Read Batak Dairi Ester 7 Bible Online

Ester 7 - Batak Dairi bible

Ester 7

¹Pedua kaliken èn mo raja dekket si Haman rebbak mangan mènum dekket si Ester.

²Ningan mènum anggur i, ikuso raja i dèng ma mo si Ester, “Alè Bindoharangku, kadè ngo ipergeddo ko? Bagahken mo! Kennah kuberèken ngo tukasi pè sitengah daripada kerajaenku èn.”

³Ialoi si Ester mo, “Mula tuju ngo atè Rajai kupido asa ipaduè Rajai aku dekket bangsangku nggelluh.

⁴Ai enggo idèaken aku dekket bangsangku asa ibunuh. Ukum pellin mahan hamba ngo kessa kami asa idèa, sip ngo aku janah oda pella kususahi Rajai. Tapi ukum bagèndari naing iripasken janah ipetumpat ngo kami.”

⁵Nai ikuso Raja Ahasweros mo Bindohara Ester, “Isè pana pang memaing bagidi? Idikè kalakna?”

⁶Ialoi si Ester mo, “Si Haman perjahat èn ngo musuh dekket simenusahi kami.” Ibagasen buradan kalohon, itengen si Haman mo raja dekket bindohara i.

⁷Melaga kalohon mo raja i, nai kèkè mo ia, itadingken mo mèja laus mo ia mi ruar, mi kasèan pekken istana. Tahu mo si Haman, enggo tutus ukur raja memutusken hukumna, kumarna i dak tong ngo ia i gembar Bindohara Ester lako mengidoken asa ipaluah ia.

⁸Ibagasen mendellè ipegampar si Haman mo dirina mi babo pentas si Ester lako mengido ampun, tapi tupung bagidi, balik mo raja i i kasèan pekken istana nai. Mengidah si Haman bagidi, idiloken raja i mo, “Nong ngalè nang? Tong dèng ma ngo keppèken ia mengerampok bindohara i sèn, i hadeppenku janah i istanangku?” Enggo kessa idokken raja i bagi, mèter ndor mo roh pugabè memaluti takal si Haman.

⁹Nai nina si Harbona sada kalak ipas pugabè i mo, “Alè Raja nami, i gembar sapo si Haman lot ngo ipajek tihang penggantungen duapuluh dua mèter datesna. Ibahan si Haman i naing mahan bekkas si Mordekhai igantung, imo kalak sienggo mempebèlai kessah Rajai.” Nai iperèntahken raja i mo, “Gantung mo si Haman i tihang i.”

¹⁰Bagi mo gabè si Haman igantung i tihang sinipajekna bekkas menggantung si Mordekhai kin nemmu. Enggo kessa bagi pè asa malap laga raja i.