Read Batak Dairi 2 Musa 1 Bible Online

2 Musa 1 - Batak Dairi bible

2 Musa 1

¹Si Jakob sinigeraren ma si Israel, laus mi Mesir rebbak dukak-dukakna bagi ma dekket sinibagesna gennep. Dukak-dukak si Jakob imo:

²Ruben Simeon Lewi Juda

³Isasar Zebulon Benyamin

⁴Dan Naftali Gad Asyer

⁵Karina pemparen si Jakob buèna pitupuluh kalak. Enggo lebbèen kin si Josep i tanoh Mesir.

⁶Enggo kessa barang sadikè dekkahna, matè mo si Josep dekket karina kaka-anggina, bagi ma dekket karina sinterbang dekketsa.

⁷Ukum pemparen kalak idi, imo kalak Israel, meranak merberru mbuè kalohon ngo, janah ndor ngo kalak i nterrem-gabe idomi kalak idi karina nagerri Mesir.

⁸Kessa i lot mo sada raja rimbaru siso menandai si Josep mengerajai i Mesir.

⁹Idokken mo taba ginemgemna idi, “Kerna buèn janah mergegohen ngo kalak idi banta nai, merbahaya ngo kalak i banta.

¹⁰Mula masa geraha, tah bakunè sada taki nola kalak idi dekket musuh mengalo kita, gabè mperrus kalak i menadingken nagerri èn. Kennah situlusi mo dalan bakunè asa ulang buèèn nola kalak idi.”

¹¹Nai i pebangkit kalak Mesir mo mandur taba bangsa Israel lako pepersah-persahken nggelluh kalak idi merkitè rodi. Ipaksa mo kalak idi memajek bai raja, kuta Pitom dekket Raamses mahan bekkas penimpanen harta.

¹²Tapi makin idersa kalak Mesir pè kalak i makin muat tambahna ngo buè kalak Israel, janah makin sap mo kalak idi i suberri nagerri i, nai makin mbiar mo kalak Mesir taba kalak idi.

¹³Nai makin kejamna mo kalak idi mendersa bangsa Israel,

¹⁴janah ipepersuk nggelluh kalak idi. Oda meralang-alang ipaksa ngo kalak i mahan bahaen dekket mengula juma.

¹⁵Kessa i iperèntahken Raja Mesir mo taba si Sifra dekket si Pua, dua kalak sibaso simengurupi daberru Heber si ketaring.

¹⁶Nina raja i mo, “Mula tupung mengurupi daberru kalak Heber kènè ketaring èngèt kènè mo èn: Mula daholi ngo situbuh i, patèken kènè mo. Mula daberru ngo situbuh i, belli kènè mo nggelluh.”

¹⁷Tapi duana ngo sibaso idi mbiar midah Dèbata. Oda nggèut kalak idi mengulaken perèntah raja i janah ibelli ngo nggelluh karina anak daholi sirimbaru tubuh i.

¹⁸Nai idilo raja i mo sibaso sidua kalak idi janah ikuso, “Kasa ibelli kènè anak-anak daholi i nggelluh?”

¹⁹Ialoi kalaki mo, “Oda ngo bagè daberru Mesir daberru Heber. Melungkah kalohon ngo kalak i menubuhken dukak. Sinderrang mak deng pe roh sibaso, enggo tubuh dukak kalak i.”

²⁰Nai ipasu-pasu Dèbata mo sibaso-sibaso idi janah memaing kalak i meranak-merberru, kerna ipesangap kalaki Dèbata. Janah kalak Israel pè muat tambah mbuèna mo janah mergegoh.

²²Nai ipesakat raja mo perèntah ènda bai karina-sinigemgemmenna, “Gennep dukak daholi kalak Heber sirembaru tubuh kennah ambongenken mi Laè Nil, tapi karina dukak daberru ndorok mo iduè nggelluh.”