naposona i mo, “Oda lot dèng kadè ijalo.”

⁴Nai idokken raja i mo, “Isè pugabèngku lot i istana bagèndari?” Tupung gejapkenna i dèng roh si Haman mi kasèan istana; ai naing ipengidoken mo ijin bai raja i nai lako menggantung si Mordekhai mi tihang sienggo ipecènder i.

⁵Ialoi naposo-naposona i mo raja i, “Si Haman ngo i istana bagèndari janah naing roh ngo ia menghadep Rajai.” “Dokken mo ia roh mi sèn.” Nina raja i.

⁶Enggo kessa roh si Haman, mèter idokken raja i mo mbangsa, “Lot jelma naing kupesangap tuhu-tuhu. Bakunè mo ndia kubaing bana?” Dok atè si Haman, “Mèter isè nola mo sinaing ipesangap raja i? Kennah aku ngo i!”

⁷Kumarna i ialoi mo, “Kennah isalin mo ia dekket pakèen sienggo ncemmal ipakkè Rajai. Nai kuda Rajai pè ibunga-bungai mo dekket pertanda kerajaen.

⁹Nai idokken mo sada kalak perpangkat ndates janah mersa- ngap lako memakinken pakèen i taba kalak sinaing ipesangap Rajai, nai iarak mo ia ninganna memasang kuda Rajai i dalan kuta mbellen èn. I lebbèna mo merdalan perpangkat ndates i, ningan mendilo-ndiloken, ‘Bagèen ngo ibaing Rajai pesangapken jelma sinaing pesangapenna!’ ”

¹⁰Nai idokken raja i mo mbang si Haman, “Kettu mo buat pakèen dekket kuda i janah baing mo karina penghormaten i taba si Mordekhai kalak Jahudi i. Bakin mo bagè sinidokkenmu ndai, janah ulang kurangi agia cituk pè. Dahi mo ia i pèntu pengkeruhen istana, ai i sidi ngo ia bagèndari kundul-kundul.”

¹¹Nai ibuat si Haman mo pakèen dekket kuda i, iselukken mo pakèen i taba si Mordekhai. Enggo kessa ipasang si Mordekhai kuda i, nai iarak si Haman mo ia arap dalan mbellen kuta i ninganna mendilo-ndiloken, “Tengen kènè mo, bagèen ngo ibaing raja i pesangapken kalak sinipesangapna.”

¹²Enggo kessa i balik mo si Mordekhai mi pèntu pengkeruhen istana. Tapi ukum si Haman rudu-rudu mo ia balik mi bagesna. Oda uè ia idah dèba kumarna mèla kaloen iakap, gabè ikemkemmi mo abèna.

¹³Isukutken mo karina simasa i bai sinibagesna dekket bai karina denganna. Nai idokken sinibagesna dekket dengan-denganna sibijak i mo tabasa, “Enggo mulai talu seppuhmu merimbangken si Mordekhai. Kalak Jahudi ngo ia janah bakunè pè oda teralo kono ia. Kennah italuken ngo kono.”

¹⁴Sinderrang mengeranai dèng kalak idi dekket si Haman, roh mo rudu-rudu pugabè istana naing menaruhken si Haman mi pertamuèen sinibaing si Ester.