Read Batak Dairi Ester 8 Bible Online

Ester 8 - Batak Dairi bible

Ester 8

¹Sidarinkenna i ma mo iberèken Raja Ahasweros bai bindohara Ester karinana harta si Haman musuh mbellen kalak Jahudi i. Ibagahken si Ester ma ngo taba raja i, ukum si Mordekhai, turangna sibeltek bapa ngo. Mulai isidi nai iberèken mo hak bai si Mordekhai menghadep raja, tukasi pè oda lebbè idilo.

²Iruah raja i ngo cincinna sienggo ibuat balik bai si Haman nai, gabè iberèken mo bai si Mordekhai. Nai ipebangkit si Ester mo si Mordekhai gabè menguasai harta si Haman.

³Enggo kessa i, ihadep si Ester nola mo raja i. Mersembah mo ia ninganna tangis mengidoken asa isondati raja i rencana jahat sinibaing si Haman taba kalak Jahudi.

⁴Idoroken raja i mo tongket emmasna taba si Ester, nai kèkè mo si Ester mendokken,

⁵“Mula toko iakap Rajai janah ngkelleng atèna midah aku, naing mo nemmu ibaing Rajai surat perèntah lako menondati surat-surat si Haman simemerèntahken mengeripasken karina kalak Jahudi i kerajaen èn.

⁶Bakunè mo atèngku menengen bangsangku dekket kadè-kadèngku itumpatken?”

⁷Nai nina Raja Ahasweros mo mbang bindohara Ester dekket si Mordekhai, “Tuhu, enggo kugantung si Haman kumarna naing iripasken kalak Jahudi, janah karina hartana enggo kuberèken bai si Ester.

⁸Tapi sienggo isurat merkitèken gerar raja dekket icap bak cap raja, oda ndorok icabut nèngè. Tapi bagi pè kuijinken ngo kènè maing surat tersèngèt bangsa Jahudi, barang bakunè mo selloh dok atè ndènè. Suratken kènè mo surat i merkitè gerarku janah cap kènè dekket cap kerajaen.”

⁹Sidarinkenna i ma, imo ari 23 bulan tellu barang Siwam, idilo si Mordekhai mo juru tulis raja janah iperèntahken tabasa asa ibaing surat taba karina gubèrnur dekket bupati dekket taba karina perpangkat ndates si 127 propinsi, i India nai soh mi Sudan. Surat i isuratken ipas kata dekket surat gennep propinsi i. Itengesken ma ngo surat i mendahi kalak Jahudi ipas kata dekket surat Jahudi.

¹⁰Karina surat i itekken si Mordekhai merkitè gerar Raja Ahasweros janah icap dekket cap kerajaen. Nai ipasulak si Mordekhai mo menaruhken surat-surat i mi gennep propinsi i kerajaen i merkuda milik raja i asa ndor soh.

¹¹Kata surat i mendokken, ipaduè raja i ngo kalak Jahudi i gennep kuta asa mersada lako membèla dirina. Mula ijuhap kalak mersinjata ipas bangsa dekket propinsi dikè pè i, ndorok ngo kalak i mengalo dekket memunuh simenjuhap i bang sinibages dekket dukak-dukakna; ndorok ma ngo kalak i mengeripasken musuh-musuhna i soh tumpat, ningan menaban hartana karina.

¹²Kennah idalanken ngo perèntah i i suberri kerajaen Persia tupung ari sienggo itentuken si Haman lako memunuh kalak Jahudi, imo tupung ari tellu bellas bulan dua bellas bulan adar.

¹³Surat perèntah i karuar dosken hatoren janah kennah isarken bai karina kalak i suberri propinsi asa kebbas karina bangsa Jahudi mengalo musuhna mula dapet kessa arina.

¹⁴Nai berkat mo pasulakken i merkuda imo kuda milik raja i. I Susan induk kuta kerajaen pè, ijakaken ngo perèntah i.

¹⁵Enggo kessa i berkat mo si Mordekhai i istana nai memakè pakèen kesangapen meratah bak mbulan, jubah mbara mesiap i kaèn linen nai dekket rudang emmas merandal kalohon. Meroang-oang ngo pengisi kuta Susan kumerna lolona.

¹⁶Puas mo iakap kalak Jahudi janah sennang, mersampang atè janah lolo.

¹⁷Bagi ma ngo i gennep kuta bak propinsi, barang i dikè sambing surat perèntah raja i ijakaken, lolo ngo kalak Jahudi, mersennang-sennang bak merpèsta. Gabè mèduk mo ginemgem gabè bangsa Jahudi, kumarna buradan kalak i midah bangsa i.