Read Batak Dairi 2 Musa 11 Bible Online

2 Musa 11 - Batak Dairi bible

2 Musa 11

¹Mongkam nola mo JAHOWA taba si Musa, “Kudabuh mo sada nai bala taba raja Mesir dekket taba sinigemgemna. Kessa i paduèenna mo kènè laus. Janah kenggonna kennah pellausenna mo kènè karina i sèn nai.

²Kumarna i mengerana mo kono dekket bangsa Israel; dokken mo kalak i mengido emmas dekket pirak bai gembar bages kalak idi nai.”

³Gabè melluh mo ukur kalak Mesir bakinen JAHOWA taba kalak Israel. Janah si Musa pè gabè kalak mersangap kalon mo iakap perpangkat dekket karina jelma nterrem i tanoh Mesir.

⁴Nina si Musa mo taba raja i, “Bagèen ngo kata JAHOWA, ‘Kira-kira tengah berngin Kuagahi mo karina tanoh Mesir.

⁵Karina anak situaen silot i tanoh Mesir kennah matè, mulai anak raja Mesir nai soh mi anak hamba daberru penutu pagè. Bagi ma anak pinakan siperlebbè tubuh pè matè ma mo.

⁶Asa terdengkoh mo i suberri tanoh Mesir sora tangis derru-derru nggang kalohon bagè siso nung dèng masa janah oda masa nèngè bagi.

⁷Tapi ukum i tengah-tengah kalak Israel, agia jelma bak pinakan pe oda ikekadè. Nai bettohen ndènè mo, Aku JAHOWA ngo simemakin lot kalihna kalak Mesir dekket kalak Israel.’ ”

⁸Dungna nina si Musa mo, “Karina pugabè raja i kennah roh janah sujud i lebbèngku janah mengidoken aku dekket bangsangku asa menadingken nagerri èn. Kessa pè bagi, asa laus aku.” Nai melaga kalohon mo si Musa menadingken raja i.

⁹Nai nina JAHOWA mo taba si Musa, “Oda isarihken raja i ranamu, asa ndorok Kubaing mermatcam bagè kelengangen i suberri Mesir.”

¹⁰Ibakin si Musa dekket si Aron mo karina kelengangen i i hadeppen raja i, tapi ibakin JAHOWA mo mpihir ukurna, dungna oda mo ipaduè laus bangsa i menadingken nagerri i.